Oqýshylarǵa mamandyq tańdaýǵa kómektesetin joba iske qosylady

ASTANA. QazAqparat – «Bolashaq» qaýymdastyǵy «Bolashaqqa senimmen» jobasy arqyly 11-12 synyp oqýshylaryna mamandyq tańdaýǵa kómektespekshi. Bul týraly qaýymdastyq keńesiniń múshesi Muhtar Mankeev Ortalyq kommýnıkatsııalar qyzmetinde ótken brıfıngte aıtty, dep habarlaıdy QazAqparat tilshisi.

«Búgin biz resmı túrde «Bolashaq» qaýymdastyǵynyń atynan jańa jobany bastaǵaly otyrmyz. «Bolashaqqa senimmen» jobasy mektep bitirip jatqan túlekterimizge óziniń kásibı baǵdaryn, kásibı jolyn tańdaı bilýine arnalǵan naqty joba bolmaq.

2022 jyly biz pılottyq negizde 40-tan astam mektepte kezdesýler ótkizip, 3 myńnan astam oqýshyny qamtydyq. Onyń bári 10,11,12 synyptaǵy bolashaq túlekter. Mamandyq tańda kezinde olarda qandaı trıggerler, qandaı stımýldar bolý kerektigin «Bolashaq» mentorlary arqyly úıretemiz», - dedi qaýymdastyq ókili.

Aıtýynsha, bul joba naýqandyq shara bolyp qalmaý úshin júıeli túrde damytýǵa kúsh salynbaq.

«2023 jyly Bolashaqqa senimmen» degen jobany «Bolashaq» túlekteri qaýymdastyǵynyń atynan bastaıyq dep jatyrmyz. Basty mentorlar degen top jasaqtap jatyrmyz. Osy jobaǵa qatysqysy keletin azamattardy shaqyramyz. Búgingi brıfıngti paıdalanyp, ózderin qoǵam belsendisi dep biletin azamattardyń bárin bizge júginip, baılanys málimetterin berge shaqyramyz. Uıymdastyrýshylar sol málimetter boıynsha keri habarlasyp, kómek beredi. Olarmen de kezdesýler ótkizýge daıyn ekenimizdi aıtqym keledi», - dedi ol.