Olımpıadaǵa irikteý: Qazaqstan hokkeıshileri senimdi aqtaı ala ma?

ASTANA. KAZINFORM – Shaıbaly hokkeıden Qazaqstan quramasy búgin, 29 tamyzda 2026 jylǵy Qysqy Olımpıada irikteý satysyndaǵy alǵashqy oıynyn Vengrııaǵa qarsy ótkizedi. El quramasy D tobynda Slovakııa, Avstrııa jáne Vengrııamen dúbirli dodaǵa beriletin joldamany sarapqa salady. Jarystyń atalǵan satysyndaǵy barlyq oıyndar «Qazsport» telearnasynan tikeleı efırde kórsetiledi. Qazaqstandyq hokkeıshilerdiń aıtýly alamanǵa barý múmkindigi qandaı? Kazinform tilshisi osy maqsatta quramanyń múmkindigin saraptap, mamandar, jýrnalıster jáne jankúıerler pikirin bilgen edi.

Er kezegi - úshke deıin...

Qazaqstandyq hokkeıshiler buǵan deıin Qysqy Olımpıadada 1998, 2006 jyldary baq synaýǵa múmkindik aldy.

1998 jyly el quramasy Olımpıadada alǵashqy kezeńinde Slovakııa, Italııa jáne Avstrııamen sheberlik baıqasty. Nátıjesinde Italııany 5:3, Slovakııany 4:3 esebimen jeńip, Avstrııamen 5:5 esebimen teń oınady. Odan keıin birinshi kezeńde D tobynda Reseıge 2:9, Chehııa men Fınlıandııaǵa 2:8 ese jiberip, óz tobynda tórtinshi oryndy mise tutty. Jalpy komandalyq esepte segizinshi orynǵa turaqtady. El quramasynan Aleksandr Koreshkov pen Konstantın Shafranov surmergender kóshinde aldyńǵy ondyqtan kórindi. Bul jyly quramaǵa Borıs Aleksandrov bas bapker boldy. Sondaı-aq ulttyq qurama sapynda Aleksandr Koreshkov, Konstantın Shafranov, Mıhaıl Borodýlın, Evgenıı Koreshkov, Vladımır Zavıalov, Igor Zemlıanov, Dmıtrıı Dýdarev, Andreı Pchelıakov, Andreı Sokolov, Pavel Kamentsev, Vıtalıı Tregýbov, Vadım Glovatskıı, Andreı Savenkov, Vladımır Antıpın, Petr Devıatkın, Igor Dorohkın, Aleksandr Shımın, Alekseı Troşınskıı, Vıtalıı Eremeev, Erlan Saǵymbaev syndy hokkeıshiler oıyn kórsetti. 

Endigi kezekte el quramasy 2006 jyly Italııanyń Týrın qalasynda ótken XX Qysqy Olımpıada oıyndaryna qatysýǵa joldama aldy. Dúbirli dodada qazaqstandyq hokkeıshiler toptyq kezeńnen asa alǵan joq. B tobynda Shvetsııaǵa 2:7, AQSh-qa 1:4, Reseıge 0:1, Slovakııaǵa 1:2 esebimen jeńilip, Lvtvııany 5:2 esebimen tize búktirdi. Osylaısha toptyq kezeńde besinshi oryndy qanaǵat tutty. Qurama sapynda qaqpashylar Kırıll Zınovev, Vıtalıı Kolesnık, Vıtalıı Eremeev, qorǵaýshylar Alekseı Vasılchenko, Vladımır Antıpın, Oleg Kovalenko, Evgenıı Blohın, Andreı Savenkov, Denıs Shemelın, Evgenıı Pýpkov, Alekseı Koledaev, Artem Argokov, shabýylshylar Aleksandr Koreshkov, Konstantın Shafranov, Evgenıı Koreshkov, Dmıtrıı Dýdarev, Andreı Ogorodnıkov, Andreı Pchelıakov, Andreı Samohvalov, Sergeı Aleksandrov, Dmıtrıı Ýpper, Andreı Troşınskıı, Fedor Polışýk, Nıkolaı Antropov el namysyn qorǵap qaıtty. 

Endi araǵa on segiz jyl salyp qaıtadan Qysqy Olımpıadada baq synaýǵa múmkindik týa ma? Bul jóninde qazaqstandyq sport jýrnalısi Teljan Kúderov «Qarsylastardyń barlyǵy osal emes. Dese de jeńiske jetýge barlyq múmkindik bar dep oılaımyn. Ol úshin komandanyń bas bapkeri oıyn taktıtasyn durys qoıyp, óz shákirtteriniń sheberligin shyńdaýǵa kóńil bólgeni durys dep sanaımyn. Keıingi tórt jylda qazaqstandyq hokkeıshiler álem chempıonatynda elıtalyq dıvızıonda oınap júr. Bir-birin jaqsy túsinedi degen senimdemin», - deıdi. 

Іrikteý kezeńinen asa almady

El quramasy 2002, 2010, 2014, 2018, 2022 jyldarda irikteý kezeńinen asa alǵan joq. 2002 jyly birinshi irikteý kezeńinde ekinshi topta Lıtvany 13:2, Ýkraınany 5:3 esebimen jeńgenimen, Estonııaǵa 2:4 esebimen ese jiberdi. Saldarynan óz tobynda ekinshi oryndy mise tutyp, joldamadan qaǵyldy. Al 2006 jylǵy dúbirli dodaǵa irikteý kezeńinde alǵashqy kezeńde V tobynda Ispanııany 17:0, Estonııany 7:0, Nıderlandty 7:2 esebimen jeńip, jarystyń kelesi satysyna shyqty. Іrikteý satysynyń fınaldyq kezeńinde aldymen Norvegııaǵa 1:2, Danııaǵa 2:3 esebimen jeńilip, Frantsııany 8:2 esebimen tize búktirdi. Óz tobynda 3 upaımen úshinshi orynǵa taban tirep, joldamadan tys qaldy.

2024 jylǵy Qysqy Olımpıadaǵa irikteý kezeńinde de el quramasynyń joly bolǵan joq. Іrikteý satysynyń fınaldyq kezeńinde E tobynda Frantsııany 3:2, Ulybrıtanııany 6:0 esebimen jeńip, negizgi qarsylasy Latvııaǵa 2:3 esebimen ese jiberdi. Qazaqstandyq hokkeıshiler 2018 jylǵy dúbirli dodadan da tys qalyp qoıdy. Іrikteý satysynyń fınaldyq kezeńinde F tobynda Norvegııany overtaımda 4:3, Italııany 3:2 esebimen jeńip, Frantsııaǵa 1:4 esebimen jol berip qoıdy. El quramasy 2022 jylǵy dúbirli dodadan da tys qaldy. Úshinshi irikteý kezeńinde H tobynda oınaǵan qazaqstandyq hokkeıshiler Ýkraınadan 8:1, Nıderlandtan 7:1 esebimen basym túskenimen, sońǵy oıynda Polshaǵa 2:3 esebimen ese jiberdi. Bul joly qalaı bolady?

«Árıne, bul jyldarda qazaqstandyq hokkeıshiler ala-qula oıyn kórsetkenin jaqsy bilemiz. Elıtalyq dıvızıonda turaqtap oınaı alǵan joq. Ony bapkerlerdiń tájirıbesiniń azdyǵy, oqý-jattyǵý jıyndarynyń durys uıymdastyra almaýdan dep aıtsaq ta bolady. Endigi kezekte sol olqylyqty jibermeýimiz tıis. Nátıjesinde qazaqstandyq hokkeıshiler jankúıer kóńilinen shyǵatyn deńgeıde oıyn kórsete alady», - deıdi hokkeı jankúıeri Esenjol Nazarov.

Úzdikterge úmit artamyz

Shaıbaly hokkeıden Qazaqstan quramasy bıyl olımpıadalyq irikteý kezeńine daıyndyqty joǵary deńgeıde júrgizdi. Aldymen elordada ótken QR Prezıdenti kýbogynda ekinshi oryn aldy. Odan keıin qurama 20-22 tamyz aralyǵynda elordadaǵy «Barys-arenada» oqý-jattyǵý jıynyn jalǵastyrdy. Sodan keıin 25 tamyzda Chehııanyń Homýtov qalasynda jergilikti komandamen joldastyq kezdesýde jeńiske jetti.

Slovakııanyń «Slovan» komandasynyń qaqpashysy Andreı Shýtov qurama sapyna jarys bastalar aldynda qosyldy. Al QHL-da oınaıtyn hokkeıshiler 20 tamyzda qurama sapyn tolyqtyrdy. Olardyń qatarynda Nıkıta Mıhaılıs, Valerıı Orehov, Evgenıı Rymarev, Arkadıı Shestakov jáne Leonıd Metalnıkov bar.

Qazaqstan quramasynyń tizimi tómendegishe:

Qaqpashylar: Nıkıta Boıarkın («Barys»), Maksım Pavlenko («Rıazan-VDV», Reseı), Andreı Shýtov («Slovan», Slovakııa).

Qorǵaýshylar: Ádil Beketaev, Tamırlan Gaıtamırov, Samat Danııar («Barys»), Dmıtrıı Breýs («Torpedo»), Leonıd Metalnıkov («Admıral»), Edýard Mıhaılov («Arlan»), Valerıı Orehov («Metallýrg»), Ivan Stepanenko («Hýmo», Ózbekstan).

Shabýylshylar: Álıhan Ásetov, Aleksandr Borısevıch, Dinmuhamed Qaıyrjan, Maksım Mýhametov, Rýslan Ospanov, Mıhaıl Rahmanov, Kırıll Savıtskıı, Roman Starchenko («Barys»), Rýslan Demın («Saryarqa»), Artem Lıhotnıkov («Hýmo», Ózbekstan), Kırıll Panıýkov («Amýr», Reseı), Evgenıı Rymarev («ıÝnıson», Reseı), Arkadıı Shestakov («Admıral», Reseı), Nıkıta Mıhaılıs («Metallýrg», Reseı).

Bul kezeńde bas bapker mindetin Oleg Bolıakın atqarady. Oǵan Georgıı Vereşagın, Talǵat Jaılaýov, Pavel Bessonov kómekshilik jasaıdy. 

«Qazaqstan quramasy Prezıdent kýbogynda Olımpıadalyq irikteýge daıyndyq júrgizdi. Oqý-jattyǵý jıynynda oıynshylardyń keńeıtilgen tizimi jarııalandy. Atalǵan týrnırde buryn quramǵa enbegen oıynshylardyń sheberligi saraptaldy», - dedi ulttyq quramanyń bas bapkeri Oleg Bolıakın baspasóz máslıhatynda.

Qazaqstandyq hokkeıshiler sońǵy tórt jylda elıtalyq dıvızıonda synǵa túsip keledi. Dese de Slovakııa únemi úzdik quramalar sapynda baq synap júrgen tájirıbeli qurama ekenin umytpaýymyz tıis. Al Avstrııa men Vengrııada da sheberligi shyńdalǵan hokkeıshilerden jasaqtalǵan. Olardyń da elıtalyq dıvızıonda jınaǵan tájirıbesi bar. Qysqasy, jarystyń atalǵan kezeńi qazaqstandyq hokkeıshiler úshin úlken synaq bolǵaly tur. El quramasy jankúıer senimin aqtaı ala ma? Ony aldaǵy oıyndarda kóretin bolamyz.