Oljas Bektenov temirjol mashınasyn jasaý salasynyń álemdik kóshbasshylarymen kezdesti
ASTANA. KAZINFORM — Premer-mınıstr Oljas Bektenov amerıkalyq jáne frantsııalyq Alstom jáne Wabtec kompanııalarynyń basshylarymen Qazaqstanda temirjol mashınasyn jasaýdy odan ári lokalızatsııalaý josparlaryn talqylady. Bul týraly Úkimettiń baspasóz qyzmeti málim etti.
Oljas Bektenov Jahandyq ınvestıtsııa jónindegi qazaqstandyq dóńgelek ústel aıasynda iri halyqaralyq kompanııalardyń basshylarymen — temirjol mashınasyn jasaý salasynyń álemdik kóshbasshylarymen kezdesti.
«Afrıka, Taıaý Shyǵys jáne Ortalyq Azııa óńirleri boıynsha Alstom frantsýz kompanııasynyń prezıdenti Endrıý Deleonımen óndiristi odan ári lokalızatsııalaý jáne jańa ınvestıtsııalyq jobalardy iske qosý josparlary talqylandy», — delingen habarlamada.
Alstom — elimizdiń temirjol ındýstrııasynyń negizgi ınvestory. 10 jyl ishinde kompanııa qurylysqa, tehnologııalar transferti men qazaqstandyq mamandardy oqytýǵa shamamen €120 mln ınvestıtsııa saldy. 1 myńnan astam adam jumys ornymen qamtamasyz etildi. Astanada 7 óndiristik baza ashyldy, onyń ishinde jolaýshylar jáne aýyr júk elektrovozdaryn óndiretin «Elektrovoz qurastyrý zaýyty» bar.
«Frantsýz kompanııasy 450-den astam jańa jumys oryndaryn asha otyryp, elektrovozǵa tehnıkalyq qyzmet kórsetetin tórt ortalyqtyń qurylysyn bastady. Jobanyń jalpy somasy €50 mln-dy quraıdy, Shý qalasynda alǵashqy servıstik ortalyqtyń ashylýy 2025 jylǵa josparlanǵan», — dep habarlady Úkimetten.
Zaýyt Qazaqstan men TMD naryǵyn baǵyndyryp, óz ornyn sátimen ıelendi. Shyǵystan batysqa konteınerlik tasymaldyń artýyna baılanysty shyǵarylatyn ónimge suranys artty. Búgingi tańda óndiris kólemi boıynsha kásiporyn Qazaqstanda temirjol mashınasyn jasaý sektorynda shamamen 30%-dy alady.
Alstom basshysy Endrıý Deleonı Qazaqstannyń ınvestıtsııalyq saıasatyn qoldaıtynyn málimdep, elimizde bıznes úshin jasalyp jatqan jaǵdaılar óndiristik qýatty keńeıtýge yqpal etetinin atap ótti. Sondaı-aq Qazaqstanda ındýstrııalyq jáne kóliktik-logıstıkalyq áleýetin damytýǵa baǵyttalǵan yntymaqtastyqty keńeıtý keleshegine nazar aýdaryldy, onyń ishinde QTJ-men áriptestik máseleleri talqylandy.
Wabtec amerıkalyq kompanııasynyń prezıdenti Rafael Santanamen kezdesý barysynda temirjol salasyna «jasyl» tehnologııalardy engizý máseleleri qaraldy. Kompanııa Qazaqstannyń uzaqmerzimdi ınvestıtsııalyq seriktesi sanalady ári elimizde lokomotıvter óndirisin lokalızatsııalaýdy damytýda.
«Lokomotıv qurastyrý zaýyty» — Ortalyq Azııadaǵy temirjol kóligi mashınasyn jasaý salasyndaǵy kóshbasshy. Zaýyt ishki naryqtyń qajettilikterin qamtamasyz etip qana qoımaı, Ázerbaıjan, Tájikstan, Túrikmenstan, Qyrǵyzstan, Mońǵolııa jáne basqa da elderge eksporttalatyn júk, jolaýshylar jáne manevrlik lokomotıvter shyǵarady. Zaýytta 800-den astam jumys orny ashyldy. Qyzmetkerler AQSh-ta óndiristen qol úzbeı oqytylady, sodan keıin aımaqtyq jáne jahandyq jobalarǵa qatysady. Bıylǵy maýsym aıynda Astanada jańa ınjenerlik ortalyq ashyldy, onda balamaly energııa kózderinde «jasyl» lokomotıvter óndirý jumysy júrgizilýde. Jalpy, kompanııa 2027 jyldan bastap kelesi 10 jyl ishinde balamaly otyn túrlerin qoldana otyryp, jańa ónimderdi damytýǵa shamamen $200 mln ınvestıtsııa salýǵa nıetti.
«Memleket basshysy Sheteldik ınvestorlar keńesi otyrysynda sóılegen sózinde Qazaqstannyń negizgi Eýrazııalyq tranzıttik hab retinde eldik pozıtsııalardy nyǵaıtýǵa baǵyttalǵanyn atap kórsetti. Bizdiń elimizde kólik-logıstıkalyq sektordy damytýǵa, ınfraqurylymdy jańartýǵa jáne mashına jasaýdy lokalızatsııalaýǵa erekshe nazar aýdarylady. Biz óndiristi lokalızatsııalaýǵa baǵyttalǵan bıznes bastamalaryn joǵary baǵalaımyz jáne osyndaı kompanııalarǵa qoldaý kórsetýge daıynbyz. Mundaı jobalardy iske asyrý Qazaqstanǵa lokomotıvterdi óndirý jáne jańǵyrtý habyna aınalýǵa jáne jetkizýshilerdiń jahandyq tizbegine enýge múmkindik beredi», — dep atap ótti Oljas Bektenov.
Buǵan deıin habarlanǵandaı, Bektenov ShIK otyrysyna qatysýshylarmen ınvestıtsııalyq yntymaqtastyq máselelerin talqylady.
