Oqýshylardyń júktemesin azaıtamyz - Úkimet
«TMD men EYDU elderiniń tájirıbesin zerdelep, mektep oqýshylyrynyń júktemesin azaıtý jaǵyn qarastyrý qajet. Budan bólek, balalardy erte damytý baǵdarlamasyn ázirlep, 2019 jyldyń 1 qyrkúıeginen bastap engizýdi tapsyramyn», - dedi B.Saǵyntaev.
Premer-mınıstr pedagogıkalyq kafedralar men fakýltetterdi damytý, pedagogtardy oqytý jáne olardyń biliktiligin arttyrý, matematıka jáne jaratylystaný ǵylymdaryn oqytý sapasyn kúsheıtý, barlyq qajetti ınfraqurylymdary bar balalar tehnoparkteri men bıznes-ınkýbatorlarynyń jelisin qurý, tsıfrlyq bilim berý resýrstaryn damytý, keń jolaqty ınternetke qosý, mektepterdi sapaly beınematerıaldarmen qamtasyz etý máselelerin erekshe atap ótti.
Sondaı-aq, bilim berý mekemeleriniń arasyndaǵy básekelestikti arttyryp, jeke kapıtaldy tartý úshin qala mektepterinde jan basyna qatysty qarjylandyrýdyń mańyzdylyǵyn jetkizdi. Bunyń barlyǵy Memleket basshysynyń bıylǵy Joldaýynda kórsetilgen.
Aıta ketken jón, «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Prezıdenttiń Joldaýynda bilim berý salasyna qatysty biraz máseleler kóterildi.
«Barshaǵa tegin kásiptik-tehnıkalyq bilim berý» jobasyn júzege asyrýdy jalǵastyrý qajet. Memleket jastarǵa alǵashqy mamandyqty beredi. Úkimet bul mindetti oryndaýǵa tıis. Orta mektep pen kolledjder jáne joǵary oqý oryndary úzdik oqytýshylarynyń vıdeosabaqtary men vıdeolektsııalaryn Internette ornalastyrý kerek. Bul barlyq qazaqstandyqtarǵa, onyń ishinde shalǵaıdaǵy eldi meken turǵyndaryna ozyq bilim men quzyrettilikke qol jetkizýge jol ashady. Joǵary bilim berý isinde jasandy ıntellektpen jáne «úlken derektermen» jumys isteý úshin aqparattyq tehnologııalar boıynsha bilim alǵan túlekter sanyn kóbeıtý kerek. Osyǵan oraı metallýrgııa, munaı-gaz hımııasy, agroónerkásip kesheni, bıo jáne IT-tehnologııalarsalalaryn zertteý isinde basymdyq beretin joǵary oqý orny ǵylymyn damytý kerek»-dilengen Joldaýda.
Buǵan qosa atalmysh qujatta qoldanbaly ǵylymı-zertteýlerdi aǵylshyn tiline birtindep kóshirýdi júzege asyrý talap etiledi. Joǵary oqý oryndary shetelderdiń jetekshi ýnıversıtetterimen, ǵylymı ortalyqtarymen, iri kásiporyndarymen jáne transulttyq korporatsııalarymen birlesken jobalardy belsendi túrde júzege asyrýy qajet.
Jeke sektordyń birlesken qarjylandyrýǵa atsalysýy barlyq qoldanbaly ǵylymı-zertteý ázirlemeleri úshin mindetti talap bolýǵa tıis. Jas ǵalymdarymyzǵa ǵylymı granttar aıasynda kvota bólip, olardy qoldaýdyń júıeli saıasatyn júrgizý kerek. Bilim berý salasyna óziniń ınvestıtsııalyq jobalary men eksporttyq áleýeti bar ekonomıkanyń jeke salasy retinde qaraıtyn kez keldi. Joǵary oqý oryndaryna bilim berý baǵdarlamalaryn jasaýǵa kóbirek quqyq berip, olardyń akademııalyq erkindigin zańnamalyq turǵydan bekitý kerek. Oqytýshylardyń qaıta daıarlyqtan ótýine kúsh salyp, joǵary oqý oryndaryna sheteldik menedjerlerdi tartyp, álemdik ýnıversıtetterdiń kampýstaryn ashý qajettigi aıtylǵan.
