Oljas Bektenov Petropavldaǵy agroónerkásip oryndaryn aralady
PETROPAVL. KAZINFORM – Premer-Mınıstr Oljas Bektenov Soltústik Qazaqstan oblysyna jumys sapary aıasynda agroónerkásiptik keshen kásiporyndaryna baryp, elimizdiń azyq-túlik qaýipsizdigin qamtamasyz etý úshin qazaqstandyq óndiristi odan ári ulǵaıtý áleýetimen tanysty.
«Qyzyljar Sút» JShS zamanaýı sút kesheninde Oljas Bektenov «aqyldy ferma» jumysynyń tehnologııalyq protsesin qarap shyqty. Ótken jyldyń qorytyndysy boıynsha sút kesheni 6 myń tonnadan astam sút óndirdi. Kelesi nysan sútti qaıta óńdeý salasyndaǵy otandyq jetekshi kásiporyndardyń biri «Maslo-Del Petropavlovsk» JShS boldy. Ol 20 jyldan astam ýaqyt boıy tabysty jumys istep keledi. Ótken jyly 104,8 myń tonna daıyn sút ónimi nemese elimizdegi jalpy kólemniń 11,5%-y óndirildi. «AVAGRO» JShS kásipornynda Premer-Mınıstr aýyl sharýashylyǵy tehnıkasyn shyǵarý protsesimen tanysty, bul ásirese kóktemgi egis jumystarynyń bastalýy qarsańynda ózekti.
Kásiporynda tirkemeler, ózdiginen júretin búrikkish tehnıka, syıymdylyqtar, tasymaldaý bloktary jáne t.b. ónimderdiń keń jelisin óndirý jolǵa qoıylǵan. Saladaǵy óndiris kólemi 5 jyl ishinde zattaı mánde 304%-ǵa, 2019 jyly 4,2 myńnan 2023 jyly 17,2 myń birlikke deıin ósti. Bul rette jergilikti qamtý úlesi 70%-ǵa deıin jetkizildi. Kásiporyn ónimderin kórip shyqqan Premer-Mınıstr salalyq mınıstrlikterge atalǵan jumystardy jedeldetýdi, ıaǵnı tehnıkany jańartýdy qajet etetin eginshilerdi otandyq óndirýshimen baılanystyrýdy tapsyrdy. Oǵan qosa mınıstrlikter, ákimdikter jáne «Báıterek» holdıngi kásipkerlerge arnaıy baǵdarlamalar aıasynda memlekettik qoldaý sharalaryn qoldanýǵa járdemdesýge tıis.
Memleket basshysynyń tapsyrmasy boıynsha qarsy mindettemelerdi qoldana otyryp, tek qana otandyq óndiristegi aýyl sharýashylyǵy tehnıkasynyń jeńildetilgen lızıngine 450 mlrd teńge bólý josparlanyp otyr.
«Azyq-túlik qaýipsizdigi máselesin sheshýmen myqtap aınalysý qajet. Memleket basshysy óziniń Qazaqstan halqyna Joldaýynda AÓK óniminiń úlesin 70%-ǵa deıin jetkize otyryp, tereń óńdeýdi damytý qajettigin atap ótti. Tabysty otandyq bıznes – bul, eń aldymen, sórelerdegi qazaqstandyq ónimder jáne jumys oryndary. Búginde ishki naryqta ımporttalǵan sút ónimderi bar. Alaıda bizdiń zaýyttar qajetti nárseniń bárin ózderi óndire alady, bul úshin múmkindikter bar», - dedi Oljas Bektenov.
AÓK obektilerin aralaý kezinde Premer-Mınıstrge kóktemgi egis jumystary, atap aıtqanda, paıdasy joǵary maıly jáne jem-shóp alqaptaryn ulǵaıtýǵa basa nazar aýdara otyryp, aýyl sharýashylyǵy daqyldarynyń egistikterin ártaraptandyrý týraly baıandaldy.
Aıta keteıik, Premer-Mınıstr Oljas Bektenov Memleket basshysy Qasym-Jomart Toqaevtyń tapsyrmalarynyń oryndalý barysymen tanysý úshin Soltústik Qazaqstan oblysyna jumys saparymen barǵan bolatyn.
