OQO-da jazasyn óteýshiler jumyspen qamtylýda
Tóle bı aýdanynda qatań tártiptegi ICh-167/9 mekemesinde kórme uıymdastyryldy. Oǵan óńirdegi alty túrme sottalýshylarynyń qolynan shyqqan buıymdar qoıyldy.
«Bizde qazir 17 kásipker túzeý mekemelerine kirip, ózderiniń tsehtaryn ashyp, jazalaryn ótep jatqan azamattarǵa jumys berip, kásipterin júrgizip jatyr. Kásipkerlerge mundaı jerde jumys isteý óte tıimdi. Mysaly ondaǵy tsehtardy jalǵa alý tegin. Ekinshiden, jumys ornynda PTÝ bar bizde, árbir mamandyqtarǵa úıretýge múmkinshilikteri bar. Eger kásipkerler kelemiz dese, ózderiniń zattaryn ákelip, buıymdaryn jasata beredi. Olardan aqysyn tóleý ǵana suralady», - deıdi oblystyq prokýratýranyń basqarma bastyǵy Ermek Áıtimov.
Statıstıkalyq málimetterge súıensek, árbir onynshy sottalýshynyń bilimi joq. Al, on adamnyń úsheýi mamandyq almaǵan. Búginde olardy eńbekke yntalandyrý maqsatynda arnaıy kýrstar uıymdastyrylýda. Temir torǵa toǵytylǵandar elektr monteri, gaz-elektr dánekerleýshi, tiginshi-ámbebap, avtomehanık, tokar-ámbebap jáne aǵash ustasy sııaqty mamandyqtardy meńgerýde.
«Byltyrǵy 2016 jyldyń qortyndysy boıynsha qatań tártiptegi ICh-167/9 mekemesinde adam sanyna shaqqanda 66,7 paıyz sottalýshy jumyspen qamtyldy. Jyl boıy shaǵyn jáne orta bıznes sýbektilerin shaqyrtý nátıjesinde mekemeden 10 kásiporyn ashyldy. Búgingi tańda tolyq bári jumys istep tur. Jumys barysynda tártip buzbaı, ózin jaqsy jaǵynan kórsete bilgenderge abaqtydaǵy eńbek merziminen buryn bosaýyna sebepshi bolady», - deıdi ICh-167/9 mekemesi bastyǵynyń orynbasary Tóreáli Berdııarov.
Túrmedegi myna dánekerleý tsehynda jumys isteıtin sottalýshylar temir balqytyp, túrli buıymdar jasaıdy. Olarǵa jumys berýshi kásipker qajetti materıaldardyń barlyǵyn der kezinde jetkizip berip otyrady eken. Temir esikter, qaqpalar, sharbaq, esik-tereze torlary, balalardyń oıyn alańdaryna qajetti buıymdarǵa tapsyrys qabyldaıdy. Túrme qyzmetkerleriniń aıtýynsha jazasyn óteýshilerdiń qolynan shyqqan dúnıeler áp-sátte satylyp ketedi. Sebebi, buıymdardyń baǵasy arzan, sapasy da jaqsy. Qoldan jasalǵan buıymdar qashan da naryqta óz baǵasyn joǵaltpaıtyny belgili. Turmysta qajetti bul dúnıelerdi saýdaǵa shyǵarý kásipkerler úshin de kóp paıdasyn tıgizip otyr. Sottalǵandar da turaqty jalaqysyn alady, bul 20-30 myń teńgenin aralyǵynda. Osyndaı jeńildikterdi paıdalanyp, kásipkerler aǵashtan buıym jasaý tsehyn da ashyp qoıypty. Munda sheberler shahmat, nardy ústeli sııaqty syılyqqa arnalǵan buıymdar men aǵashtan mýzykalyq aspaptar, ydys-aıaq jasaıdy. Ásirese jańǵaq aǵashynan jasalǵan et astaýlaryna suranys artqan.
«Bir dombyrany 10 kún kóleminde istep shyǵamyz. Sosyn besik isteımiz. Ony qaıyń, jańǵaq sııaqty ártúrli aǵashtardan jasaımyz. Besikti mysaly bes kún ishinde bitiremiz. Astaýlardyń birneshe túrin jasaımyz»,- deıdi sottalýshy Yrysáli Panaev.
«Ressolızatsııa: Sen qoǵamǵa kereksiń» jobasynyń aıasynda óńirdiń prokýrorlary bıylǵy jyly birqatar túzeý mekemelerinde oqytý ortalyqtaryn ashý josparlanyp otyrǵanyn aıtady. Onda sottalǵandardy jeńil ónerkásip salasyna beıimdep, tiginshilikke úıretedi. Al, jazasyn ótep shyqqandardy turaqty jumyspen qamtý úshin probatsııa baǵdarlamasymen qoldaý kórsetilmek. Aıta keteıik, ótken jyly óńirde 60 adam osy baǵdarlamamen bilimin jetildirip, kásip meńgergen.