OQO-da «Órleý» jobasyna qatysýshylardyń sany 75,2 paıyzǵa artty
Basqosýda sóz alǵan oblystyq jumyspen qamtý jáne áleýmettik baǵdarlamalar basqarmasynyń basshysy Muhıt Otarshıev 2018 jyly jańa formattaǵy ataýly áleýmettik kómek 300 myńǵa jýyq adamǵa kórsetiletinin jetkizd, dep habarlaıdy oblys ákiminiń baspasóz qyzmeti.
«Bıyl oblysymyzda «Órleý» jobasyn iske asyrý úshin 22,8 myń otbasy shartty aqshalaı kómekpen jáne 27,3 myń adamdy jumyspen qamtý josparlanǵan bolatyn. Eger 2016 jyly oblystaǵy «Órleý» jobasyna qatysýshylardyń sany 26,3 paıyzdy qurasa, 2017 jyly josparlanǵan kórsetkish 75,2 paıyzǵa deıin artqan. Sondaı-aq, búgingi tańda oblysta 260 otbasy ataýly áleýmettik kómek jáne 62,2 myń otbasy 18 jasqa deıingi balalarǵa arnalǵan járdemaqy alýda», - dedi Muhıt Otarshıev.
Aıta keteıik, 2017 jyldyń 1 qarashasyndaǵy esep boıynsha 118,9 myń adamǵa 7,2 mlrd teńgege shartty aqshalaı kómek taǵaıyndalǵan. 2018 jyldyń 1 qańtardan bastap qazirgi usynatyn úsh túrli áleýmettik tólemderdiń ornyna ataýly áleýmettik kómektiń jańa formaty engizilmek. Jıynda sóz alǵan Eńbek jáne halyqty áleýmettik qorǵaý vıtse-mınıstri Svetlana Jaqypova zeınetaqyny taǵaıyndaý júıesi ózgerip, tıisti áleýmettik kómekterdiń kólemi ulǵaıatynyn jetkizdi.
«2018 jyldyń 1 shildesinen bastap bazalyq zeınetaqy júıege qatysý ótiline qaraı beriledi. Eger bul soma qazir 14 myń teńgeni kórsetse, 2018 jyldyń 1 shildesinen bastap zeınetkerlerdiń atalǵan toby yntymaqty jáne jınaqtaýshy zeınetaqyǵa qosa 28 myń teńgeni ıemdenetin bolady. Al 2018 jyldyń 1 qańtarynan bastap az qamtylǵan otbasylar somasy kóbeıgen járdemaqy alady dep josparlanýda. Atalǵan járdemaqy jumys istemeıtin eńbekke jaramdy otbasy músheleri memleket usynǵan jumyspen qamtý sharalaryna qatysqanda ǵana tólenetin bolady», - dedi Svetlana Jaqypova.
Jıyn sońynda oblys ákiminiń orynbasary Erbol Sadyr zeınetaqy jáne járdemaqy salasyndaǵy jańa ózgerister jaıly óńir halqyna túsindirý jumystaryn sala basshylaryna kúsheıtýdi tapsyrdy.
