Oqýshydan memlekettik qyzmetshige deıin: JI-di meńgerý ne úshin mańyzdy
ASTANA. KAZINFORM — Qazaqstanda aldaǵy bes jyl ishinde 1 mln-ǵa jýyq adamdy jasandy ıntellektiniń negizine baýlıdy. Olar qandaı baǵdarlamamen oqıdy jáne neni meńgeredi?
Ortalyq kommýnıkatsııalar qyzmeti alańynda ótken baspasóz máslıhatynda «ASTANA HUB» basqarýshy dırektory Danııa Ahmetova JI-ǵa baýlıtyn baǵdarlamalardy tizip berdi.
Oqýshylar
— 12–18 jas aralyǵyndaǵy jasóspirimder úshin bıyl kúzde alem.ai halyqaralyq jasandy ıntellekt ortalyǵy bazasynda TUMO ortalyǵy ashylady. Ortalyq balalar anımatsııa, baǵdarlamalaý, 3D-grafıka, generatıvti JI jáne basqa da baǵyttar boıynsha tegin bilim alatyn ınnovatsııalyq oqý keńistigi.
Stýdentter
— Jastar men stýdentter úshin peer-to-peer úlgisi boıynsha jumys isteıtin alǵashqy jasandy ıntellekt mektebi — Tomorrow School ashyldy. Munda tájirıbege, toppen jumys isteýge jáne synı oılaýdy damytýǵa basa nazar aýdarylady. Baǵdarlama tegin jáne eki jylǵa eseptelgen. Qabyldaý konkýrstyq negizde júzege asyrylady. Oqý barysynda stýdentter JI men IT-ázirlemede suranysqa ıe zamanaýı baǵdarlamalaý tilderin — Golang, JavaScript, Python jáne Rust meńgeredi.
Memlekettik qyzmetshiler
— AI Qyzmet — memlekettik qyzmetshiler men memlekettik basqarýǵa arnalǵan baǵdarlama. Ol jasandy ıntellektini tek túsinip qana qoımaı, qoǵam ıgiligi úshin etıkalyq ári tıimdi túrde engizýdi úıretedi. Bul tehnologııalyq ári ıkemdi memlekettik basqarýdy qurýǵa qosylatyn úles.
Odan bólek:
— QazCoders — BAÁ-men seriktestikte jasalǵan bilim berý baǵdarlamasy. 2019–2023 jyldary osyǵan uqsas joba Ózbekstan men Iordanııada tabysty júzege asyrylǵan. Baǵdarlama jas ereksheligine qaramastan barshaǵa qoljetimdi, sarapshylar men JI-assıstent qoldaýymen júrgiziledi. Kýrstar quramyna: baǵdarlamalaýdyń negizderi, Android Kotlin-ázirleý, derekterdi taldaý jáne jasandy ıntellekt enedi.
— Decentrathon — el boıynsha jas mamandardy biriktirip, olardy bolashaqtyń sheshimin jasaýǵa jumyldyratyn iri mýltılokaldy joba. 2024 jyly Decentrathon-ǵa eldiń barlyq óńirinen 2500-den astam adam qatysty. Hakaton qatysýshylary ondaǵan tehnologııalyq sheshim ázirledi.
— «Derekterdi taldaýdyń negizderi jáne Python» — ıAndeks Praktıkýmnyń onlaın-kýrsy. Tegin oqytý naqty keıstermen birge, qazaq jáne orys tilderinde qoljetimdi.
— «Jasandy ıntellekt negizderi: ChatGPT» — Lerna platformasymen birlesip iske qosylǵan kýrs. Bul kýrs neırojelilerdiń múmkindikterin túsinýge, tıimdi suranystar qura bilýge jáne JI-di kúndelikti jáne kásibı ómirde paıdalanýǵa úıretedi. Ol qazaq tiline neırojeli kómegimen aýdarylǵan.
— AI People — Blockchain & AI Center-pen birlesken joba. Formaty — Telegram-kýrs, ıaǵnı geımıfıkatsııa, beınesabaqtar jáne sońynda tsıfrlyq sertıfıkat beriledi.
— Atalǵan barlyq bilim berý jobalary týraly aqparat astanahub.com platformasynda jáne Astana Hub mobıldi qosymshasynda qoljetimdi. Bul bastamalar jeke dara emes, birtutas strategııanyń quramdas bóligi: árbir qazaqstandyqqa tsıfrlyq ekonomıkanyń bir bólshegi bolýǵa múmkindik berý. Biz tek mamandardy daıyndap qoımaı, jańasha oılaýdy, tsıfrlyq mádenıetti jáne tehnologııaǵa jaýapkershilikpen qaraýdy qalyptastyryp jatyrmyz, — deıdi Astana Hub basshysy.
Buǵan deıin habarlaǵanymyzdaı bes jylda 1 mln-ǵa jýyq qazaqstandyq jasandy ıntellektini meńgeredi.
Aıta keteıik, Qazaqstan Chat GPT sekildi óz jasandy ıntellektin jasap shyǵarmaq. Aqyldy júıe KazLLM dep atalady.
Sondaı-aq Prezıdent janyndaǵy Jasandy ıntellekt jóninde keńestiń quramynda kimder bolatynyn habarlaǵan edik.
Odan bólek, jasandy ıntellektiniń kómegimen qıyn jaǵdaıdaǵy otbasyn qoldaý tetigi engizilmek.