OQO-da UBT erejesin buzyp, aýdıtorııadan shyǵarylǵan oqýshylar boldy

ShYMKENT. QazAqparat - Ońtústik Qazaqstan oblysynda 10 oqýshy ulttyq birińǵaı testileýde 137 ball jınady. Testileýdiń qorytyndysy boıynsha oblystaǵy ortasha deńgeı 76,8 baldy qurady. Bul týraly búgin oblystyq bilim basqarmasy basshysynyń mindetin atqarýshy Raýshan Ergashova málimdedi, dep habarlaıdy QazAqparat HAA tilshisi.

Jalpy, oblys boıynsha barlyq aýdan, qalalardaǵy 829 mektepten 21323 bitirýshi UBT tapsyrǵan. Al, synaq tapsyrýǵa nıet bildirgen 21668 oqýshynyń 312-si óz ótinishimen, 29-y densaýlyǵyna baılanysty, 4 oqýshy QR Bilim jáne ǵylym mınıstrliginiń buıryǵymen (halyqaralyq olımpıada jáne ǵylymı joba jeńimpazy) UBT-dan bosatylǵan. Sondaı-aq, testileýge kirgen 3 oqýshy UBT erejesin buzǵany úshin aýdıtorııadan shyǵarylyp, testileý qorytyndylary joıyldy.

«2017 jylǵy UBT qorytyndysy boıynsha oblysta ortasha deńgeı 76,8 baldy qurady. Atap aıtsaq, Kentaý - 90,6, Shymkent - 86,6, Otyrar - 84,6, Qazyǵurt - 81, Arys - 78,9, Túrkistan - 76, Túlkibas - 75,9, Tólebı - 75,3, Saıram - 72,5, Shardara - 72,4, Sozaq - 72, Saryaǵash - 71,9, Maqtaral - 71,2, Báıdibek - 70,2, Ordabasy - 64,3 baldy qurady»,- dedi R.Ergashova.

Synaq tapsyrǵan túlekterdiń ishinde 100 baldan joǵary jınaǵandar 4113 bolsa, 120 balǵa deıin jınaǵandar sany 3004 oqýshy, al, 1109 bala 121-140 aralyǵynda ball jınaǵandar.

Aıta keteıik, synaq kezinde eń joǵary 138 baldy Muhamed Haıdar Dýlatı atyndaǵy úsh tilde oqytatyn mamandandyrylǵan №8 gımnazııasynyń oqýshysy Janabaeva Ásel Maratqyzy jınasa, 137 baldy 10 oqýshy, 136 baldy 15 oqýshy jınaǵan.