OQO-da rýhanı jańǵyrý aıasynda jaryq kórgen kitaptardyń tusaýkeseri ótti
Atap aıtqanda, «Elbasy Joldaýlary - órkendeý kepili. Elboshı maktýbları - taraqqıet kafolatı» kitaby jáne «Túrkistan - Túrki áleminiń mádenı astanasy» atty fotoalbomy. Aıta keterligi, jınaqtar Elbasynyń «Bolashaqqa baǵdar: rýhanı jańǵyrý» maqalasy aıasynda jaryq kórip otyr.
Qos jınaqtyń tusaýkeserine óńirdegi zııaly qaýym ókilderi, oqyrmandar jınaldy. Igi sharada alǵashqy bolyp sóz alǵan oblys ákiminiń orynbasary Ulasbek Sádibekuly qos jınaqtyń oblys rýhanııaty úshin mańyzdy ekendigin jetkizdi.
«Búgin eki kitaptyń tusaýy kesilgeli tur. Alǵashqysy, Elbasynyń 1997-2017 jyldardaǵy Joldaýlary bir jınaqqa toptastyrylyp, ózbek tilinde jaryqqa shyqty. Kitaptyń qurastyrýshysy oblystyq «Janýbıı Qozoǵıston» gazetiniń bas redaktory Alısher Satvaldıev. Bul úlken eńbek ekendigin aıta ketken jón.
Keıingisi, 2017 jyly qasıetti Túrkistan qalasy - Túrki qalasynyń mádenı astanasy bolyp jarııalandy. Osyǵan oraı naýryz aıynan bastap 5 jeltoqsan aralyǵynda 40-tan asa shara ótkizildi. Mine, osylardyń barlyǵy jınaqtalyp, «Túrkistan - Túrki áleminiń mádenı astanasy» atty fotoalbomǵa toptastyrylyp otyr. Jınaqty qurastyrýshy belgili aqyn Temirǵalı Kópbaev. Atalǵan jınaq bolashaq úshin tarıh bolmaq», - dedi Ulasbek Sádibekuly. 
Ózbek tilinde jaryq kórgen «Elbasy Joldaýlary - órkendeý kepili. Elboshı maktýbları - taraqqıet kafolatı» kitabynda 20 jyl ishindegi 21 Joldaý jáne «Bolashaqqa baǵdar: rýhanı jańǵyrý», «Ult jospary - 100 naqty qadam» syndy tarıhı qujattar toptastyrylǵan.
«Túrkistan - Túrki áleminiń mádenı astanasy» fotoalbomynda túrkitildes elderdiń rýhanı-mádenı astanasy Túrkistan qalasy bolyp jarııalanýy oraı ótken is-sharalar tolyq qamtylǵan.
Atalǵan jınaqtar aldaǵy ýaqytta qalalyq jáne aýyldyq kitaphanalarǵa, bilim mekemelerine jetkiziletin bolady.
