Oljas Bektenov ózi týraly qańqý sózderge pikir bildirdi

ASTANA. KAZINFORM — Premer-mınıstr Oljas Bektenov Úkimette ótken baspasóz máslıhatynda óziniń Ulttyq qaýipsizdik komıtetin basqarýy múmkin degen sybystarǵa pikir bildirdi.

— Aktıvterdi qaıtarý jóninde tek Antıkor ǵana aıtatyn edi. Biraq ol organ nege ekeni belgisiz Ulttyq qaýipsizdik komıtetine berildi. Aktıvterdiń qalaı qaıtarylyp jatqany týraly nege aqparat joq? Ashat Jumaǵalı qaıda? Qazir UQK kúsheıip jatyr degen ras pa jáne sizdiń tájirıbeli kúshtik qurylym ókili retinde bul vedomstvony basqaratynyńyz jaıly áńgimeler tarap jatyr. Bul qanshalyqty shyndyqqa janasady, — dep suraq qoıdy jýrnalıst.

Óz jaýabynda Oljas Bektenov ózine qatysty áńgimelerdiń qańqý sóz ekenin aıtty.

— Ashat Jumaǵalı (Antıkordyń burynǵy basshysy) týraly eshteńe bilmeımin, qazir, qaıta uıymdastyrý protsedýralary júrip jatyr. Sol isterdi tapsyrýmen aınalysyp jatqan bolar. Al ózime qatysty aıtylyp jatqan áńgimelerdiń bári — tek qańqý sóz. Qazir Úkimette jumys istep jatyrmyz. Eger Memleket basshysynyń senimi bolsa, Úkimettegi jumysymdy jalǵastyra beremin, — dedi Oljas Bektenov.

Buǵan deıin Bektenov ózi jetekshilik etetin «Aktıvterdi qaıtarý komıssııasynyń jumysy nege kórinbeıdi?» degen suraqqa jaýap bergen edi. 

Sonymen birge, Premer-Mınıstr 2022 jylǵy Qańtar oqıǵasy týraly tilshiler suraǵyna jaýap berdi.