Olımpıada medaline úmitker sportshy men jattyqtyrýshyǵa aı saıynǵy tólem mólsheri ózgeredi

ASTANA. QazAqparat – Olımpıada medaline úmitker sportshylar men olardyń jattyqtyrýshylaryna aı saıynǵy tólemderdi anyqtaý krıterıılerin engizý josparlanyp otyr, dep habarlaıdy QazAqparat Mádenıet jáne sport mınıstrligine silteme jasap.

Mınıstrlik «Joǵary sanatty sportshylar, jattyqtyrýshylar jáne joǵary sanatty sportshylardy daıarlaıtyn dene shynyqtyrý jáne sport salasyndaǵy mamandarmen sporttyq qyzmet týraly shart boıynsha aqsha tólemderiniń mólsherin bekitý týraly» buıryqqa ózgertýler ázirledi. Buıryq jobasyna sáıkes, qoldanystaǵy qujatqa sportshylar jáne jattyqtyrýshylarmen jasalǵan shart boıynsha aı saıynǵy tólemniń eń tómengi jáne eń joǵary mólsherin anyqtaý krıterııleri bar tarmaqty qosý usynylady.

Atap aıtqanda, Olımpıada, Paralımpıada nemese Sýrdlımpıadanyń medaline úmitker sportshylarǵa aı saıynǵy tólem mólsheri sportshynyń aǵymdaǵy olımpıadalyq tsıklde Álem nemese Azııa chempıonatynyń/kýbogynyń jeńimpazy nemese júldegeri bolýyna baılanysty belgilenedi.

Al, jattyqtyrýshylar men bas jattyqtyrýshylar Olımpıada, Paralımpıada, Sýrdlımpıadada, sondaı-aq olımpıadalyq, paralımpıadalyq, sýrdlımpıadalyq sport túrlerinen eresekter arasyndaǵy álemdik jáne qurlyqtyq birinshilikterde medal jeńip alý boıynsha mindettemeni alýy tıis.

Bul jattyqtyrýshy-keńesshilerge de, biraq tek Olımpıada júldesine úmitker sportshylardy daıarlaýǵa qatysatyndarǵa ǵana qatysty.

«Qujattyń jańa redaktsııasynda somasy men tóleý merzimi ózgergen joq. Mysaly, Olımpıada medaline úmitker sportshy aı saıyn shartta belgilengen somanyń 50%-yn (700-den 7500 AQSh dollaryna deıin) alady, qalǵan bóligi medal jeńip alý boıynsha mindetteme oryndalǵan jaǵdaıda ǵana tólenedi», - dedi MSM Sport jáne dene shynyqtyrý isteri komıtetiniń tóraǵasy Erbol Myrzabosynov.