Olımpıada-2022: Bıatlonshylar arasynan kimnen úmit kútemiz
Bıatlonnnan Qazaqstan komandasy Beıjiń Olımpıadasyna 12 joldama jeńip aldy. Oǵan elimizdiń atynan Galına Vıshnevskaıa, Aleksandr Mýhın jáne Vladıslav Kıreev jiberilgen edi.
QR Ulttyq ulanynyń habarlaýynsha, bıatlonshy Aleksandr Aleksandrovıch Mýhın – Ulttyq ulannyń Kókshetaýdaǵy 5510 áskerı bóliminiń merzimdi áskerı qyzmetshisi. Onyń laýazymy – jedel maqsattaǵy batalon sarbazy (atqyshy).
«A. Mýhın 1998 jyly Aqmola oblysynda týǵan. 2021 jyldyń maýsym aıynda QR Ulttyq gvardııasynyń qataryna shaqyrylǵan. QR Ulttyq ulanynyń sport komandasynyń quramyna engen. Onyń ákesi – Aleksandr Mýhın, bıatlonnan KSRO sport sheberi, shańǵy jarysynan Qazaqstannyń eńbek sińirgen jattyqtyrýshysy, chempıondardyń tutas sańlaqtaryn tárbıelep ósirgen bapker. Aleksandr Aleksandrovıch Mýhın shańǵy jarysynan QR sport sheberi bolyp sanalady. Qazaqstan chempıonattarynyń birneshe dúrkin júldegeri jáne jeńimpazy, Álem chempıonattary men kýboktarynyń qatysýshysy, bıatlonnan QR Ulttyq qurama komandasynyń múshesi», - dep habarlady QR Ulttyq ulanynyń baspasóz qyzmeti.
Ókinishke qaraı, 8 aqpanda Olımpıadadaǵy bıatlonnan erler arasyndaǵy jekeleı jarystarda A. Mýhın (+6:13.0) 52-shi orynnan kórindi. Búgin jas sportshy bıatlonnan erler arasyndaǵy 10 shaqyrymdyq spırnt dodasyna shyǵady.
Al 11 aqpanda bıatlonnan áıelder arasyndaǵy sprınt jarysy ótti. Baǵdarlamanyń bul túrinde Qazaqstan atynan jalǵyz Galına Vıshnevskaıa-Sheporenko el namysyn qorǵaǵan edi.
Galına Sergeevna Vıshnevskaıa-Sheporenko – QR Ulttyq ulanynyń aǵa leıtenanty. Ol Shyǵys Qazaqstan oblysynyń týmasy jáne halyqaralyq dárejedegi sport sheberi, 2014 jylǵy jasóspirimder arasyndaǵy álem chempıony, 2014 jylǵy jasóspirimder arasyndaǵy Azııanyń eki dúrkin chempıony, 2017 jylǵy Ýnıversıadanyń eki dúrkin chempıony jáne 2017 jylǵy Qysqy Azııa oıyndarynyń tórt dúrkin chempıony. 2014 jylǵy aqpan aıynan beri quqyqtyq tártip áskerleri qatarynda 6636 áskerı bóliminiń Ulttyq ulan sport komandasyn daıarlaý ortalyǵynyń sport jónindegi aǵa nusqaýshysy.
G. Vıshnevskaıa-Sheporenko 2015 jyldyń qańtarynda Slovakııanyń Osrbl qalasynda ótken 27-shi Qysqy Ýnıversıadada aralas estafetada kúmis medal jeńip aldy. 2017 jyldyń qańtarynda sportshy Almatyda ótken 2017 jylǵy 28-shi Qysqy Ýnıversıadada Qazaqstannyń basty úmiti boldy. Jáne bıatlonshylar jarysynda barlyq úmitterin aqtap, 7,5 km sprıntte eki altyn medal jáne 12,5 km mass-startta, sondaı-aq 15 km jeke jarysta jáne aralas estafetada eki kúmis medal jeńip aldy.
2017 jyldyń aqpan aıynda Galına Vıshnevskaıa Sapporodaǵy Qysqy Azııa oıyndarynda bıatlon baǵdarlamasynyń barlyq tórt altyn medalin jeńip aldy: 7,5 km sprıntte, 10 km qýdalaý jarysynda, aralas estafetada jáne 12,5 km mass-startta. 2017 jyly Estersýndta ótken Álem Kýbogy kezeńinde (Maksım Braýnmen juptasyp) jalǵyz aralas estafetada úshinshi oryn alǵan.
7 aqpanda Galına Vıshnevskaıa-Sheporenko Beıjiń Olımpıadasyndaǵy jekeleı jarysty 44-shi orynmen aıaqtap, iz kesý jarysyna joldama alǵan 60 sportshynyń qataryna engen edi.
Ókinishke qaraı, otandasymyz bul Olımpıadada bıatlonnan áıelder arasyndaǵy sprıntte jalpy esepte 60 sportshynyń ishinen 52-shi orynǵa ıe boldy. Jerlesimiz jeńimpazdan +2:38,3 (1+0) mınýtqa qalyp qoıdy.
Qazaqstan quramasynyń eń jas bıatlonshysy Vladıslav Kıreev 21 jasta. Ol 2000 jyly Qaraǵandy oblysynda týǵan. Qysqy sport túrleri boıynsha oblystyq olımpıadalyq rezerv mektebiniń tárbıelenýshisi retinde QR sport sheberi jáne jastar arasynda Qazaqstan men Azııa chempıony bolǵan. 2020 jyly Shveıtsarııada ótken jasóspirimder arasyndaǵy álem chempıonatynda jeke jarysta besinshi boldy. 2021 jyly bıatlonnan Chehııada ótken jazǵy álem chempıonatynda jetinshi oryn, Qyrǵyzstanda ótken Azııa birinshiliginde altyn jáne qola medaldarǵa, al Almatyda ótken QR Spartakıadasynda úsh jarysta jeńiske jetken.
8 aqpanda Olımpıadadaǵy bıatlonnan erler arasyndaǵy jekeleı jarystarda Vladıslav Kıreev (+3:41.8) 25-orynǵa ıe boldy. Al búgin jas sportshy A. Mýzın otandasymen birge bıatlonnan erler arasyndaǵy 10 shaqyrymdyq spırnt jarysyna qatysady.
Eske sala keteıik, Olımpıada oıyndarynda sporttyń jeti túrinen 109 medal jıyntyǵy sarapqa salynady. XXIV qysqy Olımpıada oıyndaryna Qazaqstan quramasynan barlyǵy 34 sportshy qatysýda. Olar 87 joldama jeńip aldy. Qazaqstandyqtar shańǵy jarysy, frıstaıl, akrobatıka jáne mogýl, konkımen júgirý, short-trek, bıatlon, taý shańǵysy, tuǵyrdan sekirý, shańǵy qossaıysy sııaqty 8 sport túrinen attanǵan edi. Ázirge Qazaqstan qorjynynda medal joq.
