Olımpıada-2026 altyn medaldarynyń quny belgili boldy
ASTANA. KAZINFORM – 2026 jylǵy Qysqy Olımpııalyq jáne Paralımpııalyq oıyndardyń jeńimpazdary men júldegerlerine tabystalatyn medaldar Italııada daıyndalyp jatyr, dep habarlaıdy Olympic-2026 uıymdastyrý komıteti.
Nagradalardy daıyndaýmen Italııanyń memlekettik moneta saraıy – Istituto Poligrafico e Zecca dello Stato aınalysady.
Uıymdastyrýshylardyń málimetinshe, Mılanda ótetin Olımpıada-2026 júldeleriniń ózindik quny Parıjdegi 2024 jylǵy Jazǵy Olımpıada medaldarynan eki ese qymbat bolmaq.
2026 jylǵy medaldar eki bólikten turady: bul sportshynyń óz jolyndaǵy shyńǵa jetýin jáne oǵan qoldaý kórsetkenderdiń eńbegin beıneleıdi. Medaldar IPZS kásipornynyń óndiristik qaldyqtarynan qaıta óńdelgen metaldan jasalsa da, olardyń quny arzan emes. Qazirgi baǵam boıynsha bir altyn medaldiń ózindik quny 800 dollardan (687 eýro) asady.
1912 jylǵa deıin altyn medaldar tolyqtaı taza altynnan daıyndalatyn. Keıinnen Halyqaralyq Olımpıada komıtetiniń reglamentine sáıkes, medaldar kúmisten quıylyp, onyń beti 6 gramm taza altynmen qaptalatyn boldy.
Kúmis medaldar negizinen sterlıngtik kúmisten daıyndalady. Bul qospaǵa ádette mys qosylyp, metaldyń beriktigi men jyltyrlyǵyn saqtaýǵa múmkindik beredi. Al Parıj-2024 oıyndarynan bastap qola medaldar taza mystan jasalýda.
Barlyǵy Olımpıadaǵa 1 146 medal, Paralımpıadaǵa 137 medal ázirlengen.
Aıta keteıik, Qazaqstannyń qazirgi tańda Mılan-2026 Qysqy Olımpıadasyna resmı túrde eki joldamasy bar, ekeýi de mánerlep syrǵanaýdan. Sondaı-aq short-trekten taǵy tórt sportshynyń kvotasy rastalýdy kútýde. 2025 jyldyń jeltoqsan aıynyń basyndaǵy málimet boıynsha, 34 qazaqstandyq sportshy Mılan Olımpıadasyna yqtımal qatysýshylar tiziminde tur.
Eske salaıyq, 7 jeltoqsan kúni Qysqy Olımpıada alaýynyń tarıhı sapary bastaldy.