«Oqjetpes» emdeý-saýyqtyrý kesheninde qyzmet aıasy keńeıip keledi
KÓKShETAÝ. KAZINFORM - Prezıdent Іs basqarmasyna qarasty Býrabaıdaǵy «Oqjetpes» emdeý-saýyqtyrý kesheninde qyzmet aıasy keńeıip keledi. Saýyqtyrý kesheninde kelýshilerge arnalǵan 10 emdeý baǵdarlamasy qarastyrylǵan. Onyń ishinde sońǵy kezderi kelýshiler arasynda suranys artyp kele jatqan birqatar ádis týraly «Oqjetpes» emdeý-saýyqtyrý kesheniniń emdeý-ońaltý jumysy jónindegi vıtse-prezıdenti Laýra Qusaıynova aıtyp berdi.
Laýra Qusaıynovanyń aıtýynsha, 10 emdeý baǵdarlamasyna fızo-terapııalyq jáne balneologııalyq ádister, jylýmen jáne naftalanmen emdeý jatady. Mundaı ádisterdi Kavkazdaǵy mınarly sýlary, Reseıdiń Essentýkı, Kıslovodsk, Jeleznovodsk syndy qalalaryndaǵy tanymal kýrortty oryndarda paıdalanady.
Naftalanmen emdeý
Naftalanmen emdeý – munaıdan jasalǵan kúshti dári. 70-ten astam aýrýǵa em bul dárini adamdar 12 ǵasyrdan beri emdik baǵytta qoldanyp keledi. Ol qannyń tutqyrlyǵyn tómendetedi, ımmýnıtetti kóteredi. Ókpeniń jumysyn jaqsartady. Aǵzadaǵy qabyný protsesterin toqtatady. Analgetıkalyq áseri bar. Býyn, tirek-qozǵalys júıesine áseri mol. Ekzema, psorıaz sııaqty álemde kezdesetin kez kelgen dermatıt aýrýlaryn emdeıdi.
«Ázerbaıjan keńes zamanynan-aq osy Naftalanmen emdeý júıesin jolǵa qoıǵan. Qazaqstan azamattary dál osy emdi alý úshin sol elge baratyn. Al biz Naftalanmen emdeýdi osydan jarty jyl buryn qolǵa aldyq. Alǵashqy ýaqytta em alýshylar sany az bolatyn. Búginde kúnine keminde 10 adam osy emdi alyp jatyr. Suranys artýda. Osy rette, bir eskere ketetin jáıt, onkologııaǵa shaldyqqandar, týberkýlezdiń ashyq túrine ushyraǵandar, aǵzasynda ótkir juqpaly aýrýy, qan qysymy, júrek aýrýy barlar naftalanmen em ala almaıdy», - deıdi Laýra Qusaıynova.
Ókpege jattyǵý
Sonymen birge, «Oqjetpes» emdeý-saýyqtyrý kesheninde COVID-19 pnevmonııasynyń jeńil jáne ortasha aýyr túrine shaldyqqandar qalpyna kelý emdeý kýrstarynan ótedi. Jattyǵý pnevmonııanyń basqa túrlerimen aýyratyndardyń barlyǵyna da kórsetiledi. Jumys kúnderi kúnine 3 ret sanatorııdiń jańa fıtnes-zalynda bilikti mamanmen ókpege arnalǵan arnaıy jattyǵýlar jasaıdy.
Gırýdoterapııa
Bul medıtsınalyq protsedýranyń shıpajaıda qoldanyla bastaǵanyna kóp bolǵan joq. Degenmen, soǵan qaramastan kelýshiler tarapynan suranys joǵary. Gırýdoterapııa – deneni súliktermen tabıǵı emdeýdiń eń kóne ádisi. Bul protsedýra birshama asqynýlardy aldyn alady.
«Súlikter omyrtqaly dıskilerdiń arasyna, zardap shekken aımaqtyń ústine jáne astyna qoıylady. Emshara massajben, dári-dármektermen, dáriger usynǵan dıetamen birge júredi. Súlikterdiń sany men emdeý uzaqtyǵyn gırýdoterapevt patsıentterdiń aýrýynyń dıagnozy men satysy boıynsha taǵaıyndaıdy», - dep tolyqtyrdy Laýra Qusaıynova.
Pantamen emdeý
Bul erte qartaıýdyń aldyn alý, ımmýndyq júıeni nyǵaıtý, kúızelisti joıý jáne júıke júıesin qalpyna keltirý, aǵzadan ýly zattardy shyǵarý, sondaı-aq quıań - tuz jınalý, qan tamyrlarynyń bitelýi, qozǵalys qıyndyǵy jáne jynystyq álsizdik, júrek aýrýyna qarsy kúreste tıimdiligi joǵary tabıǵı quralmen emdeý ádisi.
Panta – jas maral múıiziniń jumsaq zatynan alynǵan joǵary bıologııalyq belsendi tabıǵı ónim, 2000 jyldan beri álemge tanymal jáne Ońtústik-Shyǵys Azııa elderinde halyq medıtsınasynda qoldanylady.
Jan terapııasy
«Oqjetpes» emdeý-saýyqtyrý kesheninde «Jan terapııasy» ınnovatsııalyq baǵdarlamasy júzege asyrylýda. Ejelgi ádister men zamanaýı tehnologııalardy biriktire otyryp, «Jan terapııasy» qonaqtarǵa «Densaýlyq», «Úılesimdilik» jáne «Ómir» sııaqty biregeı baǵdarlamalardy usynady.
«Densaýlyq» baǵdarlamasy - kásibı terapevtter deneni emdeý jáne qalpyna keltirý úshin tek tabıǵı preparattardy, shópter men maılardy paıdalanady. Gomeopatııa, ýnanı, sıdda jáne natýropatııa - bul ádisterdiń barlyǵy patsıentterdiń fızıkalyq jaǵdaıyn úılestirýge baǵyttalǵan. Bul protsedýralar denede energııa tepe-teńdigin qalpyna keltirýge kómektesedi.
«Úılesimdilik» baǵdarlamasy tájirıbeli nusqaýshylar men psıhologtar júrgizetin jeke ıoga terapııasy men psıhoterapııany usynady. Qonaqtar ózderin jáne emotsııalaryn tereńirek túsine alady, ıoga tájirıbesi men psıhologııalyq súıemeldeý arqyly ishki tynyshtyqqa ıe bolady. Únsizdikpen emdeý jáne art-terapııa aqyl-oıdy artyq shýdan bosatýǵa jáne psıhıkalyq tepe-teńdikti qalpyna keltirýge kómektesedi. «Ómir» baǵdarlamasy qonaqtardy kórkem óner men oıyn-saýyq áleminen lázzat alýǵa shaqyrady. Mýzyka, bı, fılmder jáne onlaın sabaqtar shabyt pen qýanysh atmosferasyn jasaıdy. Bul baǵdarlama qonaqtarǵa bos ýaqyttaryn ártaraptandyrýǵa jáne ár sátte sulýlyqty tabýǵa úırenýge múmkindik beredi. «Emdelýshiler «Jan terapııasynyń» tolyq kýrsyn aıaqtaǵannan keıin dene tazartylady, psıhoemotsıonaldy jaǵdaı jaqsarady jáne sezimtaldyq oıanady», - dep túıindedi Laýra Qusaıynova.
Aıta ketsek, «Oqjetpes» emdeý-saýyqtyrý kesheni – jyl boıy qyzmet kórsetetin klımattyq balneologııalyq keshen. Qazirgi zamanǵy emdeý-dıagnostıkalyq bazamen tolyqtyrylǵan tabıǵı biregeı faktorlar: qaraǵaı ormanynyń ekologııalyq taza aýasy, Balpash sor kóliniń emdik balshyǵy jáne Maı Balyq kóliniń mıneraldy sýy, radondy terapııa, qymyzben emdeý, «Qulager – Arasan» mıneraldy sýy júrek-tamyr júıesi, tynys alý músheleri, tirek-qımyl apparaty, asqorytý, qan aınalymy, endokrındi jáne júıke júıesi aýrýlaryn, ýrologııalyq jáne gınekologııalyq aýrýlardy emdeýge jáne ońaltýǵa múmkindik beredi.
Eske salaıyq, budan buryn «Oqjetpes» emdeý-saýyqtyrý kesheni jylyna 10 myńnan astam adamdy qabyldaıtynyn jazǵan edik.
