Oljas Bektenov Qostanaı oblysynda Prezıdent tapsyrmalarynyń oryndalýyn tekserdi

ASTANA. KAZINFORM – QR Premer-mınıstri Oljas Bektenov jumys saparymen Qostanaı oblysyna bardy. Negizgi mindet – Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty halqyqqa Joldaýynda berilgen tapsyrmalarynyń iske asyrylý barysyn baqylaý.

Agroónerkásip keshenindegi birqatar kásiporynnyń jumysyn kórgen Premer-mınıstr óńirdegi aýyl sharýashylyǵynyń damýy, tereńdete qaıta óńdeýmen jáne otandyq taýar óndirýshilerdi qoldaý sharalarynyń nátıjelerimen tanysty.

Bıyl óńirde aýyl sharýashylyǵy salasyn damytýǵa shamamen 175 mlrd teńge qarjy baǵyttaldy, bul ótken jylǵy kórsetkishten 1,7 ese asyp tústi. Qostanaı oblysy ákiminiń orynbasary Arman Ábenov 2027 jylǵa deıin AÓK-te 2 myńnan astam jumys ornyn ashatyn 96 ınvestıtsııalyq jobany iske asyrý josparlanyp otyrǵanyn baıandady. Investıtsııanyń jalpy kólemi 232 mlrd teńgeni quraıdy. Sonymen qatar mal sharýashylyǵyn damytý maqsatynda 6 taýarly-sút fermasyn salý jumystary júrgizilýde, onyń bireýi paıdalanýǵa berildi. Qus sharýashylyǵynda jalpy quny 60 mlrd teńgeni quraıtyn 2 iri qus fabrıkasyn iske qosý josparlanǵan, nátıjesinde qus etin óndirý jylyna 62,5 myń tonnaǵa artady dep kútilýde.

Premer-mınıstrge «Arýana-2010» JShS un óndirý kásiporny aýmaǵynda ishki jáne syrtqy naryqqa jetkizý kólemin ulǵaıtýǵa baǵyttalǵan quny 3 mlrd teńge bolatyn dıirmen keshenin salý jónindegi joba tanystyryldy. Búginde kásiporyn jylyna 90 myń tonnaǵa deıin ónim shyǵarýdy qamtamasyz etedi. Keshendi keńeıtý un óndirisi kólemin 2 esege jýyq – 170 myń tonnaǵa deıin arttyrýǵa múmkindik beredi. Qosymsha 150-den astam jańa jumys orny ashylady.

Oljas Bektenov Memleket basshysynyń bul kórsetkishti 70%-ǵa jetkizý jónindegi tapsyrmasyna sáıkes, básekege qabiletti aýyl sharýashylyǵy ónimderin shyǵarýdy ulǵaıtý jáne óńdeýdi tereńdetý jumystarynyń qarqynyn arttyrý qajettigin basa aıtty. Búgingi tańda Qazaqstan álemdegi bıdaı men un boıynsha eń iri eksporttaýshy 10 eldiń qataryna kiredi. Oblys ákimdigine «Arýana-2010» kásipornyna daıyn ónimdi ótkizý naryqtarynyń geografııasyn ulǵaıtýǵa kómektesý, sondaı-aq eksporttyq baǵyttardy keńeıte otyryp, logıstıkany jetildirý máselesin pysyqtaý tapsyryldy.

Tamaq ónerkásibi kásiporyndaryn aralaǵan Premer-mınıstr otandyq taýar óndirýshilerdi memlekettik qoldaý sharalarynyń iske asyrylý barysymen tanysty.

Premer-mınıstrge kondıterlik ónimderdiń iri óndirýshileriniń biri – «Baıan Sulý» AQ-ny jańǵyrtý jospary týraly baıandaldy. Búginde zaýyt jylyna 85 myń tonnaǵa deıin ónim shyǵarady. Onyń qatarynda vaflı, zefır, marmelad, ırıs, karamel sııaqty 300-den astam ónim túri bar. Jalpy quny 14 mlrd teńgeden asatyn jańa «Kondıterlik Astana» kesheni jylyna qosymsha 13 myń tonna ónim óndirýge jáne 260 jańa jumys orny ashýǵa múmkindik beredi.

Oljas Bektenov otandyq brendterdi shetelde, onyń ishinde tsıfrlyq sheshimder arqyly ilgeriletýdi kúsheıtý qajettigin atap ótti. Qazirgi tańda «Baıan Sulý» ónimderi sheteldik TMD men Eýropa naryqtaryna eksporttalady.

«MILH» JShS sút zaýytyn aralaý barysynda Premer-mınıstr óndiristiń tehnologııalyq erekshelikterimen tanysty. Kásiporyn jylyna 60 myń tonnaǵa deıin daıyn ónim shyǵarady. Quny 7,2 mlrd teńgeni quraıtyn jáne qýaty 10 myń tonnaǵa deıin jetetin irimshik óndiretin jańa tsehtyń iske qosylýy álemdik irimshik brendteri sapasyna sáıkes keletin 20-ǵa deıin ónim túrin shyǵarýǵa múmkindik beredi.

Oljas Bektenov Prezıdenttiń tapsyrmasyna sáıkes, Úkimet aýyl sharýashylyǵy sektoryn qoldaý jónindegi, onyń ishinde sharýalarǵa nesıe berý men sýbsıdııalaý baǵytyndaǵy jańa jobalardy qarjylandyrý arqyly keshendi sharalardy iske asyryp jatqanyn atap ótti.

«AgromashHoldıng KZ» kásiporny bazasynda Premer-mınıstrge óńdeý ónerkásibinde lokalızatsııalaýdy tereńdetý jumysttarynyń nátıjesi kórsetildi. Qazaqstandaǵy eń iri aýyl sharýashylyǵy tehnıkasyn óndirýshi kásiporyn jylyna 1 myńǵa deıin kombaın, 3 myń traktor, 300 tuqym sepkish jáne 200 jınaýshy platforma shyǵarady. Kompanııa CLAAS, Gomselmash, Sankt-Peterbýrg traktor zaýyty, Lovol, AMAZONE sııaqty álemdik jetekshi óndirýshilermen, sondaı-aq qazaqstandyq mashına jasaý zaýyttarymen yntymaqtasady.

Oljas Bektenov kásiporyndy aralaý barysynda otandyq taýar óndirýshini qoldaý maqsatynda aýyl sharýashylyǵy tehnıkasy óndirisin lokalızatsııalaýdy arttyrý qajettigine aıryqsha nazar aýdardy. Bul agroónerkásiptik parkti jańartý úshin qajet.

«Úkimet óńdeý ónerkásibinde lokalızatsııany tereńdetýge erekshe kóńil bólip, basty mindeti otandyq taýar óndirýshilerdi qoldaý sanalatyn ekonomıkalyq patrıotızm qaǵıdatyn berik ustanady. Osy maqsatta Úkimet aýyl sharýashylyǵy tehnıkasyn sýbsıdııalaý qaǵıdalaryna tıisti ózgerister engizdi. Osylaısha, otandyq óndiris qural-jabdyqtaryn satyp alý kezinde syıaqy mólsherlemesi 6%-ǵa deıin sýbsıdııalanady. Bul rette Qazaqstanda óndiriletin tehnıkanyń ımporttyq analogtaryn sýbsıdııalaý múmkindigi alynyp tastaldy. Sonymen qatar otandyq aýyl sharýashylyǵy mashına jasaý kásiporyndarynyń óndiris kólemin ulǵaıtyp qana qoımaı, ozyq ázirlemeler men naryq suranystaryna sáıkes, sapany jaqsarta otyryp, tehnıkalyq jabdyqtardy jańǵyrtý úderisterin jalǵastyrýy qajet», – dep atap ótti Oljas Bektenov.

2024 jyly bastalǵan jeńildikti lızıng baǵdarlamasyna Úkimet 100 mlrd teńgeden astam qarjy bóldi. Bir jyl ishinde sharýalar 22 myń dana zamanaýı tehnıka satyp aldy, bul agroónerkásip parkin jańartýdyń 5,5%-yn qurady.