OQO-da 6 ınvestıtsııalyq joba iske asyrylady

ShYMKENT. QazAqparat - Aǵymdaǵy jyly Maqtaral aýdanynyń ındýstrıaldy aımaǵynda 6 joba iske asyrylyp, 380 adam jańa jumys ornymen qamtylatyn bolady. Búgin bul týraly OQO óńirlik kommýnıkatsııalar qyzmetinde ótken brıfıngte Maqtaral aýdanynyń ákimi Jamantaı Beısenbaev málim etti, dep habarlaıdy QazAqparat tilshisi.

Aýdan basshysynyń aıtýynsha, bıyl aýdandaǵy ónerkásip ónimin 13 666,4 mıllıon teńgege jetkizý mejelenip otyr. Ol úshin "Indýstrııaldy-ınnovatsııalyq damý baǵdarlamasy" sheńberinde ınvestıtsııa tarta otyryp, jalpy quny 3537 mıllıon teńgeni quraıtyn 6 ınvestıtsııalyq jobany iske asyrý josparlanǵan. Atap aıtqanda, bıyl aýdanda asfalt-beton zaýyty, polıetılen ónimderiniń jáne medıtsınalyq maqta ónimderiniń óndirisi, sondaı-aq temirdi qaıta óńdeý óndirisi men logıstıkalyq ortalyq jáne kún elektr stansasynyń jobalary iske asatyn bolady. 

«Qazirgi tańda aýdannyń ındýstrıaldy aımaǵynan jer bólinip, qurylysy bastalǵan  asfalt-beton zaýytyn salýǵa 300 mln teńge jumsalmaq. Joba boıynsha 30 adam jumyspen qamtylyp, saǵatyna 300 tonna asfalt-beton ónimderi óndiriletin bolady. Sondaı-aq, "Radjapov" jeke kásipkerliginiń "Polıetılen ónimderiniń óndirisi" jobasynyń qurylysy aǵymdaǵy jyldyń maýsym aıynda bastalady dep kútilýde. Jobanyń qurylysyna 200 mıllıon teńge jumsalyp,  jańadan 36 jumys orny ashylady», - dedi Jamantaı Qanaıuly.

Oblys boıynsha maqta shıkizatynyń 80 paıyzy Maqtaral aýdanyna tıesili bolǵanymen, óńirde shıkizatty ári qaraı daıyn ónimge aınaldyratyn kásiporyndar tapshy. Osy maqsatty "Aıbek" sharýa qojalyǵy medıtsınalyq maqta ónimderiniń óndirisi jobasyn qolǵa alǵan. Indýstrıaldy aımaqtan jer bólinip, qurylysy bastalǵan jobaǵa 85 mıllıon teńge qarjy jumsalmaq. Kásiporyn 28 adamdy jumyspen qamtyp, jylyna 2 mıllıon dana medıtsınalyq maqta ónimderin óndiretin bolady.