OQO ákimi 431 «Altyn belgi» ıegeri 100 baldy jınaı almaǵany úshin muǵalimderge syn aıtty

  ShYMKENT. QazAqparat - Ońtústik Qazaqstan oblysynda bıylǵy oqý jylynda jańa 20 mektep iske qosylady. Taǵy  23 mekteptiń qurylysyn 2018-2019 jyldary aıaqtaý josparlanyp otyr. Bul týraly oblys ákimi Janseıit Túımebaev óńirdegi bilim qyzmetkerleriniń tamyz konferentsııasynda málimdedi, dep habarlaıdy QazAqparat HAA tilshisi.   

Aımaq basshysynyń sózinshe, bıyl respýblıka kóleminde 1 qyrkúıek kúni jańadan 48 mektep berilse, sonyń 20-sy ońtústik óńirinde ashylady. Sondaı-aq óńirde bıylǵy jyly bilim salasyn qarjylandyrýǵa oblystyq bıýdjetten 257,6 mlrd. teńge bólingen. Munan bólek, 31,2 mlrd. teńgege 79 bilim nysanynyń qurylysy júrgizilip jatsa, onyń 29 bilim nysany jyl sońynda paıdalanýǵa berilmek. Osylaısha  aldaǵy tórt jyl kóleminde 205 jańa mektep salý josparlanyp otyr.

«Aýyldardy mektepter salynyp jatyr, ol bizdiń mindetimiz. Al bıyl Ulttyq biryńǵaı testileýde respýblıka boıynsha 15-shi orynǵa turaqtap otyrmyz. Al 431 «Altyn belgi» ıegeri 100 baldy da jınaı almaǵan. Túlekterdiń 13 paıyzy shekti 50 baldy da jınaı almaǵan. Mine, bizdiń deńgeıimiz. Sondyqtan birigip jumys isteýimiz kerek. Mektep bitirgen jastar suranysqa ıe mamandar bolýy kerek, jumyssyz júrmeýi tıis. Búgingi tamyz keńesi - bilim berý isindegi jeńisterimiz ben kemshilikterdi saralaıtyn aıshyqty alań jáne aldymyzda turǵan mindetterdi pysyqtaıtyn mańyzdy basqosý. Elbasy Nursultan Ábishuly Nazarbaev «Tabysty bolýdyń eń irgeli, basty faktory bilim ekenin árkim tereń túsinýi kerek. Jastarymyz basymdyq beretin mejelerdiń qatarynda bilim árdaıym birinshi orynda turýy shart. Sebebi, qundylyqtar júıesinde bilimdi bárinen bıik qoıatyn ult qana tabysqa jetedi» degen bolatyn. Sondyqtan da búgingi tań - bilim berý mazmunyna, oqýshy men pedagog tulǵasyna jáne qyzmetine degen kózqarastar túbegeıli ózgeriske bet buryp otyrǵan kúrdeli kezeń», - dedi óńir basshysy.                       

Oblys ákiminiń aıtýynsha,  jańa oqý jylynda mektepterge 640 myńǵa jýyq oqýshy keledi dep josparlanyp otyr. Bul mekteptegi bala sany  ótken jylmen salystyrǵanda 28 myńǵa artady degen sóz. Onyń ishinde 1-synypqa  baratyn balalar sany  73 691  balany qurap otyr. Jalpy óńir boıynsha 1036 mektep bar bolsa, onyń 7-eýi - jeke menshik. Oǵan qosa, osy oqý jylynda  8 jańa mektep ashyldy dep kútilýde, Maqtaral aýdanynda 1-eý, Ordabasy aýdanynda 2-eý, Saıram aýdanynda 1-eý, Túlkibas aýdanynda 1-eý jáne Shymkent qalasynda úsh mektep. 2017-2018 oqý jylynda 11-synypty 35 myńǵa jýyq túlek  bitiretini kútilýde. Sondaı-aq, óńirde qazirgi  tańda 69 myńnan asa muǵalim bilim beredi. Budan bólek, balalardy oqýlyqpen qamtamasyz etýge 4,5 mlrd. teńge bólingen. Ózbek, tájik mektepterine arnalǵan jańa mazmundy synyp oqýlyqtary aýdarylyp, baspadan shyǵarylýda. Osyndaı jumystar atqarylyp jatqan soń óńir basshysy bilim salasy qyzmetkerlerin sapaǵa mán berip jumys isteýge shaqyrdy.