Oqýshylar endi ustazdaryna vırtýaldy gúl shoqtaryn joldaı alady
ASTANA. KAZINFORM — Sońǵy qońyraý qarsańynda otandyq tegin BilimClass elektrondyq jýrnaly erekshe aktsııa uıymdastyryp jatyr. Platforma múmkindigin mektep oqýshylarymen qatar olardyń ata-analary da paıdalana alady.
Osylaısha jyl boıy balalarǵa bilim berip, qoldaý kórsetken muǵalimderdiń eńbegine degen shynaıy qurmetti vırtýaldy túrde bildirýge bolady.
— Endi árbir oqýshy ustazyn jyldam ári shyǵynsyz quttyqtaı alady. Gúl shoǵyn syılaý úshin oqýshylar men ata-analar BilimClass platformasyndaǵy gúl belgishesin basyp, muǵalimderdi tańdap, olarǵa júrekjardy tilegin jazyp jibere alady. Naýqan 26 mamyrǵa deıin jalǵasady. Ol kúni muǵalimder barlyq gúl shoqtaryn alyp, oqýshylarynan kelgen hattardy oqı alady, — deıdi BilimClass ónim jetekshisi Farhat Úsen.
Aıta keteıik, bul platformany Qazaqstannyń 13 óńirinde 2,2 mıllıon oqýshy men 300 myńnan asa muǵalim qoldanady. Onyń quramyna mektepti basqarý júıesi, oqý kontenti, ádistemelik taldaý jáne tereń analıtıka da kiredi. Júıe tolyqtaı otandyq jáne paıdalanýshy derekteriniń qaýipsizdigi men qupııalyǵyna kepildik beredi.
Platformany tsıfrlyq bilim berý tehnologııalary salasynda 15 jyldan asa qyzmet etip kele jatqan Bilim Group IT holdıngi ázirlegen.
Buǵan, deıin 2025–2026 oqý jylyndaǵy qorytyndy emtıhan merzimderi bekitilgenin jazdyq.
