OQO-da «Qaharman Ult» sherýine 1500-den astam azamat qatysty

ShYMKENT. QazAqparat - Ońtústik Qazaqstan oblysynda Jeńistiń 72 jyldyǵyna arnalǵan saltanatty shara «Qaharman Ult» sherýimen bastaldy. Sherýge  1500-den astam  azamat qatysyp, ortalyq kóshemen júrip ótti.  Merekelik sharada, sondaı-aq, Áskerı úrmeli aspaptar orkestri taqyryptyq marshtar oryndap,  Abaı saıabaǵyndaǵy «Máńgilik alaýǵa» gúl shoqtaryn qoıý rásimimen jalǵasyn tapty, dep habarlaıdy QazAqparat HAA tilshisi.

Sharaǵa qatysqan jurtshylyq «Dańq memorıalynda esimderi tasqa qashalyp jazylǵan jaýyngerlerge taǵzym etip, olardy bir sát eske aldy. Saltanatty jıynda  oblys ákimi Janseıit Túımebaev UOS ardagerleri men tyl eńbekkerlerin jáne barsha ońtústikqazaqstandyqtardy Jeńistiń 72 jyldyǵymen quttyqtady.

«Ekinshi dúnıejúzilik soǵys bizdiń halqymyzdyń, ákelerimiz ben analarymyzdyń bıik rýhyn, erligi men qaharmandyǵyn álemge tanytty. Sondyqtan Jeńis kúni aǵa urpaqtyń erligin máńgilikke el jadynda saqtaýǵa arnalǵan eń qasterli mereke. Beıbit ómir úshin, urpaqtyń baqytty bolashaǵy úshin otqa túsip, qaıǵy-qasiret shekken, sonyń bárin qaıyspaı jeńe bilgen ardagerlerdiń jankeshti erligi men eńbegi jadymyzdan eshqashan óshpek emes. Sondyqtan da Elbasymyz soǵys jáne tyl ardagerlerine qoldaý kórsetip, olardyń hal-ahýalyn kóterýge kóp kóńil bólip keledi. Prezıdentimiz sonaý zulmatty soǵysta jeńiske birliktiń arqasynda ǵana jetýge múmkin bolǵanyn únemi eske salyp otyrady. Bizdiń ardagerlerimiz - elimizdegi dostyq pen kelisimniń berik irgetasy bolyp tabylady», - dedi óz quttyqtaý sózinde ákim.

Munan soń, Ekinshi dúnıejúzilik soǵys jáne tyl eńbekkerlerine arnalǵan áskerı ómirden teatrlandyrylǵan kórinister qoıylyp, ardagerlerge soldat botqasy usynyldy.

Aıta keteıik, Ekinshi dúnıejúzilik soǵysqa Ońtústik Qazaqstannan 140 myńnan astam adam attanyp, olardyń jartysyna jýyǵy týǵan jerge oralmaǵan.

ІІ Dúnıejúzilik soǵysta janqııarlyq erligi úshin ońtústikqazaqstandyq 51 azamatqa Keńes Odaǵynyń batyry ataǵy berilse, 8 jerlesimiz «Dańq» ordeniniń ıegeri atandy. Jaýjúrek qaısarlyǵy úshin myńdaǵan ardagerlerimiz túrli orden, medaldarmen marapattalǵan.

Búginde ot pen oqtyń arasynan elge aman-saý oralǵan maıdangerlerdiń 233-i - UOS ardageri, al, 996-sy soǵysqa qatysýshylar men múgedekterine  teńestirilgender. Qalǵan  19 199 adam tylda tynymsyz eńbek etkender bolyp tabylady.