Oljas Bektenov «Samuryq-Qazyna» dırektorlar keńesi otyrysyn ótkizdi
ASTANA. KAZINFORM – Memleket basshysynyń ekonomıkanyń basym salalaryna iri ınvestıtsııalyq jobalardy engizý jónindegi tapsyrmalaryn júzege asyrý barysy týraly qor basqarma tóraǵasy Nurlan Jaqypovtyń baıandamasy tyńdaldy. Bul týraly Úkimettiń baspasóz qyzmeti habarlady.
Qordyń negizgi qarjylyq, óndiristik kórsetkishterine jáne satyp alý protsesin jetildirý boıynsha júrgizilip jatqan jumystarǵa nazar aýdaryldy.
«Samuryq-Qazyna» basshysy dırektorlar keńesine munaı-gaz, munaı hımııasy, energetıka, kólik-logıstıka, taý-ken jáne basqa da salalardaǵy ınvestıtsııalyq 46 jobany júzege asyrý týraly aıtty. Bıylǵy 4 aıda olar boıynsha qarjynyń ıgerilýi 98% boldy.
Osy jyly jalpy quny 355 mlrd teńgege jýyq 5 joba paıdalanýǵa berildi.
Aqtaý portynda konteınerlik hab iske qosyldy. Nysan temirjol quramdaryn qabyldaýǵa, júkterdi óńdeý jáne olardy teńiz kóligi arqyly ári qaraı jóneltýge qaýqarly. Kaspıı teńizi sý aımaǵyndaǵy eń iri konteınerlik hab júk tasymaldaý kólemin arttyryp, Qazaqstannyń halyqaralyq baǵyttardaǵy ustanymyn nyǵaıtýǵa múmkindik beredi.
Almatyda jobalyq qýaty 115 myń JFE (jıyrma fýttyq konteınerler) Zhetysu halyqaralyq logıstıkalyq termınaly paıdalanýǵa berildi. Sıan portymen (QHR) birlesip iske asyrylǵan joba Qazaqstannyń Qytaımen jáne Eýropa elderimen kólik baılanysyn nyǵaıtady.
Aqtaýdaǵy CASPI BITUM zaýytyn jańǵyrtý jumystary aıaqtal, qýattylyǵyn jylyna 750 myń tonnaǵa deıin, 50%-ǵa arttyrdy.
Almatyda 350 tósek-orynǵa arnalǵan ınfektsııalyq aýrýlardyń joǵary tehnologııalyq ǵylymı ortalyǵy salyndy.
Kendirlide sý tuşytý zaýytynyń qurylysy aıaqtalýǵa jaqyn, nysanda iske qosý-baptaý jumystary jáne jabdyqtardy jumysqa daıyndaý júrgizilýde.
Budan basqa, Jetisý oblysynda uzyndyǵy 302,4 km «Taldyqorǵan – Úsharal» magıstraldy gaz qubyrynyń jelilik bóliginiń qurylysy kesteden ozyp aıaqtalyp, polıetılen jáne «Beıneý – Bozoı – Shymkent» magıstraldy gaz qubyrynyń ekinshi jelisin óndirýge arnalǵan gaz bólý kesheniniń jobalary boıynsha erte qurylys jumystary bastaldy.
Premer-mınıstr Oljas Bektenov «Samuryq-Qazyna» basshylyǵy men jaýapty mınıstrlikterge ınvestıtsııalyq jobalardyń ýaqtyly iske asyrylýyn jáne otandyq taýar óndirýshilerdi qoldaý tetikterin odan ári jetildirýdi qamtamasyz etýdi tapsyrdy.
Aıta ketelik Oljas Bektenov Geo-Jade Petroleum basshysy Van Ventaomen «Sozaq» ken ornynda gaz óndirý jobasyn júzege asyrý barysyn talqylady.