Olımpıada qarsańynda Parıjdi qandala qaptady

Parıj ben Frantsııanyń basqa da qalalarynda qandalanyń kóbeıýi ınsektofobııany órshitip, aldaǵy jyly Olımpıada oıyndary ótetin Frantsııa astanasynyń tazalyǵy men gıgıenasyna kúmán týdyrdy. QazAqparat bul týraly VVS basylymyna silteme jasap habarlaıdy. 

Keıingi aptalarda qandalany kórgender kóbeıgenimen, jalpy bul úrdis birneshe jyldan beri baıqalyp kele jatyr.

«Ár jyly jaz sońynda biz qandala kóbeıgenin baıqaımyz. Oǵan shilde men tamyz aılarynda adamdar jıi saparlap, júgimen birge tasymaldaıtyny sebep. Osylaısha, ár jyly maýsymdyq kórsetkish byltyrǵyǵa qaraǵanda arta beredi», — deıdi Marsel ortalyq aýrýhanasynyń entomologi jáne les punaises (bul jaratylysty frantsýz tilinde osylaı ataıdy) boıynsha jetekshi maman Jan-Mıshel Beranje.

Parıjde óz páterińde qandala paıda bolý qorqynyshyna (resmı derek boıynsha, keıingi bes jylda ár onynshy turǵyn osyndaı jaǵdaıǵa tap bolǵan) taǵy basqa ýaıym qosyldy.

Qandalany kınoteatrlardan kezdestirgeni, poıyzda áldebireýlerdi shaqqany týraly turǵyndardyń áńgimesi rastalmaǵanymen, bılik ókilderi bul máselege basa nazar aýdara bastady. 

Parıj merııasy men prezıdent keńsesi jedel sharalar qabyldaýǵa shaqyrdy. Bul — bılik ókilderiniń máselege muqııat qaraǵany men Olımpıada oıyndary qarsańynda Parıjdiń jaqsy ımmıdjin saqtap qalýǵa tyrysatynyn kórsetti.

Onsyz da kórermen qyzyǵýshylyǵy tómendegenine alańdap otyrǵan kınoteatr ıeleri áleýmettik jelilerde taraǵan vıdeodan qorqyp otyr.

Onda kıno kóretin oryndyqtarda túsiniksiz jándikter júrgeni kórinip tur.

Metro jolaýshylary otyrmas buryn ornyn muqııat tekserip alady, al keıbiri tipti turyp turǵandy qup kóredi.

«Bıyl jańa element — jalpyǵa ortaq psıhoz bastaldy. Bir jaǵynan durys ta shyǵar. Sebebi adamdar bul másele týraly bildi, endi qandalaǵa qarsy sharalar múmkindiginshe tezirek qabyldansa jaqsy bolar edi. Biraq máseleniń ózi tym ásirelengen», — dep atap ótti Beranje.