Oljas Bektenov Aqmola oblysynyń eginshilerimen kezdesip, egis jumystarynyń barysyn tekserdi
KÓKShETAÝ. KAZINFORM – Premer-Mınıstr Oljas Bektenov jumys saparymen Aqmola oblysyna bardy. Úkimet basshysy óńirdegi kóktemgi egis jumystarynyń barysyn tekserdi, sondaı-aq aýyl sharýashylyǵy taýaryn óndirýshilerimen kezdesip, Makınsk qalasyndaǵy qus fabrıkasynyń jumysyn kórdi. Bul týraly Úkimettiń baspasóz qyzmeti habarlady.
Úkimet basshysy «Jýravlevka-1» JShS-degi egis naýqanynyń barysymen tanysty. Qazirgi tańda sharýashylyqta egistik kesheni tuqymmen toltyrylyp, maıly daqyldardy egý jumystary bastaldy. Seriktestik – Bulandy aýdanyndaǵy jetekshi aýyl sharýashylyǵy qurylymdarynyń biri. Sharýashylyq tuqymmen jáne janar-jaǵarmaımen tolyq qamtamasyz etilgen. Bıylǵy jazdyq egis alqaby 88 771 gektardy quraıdy. Kúnbaǵysqa basa kóńil bólinip otyr: bul daqylǵa shamamen 16 myń gektarǵa jýyq jer bólindi, onyń 4 myńǵa jýyq gektaryna tuqym sebildi. Sonymen qatar bıyl egistikterde suly, burshaq, zyǵyr jáne raps ósiriledi. Jalpy alǵanda, óńirde kóktemgi dala jumystary bastalyp ketti: qazirgi ýaqytta 510 myń ga alqapqa egin egildi. Munda Úkimet basshysynyń nazaryna A. I. Baraev atyndaǵy astyq sharýashylyǵy ǵylymı-óndiristik ortalyǵyndaǵy selektsııa nátıjesinde alynǵan maıly, burshaqty, mal azyqtyq daqyldardyń suryptary usynyldy. Mekemede barlyǵy 105 suryp daıyndalyp, Qazaqstannyń memlekettik tizilimine engizildi, qazirgi tańda túpnusqa tuqym óndirisi 18 daqyl, 50 suryp boıynsha júrgizilip jatyr.
Oljas Bektenov ǵylymdy damytý jáne aýyl sharýashylyǵy salasyndaǵy jetistikterdi qoldaný qajettigin atap ótti. Úkimet basshysy jumys sapary barysynda óńirdegi iri aýyl sharýashylyǵy qurylymdarynyń basshylarymen salany damytýdyń ózekti máselelerin talqylady. Jumyrtqa, sút ónimderi, qus eti, un jáne mal azyǵyn óndiretin «Ijevskıı» ÓK bas dırektory Tımýr Jangýrazov otandyq tyńaıtqyshtar óndirisiniń kólemin arttyrý jónindegi saýalmen júginse, maıly daqyldar ósiretin oblystyń iri kásiporny «Jýravlevka-1» bas dırektory Arman Qudaıbergenov dızel otynyn esepteý normatıvterin arttyrý qajettigin aıtty.
Dándi, maıly daqyldar, etti baǵyttaǵy jylqy jáne iri qara mal ósirýmen aınalysatyn «En-Dala» JShS dırektory Tımýr Pshenov aýyl sharýashylyǵy taýaryn óndirýshilerdi ınvestıtsııalyq sýbsıdııalaý baǵdarlamasyna qatysty saýal joldady. Oljas Bektenov kóterilgen barlyq másele boıynsha jan-jaqty túsindirip, ákimdik pen tıisti mınıstrlikterge atalǵan máselelerdi erekshe baqylaýda ustaýdy, onyń ishinde JJM ýaqtyly tıep-jóneltý jáne sharýashylyqtardy sýbsıdııalar men jeńildikti nesıeler túrindegi memlekettik qoldaý sharalarymen barynsha qamtý jóninde tapsyrma berdi. Máselen, bıyl oblysqa arzandatylǵan baǵamen barlyǵy 83 myń tonna dızel otyny bólinip, egin egý naýqany kezinde dıqandardyń qajettilikterin tolyq qamtamasyz etedi. Bıyl oblys sharýalary topyraqqa shamamen 258 myń tonna mıneraldy tyńaıtqysh engizýdi josparlap otyr, bul ótken jylǵy kórsetkishpen salystyrǵanda 57%-ǵa artyq. Bul rette, Premer-Mınıstr otandyq tyńaıtqyshtardy satýdyń basym baǵyty ishki naryq ekenin atap ótti.
«Memleket basshysynyń tapsyrmasy boıynsha bıyl biz agroónerkásip keshenin qarjylandyrý kólemin ulǵaıttyq. Endigi bizdiń ortaq mindetimiz – kóktemgi egisti tıisti merziminde ári sapaly ótkizý. Azyq-túlik qaýipsizdigi men eksporttyq áleýet osyǵan tikeleı baılanysty. Úkimet tarapynan barlyq qoldaý sharalary kórsetilip jatyr. Problemalyq máseleler boıynsha ákimdik pen jaýapty mınıstrlikti jedel habardar etý qajet», - dep atap ótti Premer-Mınıstr Oljas Bektenov.
Foto: Úkimettiń baspasóz qyzmeti
