Oqýshylar qaýipsizdik sabaǵynda ne úırenedi
ASTANA. KAZINFORM — 1 qyrkúıekten bastap elimizdiń barlyq bilim berý uıymdarynda qaýipsizdik sabaǵy bastaldy. Bul sabaq apta saıyn synyp saǵaty aıasynda 10 mınýttan ótkiziledi, taqyryp jylyna úsh ret qaıtalanady.
«Sabaqtar balalardyń jas erekshelikteri men damý deńgeıin eskere otyryp, balalardyń ártúrli ómirlik jaǵdaılarda óz is-áreketterine senimdiligin qalyptastyrýǵa baǵyttalǵan. Bizdiń mindetimiz — balalarǵa qajetti aqparatty berip qana qoımaı, túrli jaǵdaılarda durys áreket etýge úıretý», — dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Qaýipsizdik sabaǵynda birqatar taqyryptarǵa basa nazar aýdarylady.
Balabaqshadaǵy eresek top balalary úshin (4 jas):
Shuǵyl qyzmetter men baılanys ortalyqtarynyń telefon nómirlerin bilý, shuǵyl qyzmetke durys qońyraý shalý, ózi týraly negizgi málimetterdi este saqtaý, terezelerge baılanysty qaýipterdi uǵyný, sondaı-aq balalar alańdarynda, oıyn ortalyqtary men attraktsıondarda ózin-ózi ustaý erejelerin qalyptastyrý.
Bastaýysh synyp balalary úshin:
Sý qoımasyndaǵy qaýipter, esikti qaǵý kezinde qaýipti qalaı tanýǵa bolady, beıtanys adamdarmen kezdeskende qalaı áreket etý kerek, muz ústinde júr qaýpi, ózin-ózi qorǵaý, vırtýaldy dostyqtyń qaýpi jáne qańǵybas ıtter kezikkendegi saqtyq sharalary.
Orta synyp balalary úshin:
Qaýipti chellendjer taqyryptary boıynsha sabaqtar, bóten adamnyń shaqyrýyn qabyldamaý, kóshedegi qaýipti nysandardan (mysaly, sýburqaqtar, elektr qalqandary) aýlaq júrý, kıberbýllıng jáne odan qorǵaný tásilderi, ata-analarmen senimdi qarym-qatynastyń mańyzdylyǵy, ınternettegi qaýipter, sondaı-aq balanyń quqyqtary men mindetteri.
Joǵary synyp oqýshylary men kolledjdiń 1-2 kýrs stýdentteri úshin:
Alaıaqtardyń aldaýyna túspeý jáne ózderin tabystyń kúmándi túrlerinen qorǵaý, onlaın-oıyndardyń táýekelderinen saqtaný jáne qaýipsizdikti qamtamasyz etý, teris emotsııalar men sózderge qatysty durys áreket etý, qaýipsiz eńbek jaǵdaılary, ata-analarǵa senim jáne óz áreketteri úshin jaýapkershilik alý erejeleri.
Aıta keteıik, sabaqtar balalardy zorlyq-zombylyqtan qorǵaý, sýıtsıdtiń aldyn alý jáne olardyń quqyqtary men salamattylyǵyn qamtamasyz etý jónindegi 2023-2025 jyldarǵa arnalǵan keshendi jospary sheńberinde júrgiziledi.
