OQO ákimi aqyn, halyq jazýshysy Muhtar Shahanovpen kezdesti
Osy dataly merekege oraı Ońtústik Qazaqstan oblysynyń ákimi Janseıit Túımebaev aqynmen arnaıy kezdesip, mereıli merekesimen quttyqtady, dep habarlaıdy OQO ákiminiń baspasóz qyzmeti.
Kezdesý barysynda óńir basshysy halyq jazýshysynyń qazaq ádebıetine qosqan súbeli úlesin erekshe atap ótti.
«Sizdi ótken ǵasyrdan jaqsy tanımyz. Biz sizdiń óleńderińizdi oqyp óstik. Áli esimde 1986 jyly Máskeýde ótken shyǵarmashylyq keshińizge de kýá bolǵan edim. Sol jyldary Máskeýdiń tórinde jeke kesh ótkizýińizdiń ózi úlken erlik edi. Odan keıingi jyldary Jeltoqsan oqıǵasyna baılanysty talaı bastamalar kóterip, halyqtyń máselesin jetkizip júrdińiz. Bul sizdiń tek aqyndyǵyńyz ǵana emes, adamı otansúıgishtik qasıetińizdiń aıqyn kórinisi. Siz Ońtústiktiń maqtanyshysyz, biz sizben maqtanamyz, qazaq ádebıetiniń abyzy retinde elimizge orasan zor eńbek sińirip kelesiz», - dedi Janseıit Qanseıituly.
Jazýshy shyǵarmalarynyń negizgi tuǵyrnamasy - adamdyq pen adaldyqty, ádildikti, tazalyqty asqaqtatý arqyly ezdikti, aramdyqty, zulymdyqty adamzat balasynyń bolmysyna qarsylyqty qasıetter retinde áshkereleý bolyp tabylady.
Qazaq ádebıeti men óneriniń damýyna súbeli úles qosqan aqynnyń «Everestke shyǵý», «Jalyn», «Dostyq ólkesiniń zańy», «Órkenıettiń adasýy», «Shyńǵyshannyń pendelik qupııasy» atty shyǵarmalary elimizdiń taza ulttyq rýhynan tynys alǵan kúrdeli týyndylar retinde álem ádebıetiniń qataryna qosyldy.
Aıta keteıik, búgin Elbasynyń «Bolashaqqa baǵdar: rýhanı jańǵyrý» maqalasy aıasynda J.Shanın atyndaǵy oblystyq akademııalyq qazaq drama teatrynda aqynnyń 75 jyldyq mereıtoıyna oraı «Álem tanyǵan aqyn» atty shyǵarmashylyq keshi uıymdastyrylmaq. Teatrdyń foesine Muhtar Shahanovtyń 75 jyldyq mereıtoıyna arnalǵan «Álem tanyǵan aqyn» atty kórme ornatylyp, oǵan aqynnyń kitaptary men aqyn jaıyndaǵy zertteýler men estelik maqalalary qoıylady.
