Oljas Bektenov Ortalyq Azııa elderi delegatsııalary basshylarymen Araldy qutqarý qorynyń basym mindetterin talqylady
ASTANA. KAZINFORM – Memleket basshysynyń tapsyrmasy boıynsha Premer-Mınıstr Oljas Bektenov Qazaqstan Respýblıkasynyń tóraǵalyǵymen ótkiziletin Halyqaralyq Araldy qutqarý qory basqarmasynyń birinshi otyrysyna qatysýshy elder delegatsııalary basshylarymen kezdesý ótkizdi. Bul týraly Úkimettiń baspasóz qyzmeti habarlady.
Kezdesý barysynda transshekaralyq sý resýrstaryn birlesip paıdalaný máseleleri, sondaı-aq Aral teńizi basseınindegi ekologııalyq jáne áleýmettik-ekonomıkalyq máselelerdi odan ári sheshý sharalary qaraldy.
Qazaqstan 2024-2026 jyldar aralyǵynda Halyqaralyq Araldy qutqarý qorynyń tóraǵasy bolyp sanalady.
«Búginde memleketterimizdiń basshylary sý salasyna erekshe kóńil bólip otyr. Qazaqstan Prezıdenti Qasym-Jomart Toqaev Araldy qutqarý uzaqmerzimdi halyqaralyq yntymaqtastyqtyń basym baǵytyna aınalýy tıis ekenin basa aıtty. Qordyń basty mindeti – Ortalyq Azııanyń sý-energetıkalyq resýrstaryn qorǵaý, olardyń áleýmettik-ekonomıkalyq, energetıkalyq, ırrıgatsııalyq jáne ekologııalyq mańyzdylyǵyn eskere otyryp, olardy keshendi ári utymdy paıdalaný. Ortaq kúsh-jigerimizdiń arqasynda elderimiz úshin mańyzdy sanalatyn biregeı sý aıdynynyń jaǵdaıyn sapaly túrde jaqsarta alamyz dep úmittenemin», — dep atap ótti Oljas Bektenov.
Qabyldanyp jatqan sharalarǵa qaramastan, Aral teńizi basseınindegi sý resýrstarynyń, onyń ishinde klımattyń ózgerýine baılanysty ósip kele jatqan tapshylyǵyn eskere otyryp, HAQQ aldynda múddeli memleketterdiń shoǵyrlanýyn kúsheıtý mindeti tur.
QR Premer-Mınıstr Oljas Bektenov óńirlik yntymaqtastyq ınstıtýtynyń mańyzdy róline toqtalyp, HAQQ múshe memleketteri basshylary Qazaqstannyń tóraǵalyq etý kezeńinde Qordyń aldyna qoıǵan basym mindetterin atap ótti.
Barlyq taraptyń múddesin eskere otyryp, Ortalyq Azııadaǵy sý-energetıkalyq yntymaqtastyqtyń keshendi jáne ózara tıimdi tetigin odan ári pysyqtaý qajettigi atap ótildi. Atap aıtqanda, jańa tsıfrlyq tehnologııalardy engizý, jerdi qashyqtan zondtaýdyń spýtnıktik derekterin paıdalaný – yntymaqtastyqty nyǵaıtýǵa jáne sý resýrstarynyń edáýir kólemin únemdeýge múmkindik beredi.
Budan basqa, energetıkalyq jáne ırrıgatsııalyq protsesterdi retteýdiń tıimdiligin arttyrý maqsatynda óńir elderiniń Aral teńizi basseıninde sý resýrstaryn esepke alýdyń, monıtorıng júrgizýdiń, basqarýdyń jáne bólýdiń biryńǵaı avtomattandyrylǵan júıesin ázirleý ári engizý jónindegi jumys jandanatyn bolady. Bul sharalar memleketterdiń qajettiligin jabýdaǵy tepe-teńdikke qol jetkizýge jáne kúzgi-qysqy kezeńde elektr energııasynyń, jazǵy kezeńde sýarmaly sýdyń tapshylyǵyna jol bermeýge baǵyttalǵan.
Sondaı-aq basym mindetter qatarynda – HAQQ uıymdyq qurylymyn jáne sharttyq-quqyqtyq bazasyn jetildirý protsesin aıaqtaý tur. Búgingi tańda sarapshylardyń jumys toby tıisti jumys júrgizýde.
Kezdesý barysynda Tájikstan Premer-Mınıstriniń orynbasary Zıezoda Sýlaımon, Túrikmenstan Mınıstrler Kabıneti Tóraǵasynyń orynbasary Tangrygýlı Atahallyev, Ózbekstan Prezıdentiniń Keńesshisi Shýhrat Ganıev usynystaryn aıtty.
Talqylaý qorytyndysy boıynsha Oljas Bektenov óńirdiń ekojúıesin jaqsartý jónindegi jalpy iske qosqan úlesi úshin delegatsııa basshylaryna alǵysyn bildirip, Qazaqstan Úkimetiniń birlesken josparlardy iske asyrý úshin syndarly dıalogqa múddeli ekenin atap ótti.
Anyqtama:
Halyqaralyq Araldy qutqarý qoryn 1993 jyly Ortalyq Azııanyń bes memleketi – Qazaqstan, Qyrǵyzstan, Ózbekstan, Tájikstan jáne Túrikmenstan qurdy. Uıymdy qurýdaǵy maqsat Araldyń qurǵaýynyń qorshaǵan tabıǵı ortaǵa jáne óńir halqyna teris áserin azaıtý jónindegi elderdiń kúsh-jigerin biriktirý boldy. Qor birlesken memleketaralyq ekologııalyq jáne ǵylymı-praktıkalyq baǵdarlamalar men jobalardy iske asyrady.
