OQO-da «Nurly jermen» 364 turǵyn úı salynýda

ASTANA. QazAqparat - Ońtústik Qazaqstan oblysynda «Nurly jer» baǵdarlamasymen kópqabatty 364 turǵyn úı salynýda. Búgin bul týraly selektorlyq májiliste oblystyq qurylys basqarmasynyń basshysy Quttybek Jamashev málim etti, dep habarlaıdy QazAqparat ákimdiktiń baspasóz qyzmetine silteme jasap.

Basqarma basshysynyń aıtýynsha, «Nurly jer» baǵdarlamasy negizgi 5 baǵytta júzege asyrylyp jatyr. Onyń alǵashqysy - ıpotekalyq kredıt berýdiń qoljetimdiligin arttyrý jobasymen 96 turǵyn úıdiń qurylys bastalǵan. Al jeke qurylys salýshylar esebinen 107 turǵyn úıdiń qurylysy júrgizilýde. Sondaı-aq turǵyn úı qurylys jınaqtar júıesi arqyly 73 keredıttik turǵyn úı salynýda. Budan bólek, jalǵa beriletin turǵyn úı qory qurylyp, 88 jeke turǵyn úıdiń qurylysy qolǵa alynatyn bolady. Osynyń nátıjesinde óńirde satylatyn páterler sany kóbeıip, ıpotekalyq kredıt alýshylar sany arta túspek.  

«2017 jyly oblysta 16 jeke salýshylar esebinen 107 kóp qabatty turǵyn úılerdiń qurylysy júrgizilýde. Aǵymdaǵy jyly 11 úıdiń qurylysyn aıaqtap paıdalanýǵa tapsyrý josparlansa, 96 úıdiń qurylysy 2018 jylǵa ótpeli. Jeke qurylys salýshylardy yntalandyrý maqsatynda jalpy quny 17,5 mlrd. teńgeni quraıtyn 7 jobany iske asyrý úshin qujattar ázirlenip, tıisti jumystar atqarylýda», - deıdi Quttybek Jamasheev.

Jıyn barysynda oblysymyzda qurylys jumystary kesteden kesheýildep jatqan mektepterdiń de jaı kúıi sóz boldy. Bul rette Shymkent qalasyndaǵy «Tasken turǵyn alabyndaǵy №103 orta mektebine 600 oqýshy oryndyq jańa oqý blogyn salý» nysany boıynsha qarjy josparǵa sáıkes 100 paıyz ıgerilgen. Alaıda, B korpýsynyń qurylysynda 10-15 kún óndiristik kesteden keshigý baıqalady.

Sonymen qatar, oryndalǵan jumys kóleminiń joq bolýyna baılanysty esepti kezeńge josparlanǵan 650 mln. teńgeniń 66 mln. teńgesi ıgerilmegen. Sondaı-aq Qazyǵurt aýdany Qyzylseńgir eldi mekenindegi 300 oryndyq orta mekteptiń A blogynyń qurylys jumystary bekitilgen óndiristik kesteden 5-10 kún shamasynda keshigýde.  Dál osyndaı kemshilik Maqtaral aýdany Ferdaýsı aýylyndaǵy Ferdaýsı atyndaǵy 600 oryndyq mektep pen Ordabasy aýdany Shubar sý aýylyndaǵy 600 oryndyq bilim uıasynyń qurylysynda da qaıtalanyp otyr. 

«Mektep qurylysyn kesteden kesheýildetkender jaýapqa tartylady. Osy rette qurylysy jumys kestesinen kesheýildep jatqan mektepterdiń qurylys jumystarynyń ýaqytyly jáne sapaly júrgizilýine baqylaýdy kúsheıtýdi, jyl qorytyndysymen aǵymdaǵy jylǵa josparlanǵan jumystardy tolyq oryndaý arqyly, qarajylardy tıimdi ıgerilýin qamtamasyz etýdi tapsyramyn», - dedi Janseıit Qanseıituly.

Jıyndy qorytqan óńir basshysy «Nurly jer» baǵdarlamasy aıasynda salynyp jatqan turǵyn úıler men Ulttyq qor qarjysy esebinen boı kóterip jatqan mektepterdiń qurylysyn merziminde aıaqtaýdy qadaǵalaýdy aýdan, qala ákimderine tapsyrdy.