Oljas Bektenov Roman Sklıardyń kólik-logıstıka ınfraqurylymyna qatysty esebin tyńdady
ASTANA. KAZINFORM — Premer-mınıstr Oljas Bektenov Memleket basshysynyń kólik-logıstıka salasyn damytý jónindegi mindetterin júzege asyrý boıynsha berilgen tapsyrmalardyń oryndalý barysy týraly tyńdady.
Premer-mınıstrdiń birinshi orynbasary Roman Sklıar ınfraqurylymdy jańǵyrtý jáne temirjol, teńiz, áýe jáne avtomobıl kólikterin damytý, sondaı-aq salany tsıfrlandyrý baǵytyndaǵy Prezıdent tapsyrmalaryn oryndaý jónindegi is-sharalar josparyn tanystyrdy.
Budan bólek, Roman Sklıar Qytaımen shekaradaǵy «Nur Joly» ótkizý pýnktine jasaǵan jumys saparynyń qorytyndysyn baıandady. Onda ótkizý múmkindigin arttyrý, logıstıkalyq ınfraqurylymdy jaqsartý, kedendik rásimderdi tsıfrlyq tehnologııalar arqyly jedeldetý baǵytyndaǵy jumystardy júzege asyrý barysy qaraldy. Atap aıtqanda, osy jyldyń sońyna deıin «Nur Joly» ótkizý pýnktinde iri júkterge arnalǵan aınalma jol qurylysy aıaqtalady. Bul júk aǵynyn arttyryp, qyzmet sapasyn jaqsartady jáne Qazaqstan men Qytaı arasyndaǵy saýda-ekonomıkalyq baılanystarǵa jańa serpin bermek. Búginde qytaılyq tarappen ótkizý pýnktteriniń táýlik boıy jumys isteý múmkindigi jáne avtokólik quraldaryn qabyldaý kólemin ulǵaıtý máseleleri pysyqtalyp jatyr.
Temirjol salasynda 2025 jylǵy jeltoqsanǵa deıin «Dostyq – Moıynty» ýchaskesinde ekinshi joldar jáne Almaty stansasynyń aınalma temirjol jelisi qurylysyn aıaqtaý josparlanǵan.
Teńiz kóligi salasynda konteınerlerdi óńdeý qýatyn jylyna 240 myń JFE (jıyrma fýttyq konteıner) deńgeıine deıin jetkizý kózdelgen. Bul maqsatta osy jyldyń jeltoqsanynda jańa termınal iske qosylady. Joba Transkaspıı halyqaralyq kólik baǵdarynyń tranzıttik áleýetin arttyrýǵa múmkindik beredi.
Avtomobıl kóligi salasy boıynsha Qazaqstannyń Qytaı, Ózbekstan jáne Túrikmenstanmen shekaradaǵy 5 avtomobıldik kedendik beketti: Temir baba, Qazyǵurt, Tájen, Maıqapshaǵaı jáne Baqty jańǵyrtý jumystary jyl sońyna deıin aıaqtalady. Sonymen qatar kólik quraldary men júkterdiń elimizdiń aýmaǵyna kirgen sátinen bastap, baǵyt boıyndaǵy qozǵalysy men shyǵýyna deıingi aralyqty baqylaýǵa múmkindik beretin ıntellektýaldy beınabaqylaý júıeleri kezeń-kezeńimen engizilýde.
Áýe kóligi salasynda 2025 jylǵy jeltoqsanǵa deıin elimizdegi barlyq áýejaıda «e-Freight» aqparattyq júıesi engizilip, ol «KEDEN» jáne «Agriculture» júıelerimen tolyq ıntegratsııalanady. Bul qaǵazsyz qujat aınalymyna tolyq kóshýdi qamtamasyz etedi.
Keńes qorytyndysy boıynsha Premer-mınıstr Qazaqstannyń tranzıttik-kóliktik áleýetin kúsheıtýge baǵyttalǵan barlyq jobalardyń ýaqtyly iske asyrylýyn baqylaýda ustaýdy tapsyrdy.
Aıta keteıik, Qazaqstan men Grekııa kólik jáne logıstıka salalary boıynsha yntymaqtastyqty nyǵaıtady.