Ombyda qurdastaryna lańkestik áreket jasaýdy usynǵan jasóspirim anyqtaldy

ASTANA. KAZINFORM – Reseıdiń Omby oblysynyń quqyq qorǵaý organdary belgisiz bireýlerdiń tapsyrysy boıynsha qurdastaryna aqsha úshin qoǵamdyq oryndarda lańkestik áreket jasaý týraly usynys jibergen jasóspirimdi anyqtady, dep habarlaıdy TASS aqparat agenttigi. 

«Kámeletke tolmaǵan bala aqshalaı syıaqy alý úshin uıaly telefon arqyly dostaryna iri somaǵa qoǵamdyq oryndarda lańkestik áreket jasaý týraly usynyspen habarlama jibergen. Habarlama jibergeni úshin jasóspirimge belgisiz bireý árbir 10 habarlama úshin 2,5 myń rýbl kóleminde aqshalaı syıaqy berýdi ýáde etken», - dep habarlady FQB aımaqtyq basqarmasynyń resmı ókili Irına Rýsnak.

Onyń aıtýynsha, jasóspirimniń turǵylyqty jerine tintý júrgizilip, kompıýter men uıaly telefon tárkilengen. Alynǵan málimetterge súıene otyryp, Reseı ІІM Omby oblysy boıynsha basqarmasy ózine baılanysty emes sebeptermen aıaqtalmaǵan aldaǵy jarylystar týraly ádeıi jalǵan habarlamalardy taratý faktisi boıynsha qylmystyq is qozǵady.

Eske sala ketsek, 22 naýryzda belgisiz bireýler Máskeý mańyndaǵy Krasnogorsk qalasynyń «Krokýs sıtı holl» ǵımaratynda oq jaýdyrǵan. Bul kezde «Pıknık» tobynyń kontserti sonda bastalýy tıis edi. Reseı Tergeý komıteti lańkestik áreketke qatysty qylmystyq is qozǵady. Bul is boıynsha aıyptalýshylar jaqynda Reseıde ustaldy.