Olımpıada oıyndarynda kimder úzdik ondyqqa kirdi

PARIJ. KAZINFORM – Frantsııa astanasy Parıj qalasynda ótken Olımpıada oıyndarynda qazaqstandyq sportshylardan kimder alǵashqy ondyqqa kirdi.

Atap aıtsaq, dzıýdodan áıelder arasyndaǵy básekede Ábıba Ábýjaqynovanyń Olımpıada júldesin alatyn múmkindigi joǵary boldy. Alaıda, qola medal úshin ótken beldesýde Abıba shvetsııalyq Tara Babýlfattan jeńilip, jarysty besinshi orynmen aıaqtady.

Sondaı-aq, gımnast Mılad Karımı besinshi oryn aldy. Sportshy erkin jattyǵýdan Olımpıadanyń fınalynda óner kórsetken bolatyn. Aqtyq synda ol óz jattyǵýy úshin 14.500 upaı alyp, alǵashqy bestikke endi.

Sporttyq quzǵa órmeleý sheberi Ámir Maımuratovtyń da kórsetkishi jaman emes. Jyldamdyq boıynsha synǵa túsken ol Olımpıadanyń shırek fınalyna jetip, jazǵy oıyndarda besinshi oryn aldy.

Nysana kózdeý sheberi Aleksandra Le alǵashqy ondyqqa kirdi. Ol pnevmatıkalyq vıntovkamen 10 metrge nysana kózdeýden fınalǵa shyǵyp, jalpy esepte altynshy orynnan kórindi. Aıta ketelik, Aleksandranyń enshisinde aralas komandalyq syndaǵy qola medal bar.

Olımpıadaǵa alǵash ret qatysqan Danıl Musabaev batýttaǵy gımnastıkadan fınalǵa bir qadam qalǵanda toqtady. Ol birinshi irikteýden soń 8-orynnan kóringen. Alaıda, ekinshi irikteýde toǵyzynshy orynǵa túsip qaldy. Fınalǵa alǵashqy segizdik joldama aldy.

3000 metrge kedergiler arqyly júgirýden Qazaqstan namysyn Nora Djerýto qorǵady. Ol jarysta 9-oryn ıelendi. Qazaqstanǵa álem chempıonatynyń altynyn syılaǵan sportshy jaqynda ǵana dekrettik demalystan oralǵan.

Shpagamen semserlesýden Qazaqstan komandasy Olımpıadada alǵashqy altylyqqa endi. Shırek fınalda bizdiń sportshylar Vengrııaǵa jol berip, keıin Egıpetti jeńdi. Al besinshi orynǵa talasta Italııa quramasynan jeńilip, Parıj oıyndaryn altynshy orynmen támamdady. Komandalyq synda Qazaqstan namysyn Rýslan Kýrbanov, Erlik Sertaı, Elmır Alımjanov pen Vadım Sharlaımov qorǵady. Bizdiń noıandar alǵash ret komandalyq syn boıynsha Olımpıadaǵa qatysyp otyr.

Sonymen qatar, shpagamen semserlesýden jekeleı synda qazaqstandyq Rýslan Kýrbanov altynshy oryn aldy. Bul da otandyq semserlesý tarıhyndaǵy úzdik nátıje. Kýrbanov shırek fınalǵa deıin jetip, bolashaq Olımpıada chempıonyna ǵana ese jibergen bolatyn.

Olımpıada oıyndary sadaq atý sheberleri de synǵa tústi. Komandalyq jarysta Ilfat Abdýllın, Aleksandr Eremenko jáne Dáýletkeldi Jańbyrbaı 1/8 aınalymǵa jetip, Italııadan bir upaı aıyrmasymen jeńildi. Jalpy esepte 9-orynǵa taban tiredi.

Breıkıngten Amır Zakırov segizinshi oryn aldy. Ol toptyq syndaǵy eki battlda jeńiske jetip, shırek fınalǵa joldama alǵan. Alaıda, amerıkalyq VICTOR-dan utylyp, jartylaı fınalǵa óte almady. Aıta ketelik, breıkıng Olımpıada baǵdarlamasyna alǵash enip otyr.

Kırıll Gerasımenko ústel tennısinne 1/8 fınalǵa jetti. Úsh Olımpıadaǵa qatysqan sportshymyz buljoly tarıhı nátıje tirkedi. Buǵan deıin atalǵan sport túrindegi ókilderimiz alǵashqy ondyqqa enbegen.

Sondaı-aq, bokstan Qazaqstan komandasynyń músheleri de alǵashqy ondyqqa kirdi. Nurbek Oralbaı kúmis medal alsa, Sáken Bıbosynov (51 keli), Muhammedsabyr Bazarbaıuly (63,5 keli) jáne Aıbek Oralbaı (92 keli) besinshi oryn ıelendi. Mahmud Sabyrhan (57 keli) men Qamshybek Qońqabaev (92 keli) toǵyzynshy orynda.

Grek-rım kúresiniń sheberleri Nursultan Tursynov (87 keli) pen Álimhan Syzdyqov (130 keli) tıisinshe jetinshi jáne segizinshi oryn aldy. Erkin kúres sheberi Álisher Erǵalı (97 keli) da jetinshi orynda.