Oljas Bektenov Semeıdegi apatty JEO-ny jańǵyrtý jumystaryn tekserdi
ASTANA. Kazinform - Úkimet basshysy Oljas Bektenov Abaı oblysyna jumys sapary barysynda Semeı qalasyndaǵy apatty JEO jańǵyrtý barysyn baqylap, ınjenerlik ınfraqurylymnyń jaı-kúıin jáne jylý berý kezeńine daıyndyǵyn tekserdi.
Premer-Mınıstrge energetıka salasyn jáne jalpy turǵyn úı-kommýnaldyq sharýashylyqty damytý jospary men qazirgi jaǵdaıy týraly baıandaldy. Abaı oblysy «qyzyl aımaqtaǵy» óńirlerdiń qataryna kiredi. Oblys boıynsha jylý jelileriniń tozý deńgeıi 64,2%-ǵa jetedi. Búgingi tańda 28 joba iske asyrý satysynda. 37,9 shaqyrym jeli men 17 jylý kózin salý, rekonstrýktsııalaý jáne jóndeý jumystary júrgizilip jatyr. Energetıka ınfraqurylymyn jańǵyrtýǵa 10,9 mlrd teńgeden astam qarjy bólindi. Oblys ákiminiń orynbasary Dımıtrıı Garıkov osy jyldyń qorytyndysy boıynsha júrgizilip jatqan jumystardyń nátıjesinde kommýnıkatsııalar tozýynyń 57,7%-ǵa deıin tómendeýi kútilip otyrǵanyn aıtty.
Oljas Bektenov JEO-1-de jóndeý jumystarynyń nátıjesimen tanysty. Atap aıtqanda, sý jylytý qazandyǵy men sorǵy tobynyń tórtinshi qazandyǵy jańǵyrtyldy. 90 jyldyq tarıhy bar jylý kózi «qyzyl aımaqtaǵy» obektilerdiń tizimine engizilgen, jáne qaladaǵy eń irisi bolyp sanalady. JEO-1 «Teplokommýnenergo» MKK quramyna kiredi. Sondaı-aq kásiporynǵa 70 myńnan astam abonentti jylýmen qamtamasyz etetin 76 jylý pýnkti men 21 qazandyq kiredi. Belsendi turǵyn úı qurylysyn jáne qoldanystaǵy jylý jelileriniń joǵary tozý deńgeıin eskere otyryp, jylý jáne elektr qýatynyń tapshylyǵy baıqalady.
Qazirgi tańda Semeı qalasynyń sol jáne oń jaǵalaýlary avtonomdy túrde jylýmen jabdyqtalǵan. JEO-1 sol jaǵalaý turǵyndaryn jylýmen qamtamasyz etedi, oń jaǵalaýda bul fýnktsııany 21 qazandyq atqarady.
Úkimet basshysy JEO-3 jáne onyń magıstraldyq jelilerin salý jobasynyń iske asyryla bastaǵanyn eske saldy. Jobany 2030 jylǵa deıin 3 kezeńde iske qosý josparlanǵan. Búgingi tańda tehnıkalyq-ekonomıkalyq negizdeme ázirlenýde. JEO-3 paıdalanýǵa berilgennen keıin qazandyqtar sorǵy-súzgi stansalary rejıminde jumys isteıtin bolady, ıaǵnı jylý energııasyn tikeleı úılerge jetkizedi. Sonymen qatar búgingi tańda oń jaǵalaýda saǵatyna 146,99 Gkal quraıtyn tapshylyq máselesi sheshilmek.
Bıyl 44 kóppáterli turǵyn úıdi, 1200 orynǵa arnalǵan mektepti jáne nefrologııalyq ortalyqty paıdalanýǵa berý josparlanyp otyrǵan Qaraǵaıly aýdanynyń qarqyndy qurylysyn eskere otyryp, Premer-Mınıstrge qýaty saǵatyna 21,5 Gkal quraıtyn blokty-modýldi qazandyq salý jobasy tanystyryldy. Quny shamamen 5,9 mlrd teńge bolatyn energetıka obektisin salý jumystary qurylys salýshynyń qarajaty esebinen bastaldy.
«Abaı oblysynda, onyń ishinde Semeı qalasynda jylýmen jabdyqtaý máselesi óte kúrdeli ekeni belgili. Injenerlik jelilerdiń tozýy men jergilikti JEO jaǵdaıy boıynsha óńir “qyzyl aımaqqa” jatady. Osy jyldyń sońyna deıin jylý kózderin sapaly jańǵyrtý jumystaryn júrgizý – Memleket basshysynyń tapsyrmasy. Bul másele Úkimettiń erekshe baqylaýynda», — dedi Oljas Bektenov.
Jylý jelilerin jańǵyrtý, apattyq jaǵdaılardyń aldyn alý, tozýdy azaıtý jáne ınfraqurylymnyń eksplýatatsııalyq sapasyn arttyrý boıynsha birqatar tapsyrma berildi. Energetıka, Qarjy mınıstrligine JEO-3 magıstraldyq jelileri qurylysyn qarjylandyrý tetigin pysyqtaý tapsyryldy.
