Olıgarhtardan tárkilengen zergerlik buıymdar aýktsıonda satyldy
ASTANA. KAZINFORM — 23 sáýirde E-Qazyna elektrondy platformasynda bes birdeı zergerlik buıym boıynsha aýktsıon túrindegi saýda-sattyq ótti. Bul týraly Qaıtarylǵan aktıvterdi basqarý kompanııasy málimdedi.
Satylǵan zergerlik buıymdardyń qatarynda qaıtarylǵan aktıvter bolatyn «CARTIER LOVE» bilezigi men júzigi, ızýmrýd tasy bar syrǵalar, akvamarın tasy bar júzik, gaýhar tasty altyn júzik jáne injý men gaýhar tastarmen kómkerilgen syrǵalar bar.
Realızatsııalanǵan aktıvterdiń jalpy somasy — 5 425 246 teńge.
— Zergerlik buıymdardy satý azamattardyń áleýmettik bastamalardy damytýǵa sanaly túrde qatysýynyń jarqyn mysaly. Aýktsıon arqyly aktıvterdi satyp ala otyryp, árbir qatysýshy el bolashaǵyna úles qosady. Sebebi túsken qarajat Arnaıy memlekettik qorǵa aýdarylyp, mańyzdy qoǵamdyq jobalardy qoldaýǵa jumsalady, — dep habarlady Qaıtarylǵan aktıvterdi basqarý kompanııasy.
Eske salsaq, 14 naýryzda ótken Ulttyq quryltaıda Qasym-Jomart Toqaev sońǵy úsh jylda elge 2 trln teńgeden astam aktıv qaıtarylǵanyn málimdegen edi.
Al 14 sáýirde Premer-mınıstr Oljas Bektenov Memleket menshigine zańsyz alynǵan aktıvterdi qaıtarý jónindegi komıssııa otyrysyn ótkizdi.
Jıynda shamamen 610 mlrd teńge kólemindegi aktıvterdiń qaıtarylǵany aıtyldy.
Ulytaý oblysynda osy qaıtarylǵan aktıvter esebinen 2025 jyly 11 nysan salynady.