Bektenov WorldSkills Kazakhstan kásibı-tehnıkalyq daǵdylar chempıonatynyń qatysýshylarymen kezdesti
ASTANA. KAZINFORM — Premer-mınıstr Oljas Bektenov kolledj stýdentteri arasynda salalyq jumysshy mamandyqtaryndaǵy quzyrettilik deńgeıi boıynsha WorldSkills Kazakhstan 2024 ulttyq chempıonaty ótip jatqan alańǵa bardy.
Іs-sharanyń tujyrymdamasy iri halyqaralyq kompanııalarda áleýetti jumysqa ornalasýdy qamtamasyz etý úshin oqytý sapasyn, alynǵan daǵdylardy tekserý maqsatynda kásibı-tehnıkalyq kolledj stýdentteri men kásiporyndar arasyndaǵy kooperatsııaǵa baǵyttalǵan.
Premer-mınıstr chempıonatqa qatysýshylarmen áńgimelesý barysynda olardyń alǵan bilimderiniń suranysqa ıe ekenin erekshe atap ótti.
«Prezıdent jarııalaǵan Jumysshy mamandyqtary jyly tehnıkalyq jáne kásiptik bilim berýdiń búkil elimiz úshin erekshe mańyzdylyǵyn kórsetedi. Úkimet aldyna ekonomıka qurylymyn jańǵyrtý boıynsha órshil mindetter qoıyldy. Ol úshin bizge energetıka, qurylysshy, aýyl sharýashylyǵy, kólik jáne sý salasynda bilikti otandyq mamandar qajet. Bul rette tsıfrlyq transformatsııa men tehnologııalyq progrestiń syn-qaterlerine daıyn bolý mańyzdy. Sondyqtan bizdiń ortaq mindetimiz – qoǵamnyń barlyq resýrstaryn biriktirý. Bul baǵytta biz jastarymyzǵa jáne osyndaı is-sharalarǵa jan-jaqty qoldaý kórsetetin bolamyz», — dep atap ótken Oljas Bektenov qyzyǵýshylyq tanytyp, stýdentterdiń óz daǵdylaryn kórsetýi úshin arnaıy mamandandyrylǵan aımaqtar qurǵan kompanııalarǵa alǵysyn bildirdi.
Sol jerde kolledj basshylyǵymen kezdesý ótip, onyń barysynda bilim berý sapasyn arttyrý maqsatynda kadrlar daıarlaý boıynsha ózekti máseleler talqylandy. Bıyl chempıonatqa Almaty qurylys-tehnıkalyq kolledji, «Astana Polytechnic» joǵary kolledji, «Qazaqmys» korporatsııasynyń polıtehnıkalyq kolledji, Abaı oblysy bilim basqarmasynyń Radıotehnıka jáne baılanys kolledji, Halel Ózbekǵalıev atyndaǵy Mańǵystaý joǵary polıtehnıkalyq kolledji jáne basqa da oqý oryndarynyń stýdentteri qatysady.
Eńbek jáne halyqty áleýmettik qorǵaý mınıstrliginiń málimetinshe, 2030 jylǵa deıin kadrlarǵa jalpy qajettilik 1,8 mln adamdy quraıdy, onyń ishinde tehnıkalyq bilimi bar 1 mln-ǵa jýyq jumysshy qajet. Qurylys, aýyl sharýashylyǵy, óńdeý ónerkásibi salalarynda úlken suranys kútilýde. Bıyl WorldSkills Kazakhstan ulttyq chempıonaty alańdarynda 555 qatysýshy elektronıka, ónerkásiptik avtomatıka, mehatronıka, ınjenerlik grafıka, kondıterlik is, elektr montajdaý jumystary, dánekerleý tehnologııalary, veb-tehnologııalar jáne bızneske arnalǵan IT-sheshimder, sán tehnologııalary sııaqty 30 quzyrettilik boıynsha óz daǵdylaryn kórsetpek.
Memleket basshysynyń tapsyrmasy boıynsha jumysshy mamandyqtary úshin kadr daıarlaý sapasyn arttyrýǵa erekshe kóńil bólinip otyr. 2024 jyly bıýdjet esebinen kolledjderge 142,5 myń stýdent qabyldandy – bul 2023 jylmen salystyrǵanda 1,5 esege kóp. Dýaldy bilim berý júıesi engizilip, onyń sheńberinde 496 kolledj jáne 7 myńnan astam kásiporynmen 75 myń stýdentti daıarlaý boıynsha kelisimsharttar jasaldy. 1 qyrkúıekten bastap kolledj stýdentteriniń shákiraqysy ótken jylmen salystyrǵanda 50%-ǵa artty. Sonymen qatar bıyldyń ózinde TjKB úshin 2 103 orynǵa arnalǵan 8 jataqhana salý jobasy iske asyrylýda.
Memleket basshysynyń Jumysshy mamandyqtary jyly boıynsha qoıǵan mindetterin iske asyrý sheńberinde ótken jarysta qatysýshylarmen áńgimelesý qorytyndysy boıynsha Premer-mınıstr oqý-aǵartý mınıstrine Astana qalasynyń ákimdigimen birlesip TjKB stýdentterin qoldaý jáne damytý úshin Ulttyq quzyretter ortalyǵyn qurýdy tapsyrdy. Ortalyq bıznes úshin dıalog alańy jáne kadrlardy daıarlaý júıesi rólin atqarady, sondaı-aq halyqaralyq kásibı sheberlik konkýrstaryna qatysý úshin jattyǵý bazasyna aınalady.
