Oqýlyq jaıly shyndyqqa janaspaıtyn aqparat taratqan áıel keshirim surady
Ótken aptada áıel adam TıkTok áleýmettik jelisinde 2-synyp oqýlyqtaryna qatysty emotsııaǵa toly pikir bildirgen.
Ata-ananyń shaǵymy eki suraqty qamtydy:
1. Pán ataýy nege «Ana tili» emes, «Qazaq tili» dep atalady. Onyń sózinshe, osy ýaqytqa deıin «Ana tili» bolǵan.
2. «Jazbasha sóıleý» degen ne? Ata-anany sóıleý áreketiniń jazbasha túrde de bolatyny kúıindirip, ashýyn týǵyzǵan.
QR Oqý-aǵartý mınıstrligi respýblıkalyq ǵylymı-praktıkalyq bilim mazmunyn saraptaý ortalyǵy atalǵan synnyń negizsiz ekenin habarlap, túsinik berdi.
1. Qazaq tilinde oqytatyn mektepterde oqytylatyn «Ana tili» men «Qazaq tili» – oqý maqsattary ártúrli eki túrli, eki bólek pán. «Ana tili» 1-synyptyń ІІ jartysynda «Álippeden» keıin oqytylsa, «Qazaq tili» páni 2–11 synyptar aralyǵyn qamtıdy. Elimizdegi bilim salasynda bul – ornyqqan, ári dástúrli tájirıbe.
2. «Jazbasha sóıleý» - fılologııada ǵana emes, pedagogıkada erteden kezdesetin, keń taraǵan termın. Sol sebepti Bastaýysh bilim berý deńgeıiniń 2–4-synyptaryna arnalǵan «Qazaq tili» páni úlgilik oqý baǵdarlamasynda bul uǵym qoldanylyp, balalardyń aýyzsha jáne jazbasha sóıleý daǵdylaryn damytýdy kózdegen. Jeli qoldanýshylary óz pikirlerinde de uqsas jaýaptar bergenin atap ótken jón.
2022 jyldyń 17 qyrkúıeginde atalaǵan ata-ana óziniń TıkTok jelisinde 2-beınejazba túsirip, QR Oqý-aǵartý mınıstrliginen, oqýlyq avtorlary men sarapshylar tobynan emotsııaǵa berilip, dórekilik tanytqany jáne bilmestigi úshin keshirim surady.
Onyń sózinshe, aldyńǵy beınejazbany máseleniń anyq-qanyǵyna kóz jetkizbeı, erejeni umytyp turǵanda túsirgen. Al jelide shý shyǵaryp, talqyǵa túsken vıdeosyn óshirgen.
