Oksford stýdentteri qazaq tilin úırenedi
Álemge áıgili Oksford ýnıversıteti stýdentteri men oqytýshylaryna qazaq tilin úıretýge nıetti. Bul – bizdiń ana tilimizge qyzyǵýshylyq tanytyp otyrǵan Ulybrıtanııadaǵy alǵashqy joǵarǵy oqý orny, dep habarlaıdy Kazinform.
Leıla Nadjafzada - Oksford ýnıversıteti janyndaǵy «Bir sóz» bastamasynyń dırektory. Ol qazir qazaq tilin úırenip júr. Bastama dep munda ýnıversıtet qarjylandyratyn, biraq akademııalyq bilimge jatpaıtyn jobalardy aıtady. Aldaǵy ýaqytta Leıla sekildi stýdentter men oqytýshylar da qazaq tilin oqymaq. Qazir daıyndyq jumystary bastalyp ketti.
«Biz Ahmet Baıtursynuly atyndaǵy Til bilimi ınstıtýtymen tyǵyz baılanys ornatyp, qazaq tilin oqytý ádistemelerin meńgerýdemiz. Oksford ýnıversıteti qazaqsha úıretetin Ulybrıtanııadaǵy alǵashqy oqý orny bolǵaly tur», - deıdi Oksford ýnıversıtetiniń janyndaǵy «Bir sóz» bastamasynyń dırektory Leıla Nadjafzada.
Uly dala eliniń tilimen qatar, tarıhy, búgini jáne bolashaǵy týraly bilgisi keletin oksfordyqtar kóp. Olarǵa Qazaqstannyń Ulybrıtanııadaǵy elshisi arnaıy dáris oqydy. Maǵjan Іlıasov Oksford Islamtaný ortalyǵynda elimizdiń mańyzdy tarıhı kezeńderine toqtalyp, jetken jetistikteri týraly baıandady. Toleranttylyq úlgisin tanytqan kópultty jáne kópkonfessııaly Qazaqstan týraly aıtyp berdi.
«Bizdiń ortalyq Qazaqstanmen baılanys ornatýǵa múddeli. Oksford jurtshylyǵy elderińizdiń tarıhynan bólek tyń aqparattarmen de tanysqysy keledi. Elshi bizge Qazaqstannyń órkenıettiń damýyna qosqan ólsheýsiz úlesi týraly eske saldy. Ótkeninen bólek, búgingi tynys-tirshiligi týraly da áńgimeledi. Sizdermen ekonomıka, bilim salalaryndaǵy baılanystardy nyǵaıtyp, bolashaqqa birge jospar qurý óte mańyzdy», - deıdi Oksford Islamtaný ortalyǵynyń dırektory Ahmad Nızamı.
Kezdesý XVI-XIX ǵasyrlarda eýropalyq jáne amerıkalyq zertteýshiler jasaǵan Qazaq memleketi kartalarynyń kórmesine ulasty. Ekspozıtsııa orta ǵasyrlarda ómir súrgen sheteldik ǵalymdardyń bizdiń aımaq týraly oılarynan habar beredi. Bul kúni Oksfordtyń akademııalyq ortasy, eksperttik qaýymdastyǵy jáne bıznesmenderi ótkenge saıahat jasaýǵa múmkindik aldy.
Aıta keteıik, Oksford - dúnıejúzindegi eń kóne, ári reıtıngisi eń joǵary ýnıversıtetterdiń biri. Munda álemniń 140 memleketinen kelgen 26 myńǵa jýyq stýdent bilim alady.Sondaı-aq oqý ornynda qazaq tilinen ózge 11 til oqytylady.
