Oljas Bektenov ShQO-daǵy sý tasqyny jaǵdaıyn tekserdi
ÓSKEMEN. KAZINFORM – Premer-Mınıstr, Sý tasqynyna qarsy is-sharalardy úılestirý jáne sý tasqynynyń saldaryn joıý jónindegi respýblıkalyq shtabtyń jetekshisi Oljas Bektenov sý basý qaýpine baılanysty TJ aldyn alý jumystary júrgizilip jatqan Shyǵys Qazaqstan oblysyna bardy. Bul týraly Úkimettiń baspasóz qyzmeti habarlady.
Úkimet basshysy oblystyń Glýbokoe jáne Altaı aýdandarynyń taýly aımaqtaryn tikushaqpen aralap, ózen alqaptaryndaǵy sý tasqyny qaýpi bar ýchaskelerdegi jaǵdaımen tanysty, sondaı-aq óńir ákiminiń sý tasqynyna qarsy is-sharalar týraly baıandamasyn tyńdady. Shyǵys Qazaqstan oblysy aýmaǵynyń basym bóliginde jaǵdaı turaqty. Sondaı-aq qystyń sońynda qar qalyń jaýǵan Marqakól, Katonqaraǵaı, Glýbokoe, Úlken Naryn jáne Altaı aýdandary – táýekel aımaǵynda. Ózenderdegi sý deńgeıi ázirge qaýipti mejege jetken joq – muzdyń erýi endi bastaldy, al taýly aımaqtardaǵy sý qoımalarynda muz qabatynyń juqarýy baıqalady. Alaıda boljam boıynsha, oblysta daýyldy eskertý jarııalanǵan, +19°C deıin kúnniń kúrt jylynýy kútilýde – sáýir aıynyń ortasyna qaraı aımaqta sý tasqyny qaýpi joǵarylaıdy.
Oljas Bektenovke sý tasqynynyń aldyn alý boıynsha qabyldanyp jatqan sharalar týraly baıandaldy.
«Qazir elimizdiń óńirlerinde, sonyń ishinde Shyǵys Qazaqstan oblysynda qalyptasqan jaǵdaı bizden úzdisiz baqylaýdy talap etedi. Oblys aýmaǵynyń 70%-yn qalyń qar basyp jatyr, al qar jamylǵysyndaǵy sý qory normadan 2 ese artyq. Bul qaýiptiń áli seıilmegenin kórsetedi. Memleket basshysy atap ótkendeı, sý tasqyny kezeńinde jaǵdaıdyń damý stsenarıılerin qalyptastyrý qajet. Qazir qoldaǵy boljamdardy eskere otyryp, sý tasqynynyń aldyn alý sharalaryn kúsheıtýimiz kerek. Úkimet tarapynan tıisti jumystardy júrgizýge barlyq qajetti kómek kórsetiletin bolady», — dep atap ótti Oljas Bektenov.
Óńirde joǵary daıyndyq rejımi, TJ joıý jónindegi oblystyq jedel shtab jumys isteıdi. Jaǵdaı ýshyǵyp ketse, 1 118 adamnan turatyn kúshtik qurylymdar, 315 birlik tehnıka jasaqtalyp, 6 myń tonnadan astam ınertti materıaldar, 468 tonna JJM, 43 myń birlik qapshyq daıyndaldy.
Premer-Mınıstr Óskemen jáne Buqtyrma GES-in de qarap shyqty. Barlyq gıdrotehnıkalyq qurylystar shtattyq rejımde jumys isteýde. Bógetterde sý deńgeıi aldyn-ala tómendetiledi. Óńirde Qazaqstandaǵy eń iri Buqtyrma sý qoımasy ornalasqan. Qazirgi ýaqytta ol taǵy 20 tekshe km kóleminde ózen sýyn qabyldaýǵa múmkindik beredi. Boljaldy málimetter boıynsha, aldaǵy 3 aıda 15 tekshe km-ge deıin sý keledi dep kútilýde.
Jumys saparynyń qorytyndysy boıynsha Úkimet basshysy Oljas Bektenov óńirdegi jaǵdaıdyń ýshyǵýyna jol bermeý úshin barlyq qajetti sharany qabyldaýdy tapsyrdy.
