«Oqý aqymdy tólemedi»: «Bolashaq» stýdent shaǵymyna jaýap berdi

ASTANA. KAZINFORM — AQSh-ta «Bolashaq» baǵdarlamasymen oqıtyn keı qazaqstandyq stýdenttiń oqý aqysy ýaqtyly tólenbegen. Osy máselege qatysty Ǵylym jáne joǵary bilim mınıstrliginiń baspasóz qyzmeti túsinik berdi.

Buǵan deıin áleýmettik jelide AQSh-ta «Bolashaq» baǵdarlamasy boıynsha bilim alyp jatqan Aıda esimdi stýdent oqý aqysy tólenbegendikten jańa semestrge jiberilmegenin aıtyp, jazba jarııalaǵan edi.

— Men AQSh-ta magıstratýranyń 2-kýrsynda oqımyn. Qazirgi tańda — «Bolashaq» HBO tarapynan tólem jasalmaǵandyqtan oqýymdy jalǵastyra almaı otyrmyn. Birneshe kúnnen keıin semestr bastalady, alaıda qarjylandyrý joq degen sebeppen ýnıversıtet meni oqýǵa jibermedi, — dep jazdy ol.

Atalǵan jaǵdaıǵa baılanysty «Halyqaralyq baǵdarlamalar ortalyǵy» AQ basqarma tóraǵasy Ádil Qusmanov túsinikteme berdi.

Onyń aıtýynsha, Vanderbilt University-degi stýdenttiń oqý aqysy 25 jeltoqsanda tolyq kólemde tólengen, al bul týraly aqparat ýnıversıtettiń Student Accounts bólimine joldanǵan.

— Qazirgi ýaqytta AQSh-ta rojdestvolyq kanıkýl júrip jatyr. Osyǵan baılanysty ýnıversıtet tarapynan júıede qoljetimdilik áli ashylmaýy múmkin. Ýnıversıtet jumysyn qaıta bastaǵannan keıin másele tolyq sheshiledi, — dedi ol.

Mınıstrlik pen «HBO» AQSh-ta oqyp jatqan «Bolashaq» stıpendıattarynyń oqýyna qatysty jaǵdaı turaqty baqylaýda ekenin málimdedi.

Budan buryn 225 qazaqstandyq «Bolashaq» halyqaralyq stıpendııasynyń ıegeri atandy.