Oqýshymen birge muǵalimniń de bilim deńgeıin baǵalaıtyn platforma paıda boldy
ASTANA. KAZINFORM — Qazaqstanda toqsan qorytyndysyn jyldam baǵalaıtyn avtomattandyrylǵan monıtorıng júıesi tanystyryldy.
Jańa júıeni BilimClass tsıfrlyq platformasy usynyp otyr. Jańa júıe oqý protsesin shynaıy derekter negizinde tolyqtaı baqylaýǵa múmkindik beredi.
Aıta ketý kerek, BilimClass platformasy qazir Astana men Almaty qalalarynyń, Almaty, Aqmola, Batys Qazaqstan, Qostanaı, Aqtóbe, Ulytaý, Abaı, Qyzylorda, Jetisý, Túrkistan jáne Soltústik Qazaqstan oblystarynyń bilim júıesine kiriktirilgen. Platformada 2,3 mıllıonnan astam oqýshy men 315 myńǵa jýyq muǵalim tirkelgen.
Tsıfrlyq platformanyń ıesi — Bilim Group kompanııasy. Joba avtorlary jańa júıe bilim sapasy men úlgerim deńgeıin avtomatty túrde esepteıtinin aıtady. Baǵalaý protsesi ár synyp, pán, oqý tili boıynsha, muǵalim men oqýshy deńgeıinde de júrgiziledi.
— Basty maqsatymyz — muǵalimge túsinikti, qarapaıym qural jasaý. Biz derekterdi avtomatty túrde jınap, túrli qyrynan taldaıtyn súzgiler arqyly reıtıng qurdyq. Monıtorıng barysynda anyqtalǵan kemshiliktiń sebebin de avtomatty júıe arqyly dál tabýǵa bolady, — deıdi joba avtorlarynyń biri, Óskemen qalasyndaǵy Nazarbaev Zııatkerlik mektebiniń dırektory Danııar Ýalıev.
Avtomatty júıe mynandaı tórt baǵytty qamtyǵan:
— bilim sapasy men úlgerim (toqsan nátıjeleri men syn-qater aımaqtaryn bir ekranda tolyq kórsetedi);
— muǵalim kórsetkishteri (naqty júkteme negizindegi jeke analıtıka);
— oqýshy statıstıkasy (úzdik, jaqsy, qanaǵattanarlyq, úlgerimi tómen jáne attestattalmaǵan);
— muǵalimder reıtıngi.
Bilim Group kompanııasynyń joba menedjeri Farhat Úsen jańa platformanyń ınterfeısi barynsha túsinikti etip ázirlengenin aıtady.
— Júıe syn-qaterlerdiń aldyn alyp, ata-analarmen de, pedagogtermen de ashyq formatta jumys isteıdi. Júıe oqý barysyndaǵy olqylyqtardy anyqtap, olardy qalaı túzetý keregin usynady. Sondaı-aq, qaı baǵytta ádistemelik qoldaýdy kúsheıtý kerek, qandaı pánder men synyptardy basymdyqqa qoıǵan durys degen sııaqty basqarý deńgeıindegi sheshimderdi qabyldaýǵa kómektesedi, — deıdi ol.
Buǵan deıin elimizde JI-di bilim berý júıesine engizý deńgeıin baǵalaıtyn ulttyq qural daıyndalyp jatqanyn jazǵan edik.