Oljas Bektenov Aqtóbe oblysyndaǵy sý tasqyny jaǵdaıyn tekserdi
AQTÓBE. KAZINFORM – Qazaqstan Premer-Mınıstri, Sý tasqynyna qarsy is-sharalardy úılestirý jáne sý tasqyny zardaptaryn joıý jónindegi respýblıkalyq shtabtyń basshysy Oljas Bektenov Aqtóbe oblysyndaǵy sý tasqynyna baılanysty jaǵdaıdy tekserip, Memleket basshysynyń tapsyrmalarynyń jergilikti jerlerde oryndalý barysymen tanysty.
Atap aıtqanda, Úkimet basshysy birqatar sý qoımasyn tikushaqpen aralap, sý tasqynynan zardap shekken úılerge bardy, sondaı-aq ahýaldyq ortalyqtyń jumysymen tanysyp, respýblıkalyq shtabtyń otyrysyn ótkizdi.
Sol jerde Oljas Bektenov sý basqan úılerdiń jaı-kúıin qarap, turǵyndardyń baspanalaryn qalpyna keltirý jáne basqa da qosymsha qoldaý sharalaryn kórsetýge qatysty suraqtaryna jaýap berdi. Máselen, ákimdik tizimderi boıynsha sý tasqynynan zardap shekkender sanatyna jatqyzylǵan barlyq azamatqa nesıeler boıynsha 3 aıǵa kredıttik tólemderin avtomatty túrde keıinge shegerý múmkindigi beriledi. Sonymen qatar tólemderdi keshiktirgeni úshin aıyppuldar men ósimpuldar salynbaıdy.
Jalpy oblysta tasqyn qaýpi áli seıilmegen. Qazir ózenderdiń kópshiliginde sý arnasynan asyp ketkeli tur. Óńirde 792 úı sý astynda qaldy. Oblystyń 5 aýdanynda (Qobda, Muǵaljar, Temir, Áıteke bı, Oıyl) jáne Aqtóbe qalasynda jergilikti aýqymdaǵy tabıǵı sıpattaǵy tótenshe jaǵdaı jarııalandy. Sý tasqynyna qarsy is-sharalarǵa jeke quramnan 3 140 adam, 664 tehnıka jumyldyryldy. Barlyǵy 8 978 adam qaýipsiz jerge kóshirildi.
Oljas Bektenov kólemi 15,8 mln m3 bolatyn Maǵadjan bógetin aralap kórdi, onda qarǵyn sý aǵyny saldarynan Maǵadjan sý qoımasynyń bógeti buzyldy. Ol 1985 jyly paıdalanýǵa berilgen. Gıdrotehnıkalyq qurylys jekemenshik «Tulpar» JShS kompanııasynyń ıeliginde. Qyzyltý aýylynan 25 adam, Tabantal qystaǵynan 11 adam evakýatsııalandy.
Sonymen qatar boljamdarǵa sáıkes, 5-11 sáýir aralyǵynda oblystyń barlyq aýmaǵynda aýa temperatýrasy aıtarlyqtaı jylynýy múmkin, qatty jaýyn-shashyn kútilmeıdi. Osyǵan baılanysty sý tasqynynan zardap shekken aýyldarmen qatar, qaıta sý alyp ketý qaýpi joq aımaqtardaǵy eldi mekenderdiń tynys-tirshiligin de qalpyna keltirýge nazar aýdaryldy.
Máselen, qazirdiń ózinde 26 eldi mekende elektr qýatymen jabdyqtaý qalpyna keltirildi. «Energojúıe» JShS-niń barlyq bólimsheleri kúsheıtilgen rejımde jumys isteýde. Respýblıkalyq mańyzy bar 9, oblystyq mańyzy bar – 3 jolda jáne 9 aýdandyq mańyzy bar jolda sýdyń toqtaýyna baılanysty kólik qozǵalysyna qoıylǵan shekteýler alynyp tastaldy. Óńirde shyǵyndy óteý komıssııasy jumys isteıdi. Úsh kún ishinde komıssııaǵa materıaldyq shyǵyndardy óteý týraly 1 623 ótinish túsken.
Algorıtmge sáıkes, TJ bolǵan kúnnen bastap kúntizbelik 30 kún ishinde keltirilgen shyǵyndy óteý týraly jergilikti ákimdikterge ótinish beriledi. Sonymen qatar Aqtóbe oblysynda sý tasqynynan zardap shekken jáne qıyn jaǵdaıǵa tap bolǵan turǵyndar ákimdikke tıisti ótinishpen júginý arqyly bir rettik tólem ala alady.
Qorytyndy boıynsha Úkimet basshysy Oljas Bektenov sý tasqyny saldaryn joıǵannan keıin kommýnaldyq jáne jeke menshiktegi gıdrotehnıkalyq qurylystarda jan-jaqty tekserýler júrgizýdi tapsyrdy. Aqtóbe oblysynda barlyǵy 206 gıdrotehnıkalyq qurylys bar.
