«Oqjetpes» emdeý-saýyqtyrý kesheni sheteldik týrısterdi nesimen qyzyqtyrady
KÓKShETAÝ. KAZINFORM – «Oqjetpes» emdeý-saýyqtyrý keshenine biriktirilgen shıpaıjaılarda bıylǵy jeti aıda 15 myńnan astam adam saýyǵyp qaıtty. Eń tanymal qyzmet túrleri emdik jattyǵýlar, vannalar, balshyqpen emdeý jáne apparattyq fızıoterapııa boldy. Sheteldik týrısterdiń qazaqstandyq sanatorıılerge degen qyzyǵýshylyǵy jaıynda «Oqjetpes» emdeý-saýyqtyrý kesheni» AQ shıpajaılar ókildiginiń basshysy Mádına Búrkitbaeva aıtyp berdi.
Onyń aıtýynsha, statıstıkalyq málimetterge qaraǵanda búgingi kúni elimizde jumys isteıtin jáne SPA jáne Welness shıpajaılyq-kýrorttyq baǵytynda ornalasqan 173 saýyqtyrý mekemesiniń ishinde memlekettik jáne kóp jelilik mártebesine tek bir ǵana brend – ol «Oqjetpes» emdeý-saýyqtyrý kesheni ǵana ıe.
«Quramyna Býrabaı kentindegi «Oqjetpes» shıpajaıy, Essentýkı qalasyndaǵy «Qazaqstan» shıpajaıy jáne «Almaty Resort» shıpajaıy kiretin «Oqjetpes» emdeý-saýyqtyrý kesheni» AQ shıpaıjalar jelisi adam densaýlyǵyna jaılylyqpen jáne relaksatsııamen qaraıtyn biregeı oryndar bolyp tabylady. Bizdiń qonaqtarǵa degen qamqorlyǵymyz joǵary sapaly medıtsınalyq qyzmettermen jáne ártúrli demalys baǵdarlamalarymen qamtamasyz etý ıdeıasyna negizdelgen. Árbir qyzmetker óz nazaryn bizdiń kelýshilerdiń qajettilikteri men tilekterine aýdarady», – dedi Mádına Búrkitbaeva.
«Oqjetpes» emdeý-saýyqtyrý kesheni 2019 jyldyń qarasha aıynda saýyqtyrý týrızminde «EuropeSPA» halyqaralyq sertıfıkatyn aldy jáne Ortalyq Azııadaǵy osyndaı sertıfıkaty bar alǵashqy sanatorıı atandy. «EuropeSPA» ózin saýyqtyrý, SPA jáne Welness salasyndaǵy eń joǵary talaptary bar sapa belgisi retinde kórsetti. Krıterııler ulttyq jáne halyqaralyq normalarǵa negizdelgen jáne ǵylymı konsýltatıvtik keńespen jáne salalyq sarapshylarmen yntymaqtastyqta únemi jetildirilip otyrady.
«Bizdiń shıpajaılardyń qonaqúı jáne meıramhana qyzmetindegi juldyzdy mártebesin rastaýda kóp jyldyq tájirıbemiz bar. Shıpajaılarymyz turaqty negizde Halyqaralyq kórmeler men forýmdarǵa belsendi qatysady. Máselen, 2023 jyly «Shıpajaı -2023» ǵylymı halyqaralyq forýmynda Qazaqstan Respýblıkasyndaǵy eń úzdik shıpajaı atandy. Máselen, Býrabaı kentindegi bir ǵana «Oqjetpes» shıpajaıyna jeti aıdyń ishinde jeti myńnan astam demalýshy keldi. Jattyǵý terapııasy, vannanyń bes túri, dýsh, jylý jáne balshyqpen emdeý, apparattyq fızıoterapııa, sondaı - aq AMOK, pantoterapııa, massajdar, sonyń ishinde bıoenergetıkalyq massajdar eń tanymal. 2023 jyly «Oqjetpes» emdeý-saýyqtyrý kesheni» AQ jelisimen 28,3 myń adamǵa qyzmet kórsetildi. Bizdiń qonaqtardyń arasynda shetelden kelgen 1229 qonaq boldy, bul bizge 2022 jyly kelgen sheteldik týrısterden bes ese kóp. Qazaqstannyń basqa óńirlerinen shıpajaıǵa kelýshiler sany 11,6 myń adamdy qurady. 2024 jyldyń 1 jartyjyldyǵynda shıpajaılarda 12,6 myń adam saýyǵyp qaıtty, onyń ishinde 701 sheteldik týrıst», – dep jalǵastyrdy Mádına Búrkitbaeva.
Aıtýynsha, shıpajaılarǵa shetelden keletinderdiń arasynda 60 paıyzdan astamy Reseı azamattary, 15 paıyzdan astamy Germanııa azamattary, 12 paıyzy Eýropanyń basqa elderiniń azamattary. Sonymen birge, Ózbekstan turǵyndarynyń úlesi 7 paıyz, AQSh pen Qytaı turǵyndary 2 paıyz, BAÁ 1 paıyz, basqa elderge 5 paıyzdan tıesili.
«Qonaqtardy, onyń ishinde sheteldik týrısterdi dıetalyq jáne qazaq taǵamdary, shıpajaılardyń biregeı ornalasýy, sondaı-aq klımatoterapııa, pantoterapııa, massajdar, qymyz terapııasy, Naftalan ónimderimen emdeý tárizdi ózge de saýyqtyrý túrleri qyzyqtyrady», – dep tolyqtyrdy Mádına Búrkitbaeva.
Shıpajaı qonaǵynyń ortasha jasy – 35 pen 68 jas aralyǵyndaǵy Reseı azamattary, olar saýyqtyrý baǵdarlamasy retinde Klımattyq terapııany, «streske qarsy» saýyqtyrý baǵdarlamasyn tańdaıdy. Biraq emdik baǵdarlamadan basqa árbir sheteldik qonaqqa qazaq qonaqjaılylyǵynyń jáne Qazaqstannyń tarıhy men mádenıetimen tyǵyz tanysýdyń biregeı jaǵdaılary jasalady.
«2024 jyldyń shildesinen bastap «Oqjetpes» emdeý-saýyqtyrý kesheni» AQ shıpajaılarynda «Qazaq Nomad Resort & Qazaq Emi» 2024-2026 jyldarǵa arnalǵan» damý tujyrymdamasy ázirlendi, osyǵan sáıkes negizgi maqsat shıpajaılar jelisine kelýshiler sanynyń artýymen qazaq halqynyń etnomádenı murasyna negizdelgen ulttyq týrıstik ónimdi jasaý bolyp tabylady. Bizdiń shıpajaılar jelisiniń qyzmetindegi ajyramas bóligi álemdik qoǵamdastyqta ulttyq biregeılikti nyǵaıtý, sondaı-aq sheteldik azamattardy qazaqsha saýyqtyrýǵa tartý. Tujyrymdamany oryndaý aıasynda kún saıyn ulttyq taǵam jáne qymyz kúnderi ótkiziledi. Ulttyq elementtiń dızaınymen jyl saıyn nómirlik qordy 20 paıyzǵa deıin jańartý júrgizilýde. Sondaı-aq turaqty negizde QR mádenıet qaıratkerlerimen kontsertter men kezdesýler, qazaq mýzykasy, kıno keshteri jáne qazaq sýretshileriniń kórmeleri ótkiziledi. shıpajaılardyń ornalasqan jeri boıynsha jeksenbilik marshrýttar beriledi, – dep qosty Mádına Búrkitbaeva.
Mysaly, «Oqjetpes» shıpajaıy Abylaı han alańynyń janynda ornalasqan, onda árbir týrıst qazaq mádenıetiniń ásemdigimen tanysyp, búrkitti qolyna qondyryp, atqa minip, kıimin aýystyryp, bir mınýtqa batyr nemese hanshaıym bola alady.
2024 jyldyń shildesinen bastap Almaty qalasyndaǵy «Oqjetpes» shıpajaıynyń fılıaly Almaty men oblystyń kórkem jerleri – Kólsaı kóli, Sharyn shatqaly, Esik kóli, Medeý-Shymbulaq, Túrgen sarqyramasy, Almaty-Arasan shatqaly, Keshki Almaty boıynsha týrıstik marshrýttar boıynsha jeksenbilik ekskýrsııalyq baǵdarlamany tanystyrdy.
«Sonymen qatar, bizdiń shıpajaılar elshiliktermen, iri sheteldik kompanııalardyń ókilderimen, týrıstik fırmalarmen saýyqtyrý sektoryndaǵy tájirıbe almasý, klıentterdi tartý jáne mádenı-oıyn-saýyq ózara is-qımyl jasaý turǵysynan belsendi aralasady. 2023 jyly Qazaqstandyq halyqaralyq týrızm qaýymdastyǵymen, Qyrǵyzstan Respýblıkasynyń týrızm qaýymdastyǵymen, «TopMedClinic», «Multiasking Corporation Co» (BAÁ) kompanııalarymen jáne taǵy basqalarmen yntymaqtastyq týraly memorandýmdarǵa qol qoıyldy. 2023 jyldan bastap Astana qalasynda ıoga jáne aıýrveda baǵdarlamalaryn kezeń-kezeńimen engizý sheńberinde Úndistan Elshiligimen jáne Svamı Vıvıkanda atyndaǵy mádenı ortalyqpen seriktestik bastaldy. 2024 jyly «Switzerland Tourism» Ulttyq týrızm keńsesimen memorandýmǵa qol qoıyldy. Qazaqstanǵa jasaǵan sapar barysynda densaýlyǵyńyzdy jaqsartý úshin «Oqjetpes» shıpajaılar jelisin tańdaǵanyńyz úshin bizdiń komanda atynan alǵys aıtamyn!» – dep túıindedi Mádına Búrkitbaeva.
Aıta ketsek, budan buryn «Oqjetpes» emdeý-saýyqtyrý kesheninde qyzmet aıasy keńeıip kele jatqanyn jazǵan edik.
