Oljas Bektenov geologııalyq barlaý men jer qoınaýyn paıdalanýdy damytý jóninde keńes ótkizdi

QONAEV.KAZINFORM - Premer-mınıstr Oljas Bektenov Memleket basshysynyń «Ádiletti Qazaqstannyń ekonomıkalyq baǵdary» atty halyqqa Joldaýynda jáne bıyl qańtarda Úkimettiń keńeıtilgen otyrysynda qoıylǵan mindetterdi iske asyrý sheńberinde geologııa men jer qoınaýyn paıdalanýdy damytý máseleleri jóninde keńes ótkizdi. Bul týraly Úkimettiń baspasóz qyzmeti habarlady.

Keńeste Ónerkásip jáne qurylys mınıstrliginiń geologııalyq-geofızıkalyq zerdeleý alańyn keńeıtý, salaǵa ınvestıtsııalar tartý, jańa perspektıvaly jobalardy iske asyrý jónindegi tásilderi qaraldy. Sondaı-aq «Samuryq-Qazyna» UÁQ AQ jáne «Taý-Ken Samuryq» AQ basshylyǵy da qatysty.

2026 jylǵa qaraı geologııalyq-geofızıkalyq zertteý alańyn 2,2 mln km2-ge deıin ulǵaıtý boıynsha júrgizilip jatqan jumystarǵa nazar aýdaryldy. Ónerkásip jáne qurylys mınıstri Ersaıyn Naǵaspaev búginde jer qoınaýyn memlekettik geologııalyq zertteý 1:200 000 masshtabta júrgizilip jatqanyn baıandady. Perspektıvaly jobalarda 1:25 000 masshtabty engizý josparlanýda, bul áleýetti ken oryndaryn anyqtaýǵa, sondaı-aq salanyń ınvestıtsııalyq tartymdylyǵyn arttyrýǵa jáne egjeı-tegjeıli kartaǵa túsirýge múmkindik beredi.

Úkimet otyrysynda (2024 jylǵy 3 jeltoqsanda) jer asty ulttyq baılyqty zertteýge, memlekettik kompanııalardy tartýǵa qatysty buryn qoıylǵan mindetter sheńberinde vedomstvo «Taý-Ken Samuryq» ulttyq taý-ken kompanııasymen ózara is-qımyldy kúsheıtti. Birinshi kezeńde mınıstrlik perspektıvaly ýchaskelerdi anyqtaı otyryp, geologııalyq barlaý júrgizedi. Budan ári ulttyq kompanııa ınvestıtsııa aldyndaǵy daıyndyqty (aldyn ala barlaý, tehnologııalardy irikteý, TEN ázirleý) bastaıdy, sodan keıin derbes nemese seriktestermen birlesip ıgerýge kirisedi. Osy protseske kirmegen ýchaskeler aýktsıondarǵa beriledi.

Atalǵan tetik boıynsha elimizde Qaratas (mys), Josabaı (altyn), Soltústik Qatpar, Joǵarǵy Qaıraqty (volfram) ken oryndarynda pılottyq jobalar iske asyrylyp jatyr. Kelesi joba ótken jyly Qaraǵandy oblysynda ashylǵan jáne jartylaı ótkizgishter men qýatty magnıtter óndirisinde paıdalanylatyn jerde sırek kezdesetin metaldardyń qomaqty qorlary bar Kúırektikól ken ornyn qarastyrady.

Jobany iske asyrý ekonomıkanyń aralas joǵary tehnologııalyq salalaryn damytýǵa da yqpal etedi. 2024 jyly Qazaqstanda barlyǵy 38 perspektıvaly QPQ (qatty paıdaly qazbalar) alańy anyqtaldy. Budan bólek, geologııalyq barlaýǵa ınvestıtsııalar tartý máseleleri qaraldy. Sońǵy 6 jylda QPQ barlaýǵa jeke ınvestorlar salymdarynyń kólemi úsh esege ósip, 2024 jyly 100 mlrd teńge boldy. Sonymen qatar geologııalyq barlaýǵa memlekettik ınvestıtsııalar jetkiliksiz deńgeıde.

Premer-mınıstr ınvestıtsııalardy tartý, tıisti ınfraqurylymdy damytý jáne jer qoınaýyn zertteýde jańa ǵylymı tásilderdi engizý jónindegi aldaǵy jumystarǵa basa nazar aýdardy. Tıisti mınıstrlikke jáne «Samuryq-Qazyna» UÁQ-ǵa eldiń mıneraldy-shıkizat bazasyn keshendi damytýǵa baǵyttalǵan tsıkl qurý jónindegi birlesken sharalardy kúsheıtý tapsyryldy.

Qarjy mınıstrligine geologııalyq barlaýdy memlekettik qarjylandyrýdy ulǵaıtý úshin qarajat izdeý jóninde tapsyrma berildi.

Aıta keteıik, 5 jylda geologııalyq barlaý jumystaryna 12 mlrd teńge shetel ınvestıtsııasy tartyldy.