OQO-nyń qýyrshaq teatry Astanada óner kórsetti
«EKSPO-2017» kórmesi aıasynda Astana qalasyndaǵy Ońtústik Qazaqstan oblysynyń kúnderinde oblystyq qýyrshaq teatry Astana qalalyq qýyrshaq teatry men balabaqshalarynda jas kórermenderge Maqpal Maldybaevanyń «Altyn balyq» qoıylym men Antonına Malıýchenkonyń «Masaq» («Kolosok») qoıylymdaryn qazaq jáne orys tilderinde usyndy.
Altyn balyq qoıylymy kedeı balasy Farhattyń boıyndaǵy ádilettilik, adamgershilik pen Han shabarmandarynyń boıyn jaýlap alǵan zulymdyq, qara basynyń qamyn oılaýshylyq, mansapqorlyq sekildi ymyraǵa kelmes ózara qaqtyǵysyn kórsetedi. Qoıylym jas jetkinshekterge adamgershilik, eńbekqorlyq sekildi kez-kelgen adam balasyna tán jaqsy qasıetterdi boılaryna sińirýge shaqyrady. Kórermender men ata-analar tarapynan zor yqylasqa bólengen qoıylym jas búldirshinder men jetkinshekterge erekshe áser qaldyra aldy.
«Masaq» qoıylymynyń maqsaty - balalardy eńbekke baýlý. Spektakl barysy Átesh pen Tyshqannyń bıdaıdyń masaǵyn taýyp alýynan bastaý alady. Eńbekqor Átesh pen erinshek Tyshqannyń ózara qarama-qaıshy áreketteri kórinis taýyp, qoıylymdy tamashalaǵan kórermen balaqaılar «eńbekpen kelgen nan tátti» degen maqaldyń maǵynasyn osy qoıylym arqyly tereń túsindi deýge bolady.
Kishkentaı kórermenderdi shat-shadyman qýanyshqa bólegen teatr qoıylymdarynyń basty maqsaty - balalar men jasóspirimderge rýhanı tárbıe berý, jas urpaqtyń rýhanı-estetıkalyq damýyn qalyptastyrý men ulttyq múddeni nasıhattaý, mádenıetke, ónerge qyzyqtyrý, Otansúıgishtikke, elin, jerin qorǵaýǵa, qurmetteýge, adaldyqqa, dostyqqa, adamgershilikke t.b. adamı qasıetterge jastaıynan baýlý bolyp tabylady.
