Oksford ýnıversıtetinde qazaq tili oqytyla bastady
ASTANA. KAZINFORM – Oksford ýnıversıtetinde arnaıy baǵdarlama negizinde qazaq tili resmı túrde oqytyla bastady. Oxford Birsöz Initiative jobasy aıasynda Láılá Sultanqyzy úsh aı boıy sheteldik stýdenttermen tikeleı jumys istemek. Jibek Joly telearnasynyń «Búgin LIVE» baǵdarlamasyna qonaq bolǵan telejúrgizýshi óziniń bul usynysty qalaı alǵanyn aıtyp berdi.
– Bul men úshin de úlken tosynsyı boldy. Azııa jáne Taıaý Shyǵys zertteýler fakýltetiniń professory Leıla hanym habarlasqanda qatty qýandym. Ol kisi: «Qazaq tiliniń aıasy keńeıip, jastardyń arasynda qazaq tiline degen qyzyǵýshylyq artyp otyr. Biz “Bolashaq” baǵdarlamasymen barǵan stýdenttermen kóptegen zertteýler jasadyq. Solardy kópshilikke tanystyrýdy jáne qazaqsha sóılegisi keletin jastarǵa orta qurýdy josparlap otyrmyz», – dep usynys aıtty. Árıne, men bul usynysty birden qabyldadym, – deıdi stýdııa qonaǵy.
Telejúrgizýshi buǵan deıin shetelde akademııalyq bilimin jetildirýdi armandap júrgenin jasyrmady.
– Meniń úlken ulym Nıderlandyda oqıdy. Biz oqyǵan kezdegi akademııalyq bilim múlde basqa edi. Qazirgi balalardyń oqý baǵdarlamasy múlde ózgeshe. Balalaryma birdeńe túsindireıin desem, keıde óz bilimim jetpeı qalǵanyn baıqaımyn. Sol kezde: «Nege men de oqymasqa?» – dep oıladym. Іshimde «shetelde oqysam» degen arman burynnan bar bolatyn. Buǵan deıin Shveıtsarııada oqyp kórdim. Biraq bul joly turaqty túrde turyp, oqysam degen edim. Men úshin eń bastysy – bilikti professorlarmen pikir almasyp, akademııalyq bilimimdi tolyqtyrý. Sondyqtan kúzde úsh aıǵa jol júremin. Al kelisimshart jalpy eki jylǵa jasaldy. Qalǵan ýaqytta kelip-ketip, túrli sharalar uıymdastyryp júremin, – deıdi Láılá Sultanqyzy.
Til mamany qazaq tilin úırenýge nıetti jastardyń basyn qosyp, Spiking Club ashýdy josparlap otyrǵanyn jetkizdi.
– Alǵashqy maqsatym – Spiking Club ashý. Bul tek qazaq jastary úshin emes, qazaq tiline qyzyǵatyn basqa el jastaryn da biriktiretin alań bolady. Ol jaqta «Bolashaq» baǵdarlamasymen oqyp jatqan, doktorlyq dıssertatsııasyn qorǵap júrgen qazaq jastary bar. Ustazdar arasynda ózbek, ázerbaıjan tilderine qyzyǵýshylyq baıqalady. Al túrik tili ol jaqta burynnan oqytylady. Sondyqtan, eger qazaq tiline de qyzyǵýshylyq týyp, usynystar túsip jatsa, nege bul baǵytta jumys istemeske? – deıdi ol.
Stýdııa qonaǵy jańa usynysqa qatysty ózge de josparlarymen bólisti.
– Spiking Club naqty bir baǵytpen shektelmeıdi. Túrli salany qamtımyz. Bolashaqta elimizdiń túrli saladaǵy úzdik mamandaryn Oksfordqa shaqyryp, dáris oqytý – úlken maqsattarymnyń biri. Ol jaqtaǵy jastarǵa bizdiń mamandardy nege tanytpasqa? – deıdi Láılá Sultanqyzy.
Láılá Sultanqyzy shetelde, ásirese qazaq mýzykasy asa tanymal ekenin tilge tıek etti.
– Baıqasańyzdar, qazaq mádenıetine, ánderine degen suranys óte joǵary. Ásirese, qazirgi býyn ókilderi shetelde de asa tanymal. Olar menen birinshi bolyp qazaq mýzykasy týraly surady. «Sizderdiń mýzykalaryńyzdy jastar tyńdaıdy, kınolaryńyzdy jaqsy kóredi», – dedi. Bul – jańa serpin. Jas býyn álemdik sahnany jaýlap jatyr degen sóz, – deıdi telejúrgizýshi.
Aıta keteıik, ótken joly ǵylymdy qazaq tilinde túsindiretin Qazaq Bubble jobasy týraly jazǵan edik.