Oljas Bektenov: Almaty mektepteriniń shamadan tys tolýy – asa ótkir másele
ALMATY. KAZINFORM – Premer-Mınıstr Oljas Bektenov Almatyǵa jumys sapary barysynda oqýshylar men stýdentterdiń bilim alýyna jaǵdaı jasaý jumystarynyń barysymen tanysty. Bul týraly Úkimettiń baspasóz qyzmeti habarlady.
Memleket basshysy Qasym-Jomart Toqaevtyń Qazaqstandaǵy oqýshy ornynyń tapshylyǵy máselesin sheshý boıynsha alǵa qoıǵan mindetterin oryndaý aıasynda «Jaıly mektep» ulttyq jobasy iske asyrylyp jatyr. Bilikti kadrlar daıarlaý úshin joǵary oqý oryndary jańartylyp jatyr. Oljas Bektenov «Jaıly mektep» ulttyq jobasy aıasynda salynǵan №97 mektep-gımnazııasynda boldy. Ǵımarat burynǵy apatty jaǵdaıdaǵy mekteptiń ornyna turǵyzylǵan.
Ulttyq joba aıasynda salynǵan alǵashqy mektep jańa oqý jylynyń basynda paıdalanýǵa berilmek. Búginde nysan 95%-ǵa daıyn, onda árleý jáne aýmaqty abattandyrý jumystary júrgizilip jatyr. Mektepte 945 oqýshy bilim alatyn bolady. Erekshe bilim berý qajettilikteri bar balalar úshin ınklıýzıvti orta quryldy. Barlyq oqýshynyń ózindik qajettilikterin eskere otyryp, zamanaýı tehnologııalar engizý arqyly bilim sapasy artady, shyǵarmashylyq áleýetti damytý maqsatynda materıaldyq-tehnıkalyq baza jaqsartylady. Elimizde «Jaıly mektep» ulttyq jobasy aıasynda qosymsha 700 myńnan astam oqýshy orny qoljetimdi bolady.
Úkimet basshysyna mektep ǵımaratynyń qurylysy merziminen buryn júzege asyrylǵany týraly baıandaldy. Ol úshin qurylys-montajdaý jumystarynyń eki aýysymdyq kestesi uıymdastyryldy. Barlyq kezeńde orta eseppen 250 adam turaqty túrde jumys istedi. Búginde negizgi jumystar aıaqtalyp, tehnologııalyq jabdyqtarmen jaraqtandyrý júrip jatyr. Oljas Bektenov qurylys jumystarynyń sapasyn baqylaýdyń mańyzdy ekenin basa aıtty.
«Almaty mektepteriniń shamadan tys tolýy – asa ótkir másele, sondyqtan qurylysty merziminen buryn aıaqtaý qajet. Bul rette aldymen sapaǵa basymdyq berilýi kerek. Balalarǵa arnalǵan ınfraqurylym qaýipsizdiktiń barlyq talapqa saı bolýy kerek, tehnologııalyq jaraqtandyrylyp, balalarymyzdyń qolaıly jaǵdaıda bilim alýyna múmkindik berýi tıis», — dep atap ótti Premer-Mınıstr.
Úkimet basshysy Halyqaralyq bilim berý korporatsııasyn aralaý barysynda naqty kásiporyndarmen yntymaqtastyq ornatý máselesine basa nazar aýdardy. Jas ǵylymı toptarmen ózara is-qımyl sharalary jáne olardyń eńbekteriniń nátıjelerin qala men el úshin mańyzdy salalarda qoldaný múmkindikteri talqylandy.
Biryńǵaı oqý-ǵylymı-óndiristik keshen – Halyqaralyq bilim berý korporatsııasynyń (HBK) baǵdarlamalary boıynsha búginde 14 myńnan astam azamat bilim alýda. Korporatsııa quramyna QazBSQA jáne QAÝ joǵary oqý oryndary, QazBSQA kolledji men Almaty Digital College, sondaı-aq QazBSQA jáne QAÝ mektepteri kiredi. Korporatsııa oqý ortalyqtaryn ashý, oqý aýdıtorııalaryn jabdyqtaý jáne brendteý jónindegi jobalarǵa belsendi qatysatyn 250-den astam otandyq jáne halyqaralyq jumys berýshi kompanııalarmen yntymaqtastyq júrgizedi. Bul túlekterge jumysqa ornalasý kezinde kásiporyn talap etetin daǵdylarǵa ıe bolýyna múmkindik beredi.
Munda bas oqý korpýsyn tolyq rekonstrýktsııalaý nátıjeleri de qaraldy. Premer-Mınıstrge 480 orynǵa arnalǵan jańa zamanaýı QazBSQA mektebiniń iske qosylýy, sondaı-aq 2025 jyly paıdalanýǵa beriletin, 345 tósek-orynǵa arnalǵan jataqhana qurylysynyń jospary (2025 jyldyń sońyna deıin barlyǵy 12 myń tósek-oryn, al 2030 jyldyń sońyna deıin taǵy 20 myń tósek-oryn paıdalanýǵa berý josparlanǵan) týraly baıandaldy.
Sonymen qatar seısmıkalyq jaǵdaılar, qala zertteýleri men dızaın zerthanalary tekserildi. Úkimet basshysy bıznestiń naqty mindetterin sheshýge baǵyttalǵan jáne kommertsııalandyrý áleýeti bar qoldanbaly jobalardy qoldaýǵa jáne qarjylandyrýǵa basa kóńil bóle otyryp, Joǵary ǵylymı-tehnıkalyq komıssııanyń jumysyn qaıta formattaý qajettigine nazar aýdardy.
Zertteýler jáne ázirlemelerdi baǵdarlamalyq-nysanaly qarjylandyrý boıynsha 2024-2026 jyldarǵa arnalǵan 181 ǵylymı-tehnıkalyq tapsyrma ázirlendi. Aldaǵy 2 jylda jas ǵalymdarǵa arnalǵan granttarǵa respýblıkalyq bıýdjetten 18 mlrd teńge bólinetin bolady. Sonymen qatar eńbek naryǵynda túlekterdiń básekege qabilettiligin arttyrý maqsatynda kadrlar daıarlaý baǵdarlamalaryn jetildirý boıynsha tapsyrmalar berildi.
