OQO-da Áshirbek Syǵaıǵa 70 jyl tolýyna oraı eske alý keshi ótti

ShYMKENT. QazAqparat - Ońtústik Qazaqstan oblysynda Qazaqstannyń eńbek sińirgen óner qaıratkeri, QR Memlekettik syılyǵynyń, Táýelsiz «Platınaly Tarlan» syılyǵynyń laýreaty, «Qurmet» ordeniniń ıegeri, Kentaý qalasynyń birtýar týmasy Áshirbek Syǵaıǵa 70 jyl tolýyna oraı eske alý keshi ótti, dep habarlaıdy QazAqparat tilshisi.

Kentaý qalasynda ótken shara Memleket basshysynyń «Bolashaqqa baǵdar: rýhanı jańǵyrý» maqalasyndaǵy «Týǵan jer» baǵdarlamasyn júzege asyrý aıasynda uıymdastyryldy. Aldymen Shámshi Qaldaıaqov atyndaǵy mádenıet saraıynda ortalyq kitaphana men Kentaý qalalyq mýzeı tarapynan kórnekti teatr synshysyna arnalǵan kitap kórmesi uıymdastyryldy. Onan soń jıyn ótip, ony oblystyq mádenıet basqarma basshysynyń mindetin atqarýshy Asylbek emirhanov ashty. Jınalǵan qaýym aldynda sóz sóılegen basshy Áshirbek Syǵaıdyń otbasyna oblys ákimi Janseıit Túımebaevtyń arnaıy quttyqtaýyn tapsyrdy. Keıinnen kópshilik «Ómir joly» atty beınefılm men teatr synshysynyń ómir jolyna arnalǵan eki kórinistik qoıylymdy tamashalady. Onyń ómiri men eńbekteri týraly aıtyp, aqyn-jazýshylardyń arnaýlary oqyldy. Qala ákimi Ábdibaqyt Maqulbaev teatr synshysynyń jasaǵan eńbekterin atap ótip, asyl jary Kúlásh Dýlatbekqyzy men uly Qanat Áshirbekulyna qurmet kórsetti.

«Áshirbek Tórebaıuly kózi tirisinde teatr, dramatýrgııa týraly 20-ǵa jýyq kitap, myńǵa tarta tamasha maqala jazǵan. Qazaq teatr synynda jańasha jol salǵan aıryqsha tulǵa. Ol qazaq ónertanýshylary arasynda teatrdy óner retinde, ult úshin mańyzy bar qoǵamdyq qubylys retinde alǵash tanyǵan sarabdal synshy», - dedi Kentaý qalasynyń ákimi.

Jıynda Áshirbek Syǵaıǵa arnalǵan áýender men óleń joldary jınalǵan qaýymnyń janyn tebirentip, erekshe kúıge bóledi. Marqumnyń zamandastary, aǵaıyn-týystary, dostary birtýar azamat týraly estelikterimen, qyzyqty áńgimelerimen bólisti. Saltanatty shara sońynda Áshirbek Syǵaıdyń aýdarmasy «Júreıikshi júrek aýyrtpaı» qoıylymy kórsetildi.