O. Bókeıdiń kitabyn aýdarǵan S.Hollıngsvort: Aǵylshyn oqyrmanyna keregin bere bilgen sekildimiz
«Belgili bir shyǵarmany aýdarmas buryn ony durystap uǵynyp, egjeı-tegjeıli túsinip alý kerek. ıAǵnı, avtordyń únin sezinbeseńiz týyndynyń negizgi maǵynasynan aýytqyp ketýińiz múmkin», - deıdi ol.
Aýdarmashy Oralhan Bókeıdiń kitabyn alty aıdyń ishinde aýdaryp bitirgenin aıtady.
«Negizgi aýdarmashy - menmin, - deıdi Saımon Hollıngsvort. - Kitaptyń redaktorlyq jumysyn ekinshi Saımon atqardy (Saımon Gegen - avt.). Juptasa jumys atqardyq. Burynnan beri Saımon ekeýimiz orys tilindegi kitaptardy aǵylshyn tiline tárjimalap kelemiz. Halyqaralyq Qazaq PEN klýbymen tanysqannan keıin maǵan Gerold Belgerdiń kitabyn aýdarý týraly usynys tústi. Ol kisi týyndysyn orys tilinde jazǵannan keıin álbette kúrdeli bolǵan joq. Kelesi jobamyz - Áýezovtyń áńgimeleri edi. «Qarash-Qarash» pen «Kókserekten» bastap, Saımon ekeýimiz Muhtar Áýezovtiń birneshe týyndysyn aǵylshyn tiline tárjimaladyq. Sodan keıin baryp, Oralhan Bókeıge kelip otyrmyz».
Aýdarmashylardyń aıtýynsha, kez kelgen aýdarmanyń óziniń kúrdeliligi bar.
«Aýdarma ekiniń biriniń qolynan kelýi múmkin. Biraq, ádebıet - qatyp qalǵan qasań qujattar emes. Ol «tiriligimen» erekshelenedi. Meniń ózim aýdarmany krossvord dep elestetemin. ıAǵnı, týyndydan avtordyń únin, shyǵarmasynyń negizin izdep tapqym keledi. Oralhan Bókeıdiń aıtqysy kelgenin tap basyp taptyq degen senimdemiz. Bir sózben, ózimizdiń jumysymyzdyń nátıjesine kóńilimiz tolady. Biraq, áli de keıbir tustaryn bylaısha jasaý kerek pe edi degen oıdyń keıde týyndap qalyp jatatynyn jasyrmaımyn», - deıdi Saımon Hollıngsvort.
Oralhan Bókeıdiń shyǵarmalary aldymen A.Kımniń aýdarýymen orys tilinde basylyp shyqqan bolatyn. Halyqaralyq Qazaq PEN klýbymen atalǵan kitap bekitilgennen keıin «Saımondar» tárjimany bastap ketken.
«Oralhannyń óte tereń jazatynyn ańǵardyq. Atalǵan kitapqa «Aıqaı» men «Kisi kıik» atty eki uzaqtaý týyndy, sosyn olardan qysqalary da kezdesti. Qysqa shyǵarmalar kúrdeli bolmaǵandyqtan, oqyǵannan keıin birden túsinesiz. Al «Kisi kıikti» men birneshe ret oqydym. Aýdarmany Saımonǵa kórsetipedim, ol maǵan birshama ursyp tastady. Aqyry, ekeýimiz ol týyndyǵa qaıta kirisip, aqyry ózimizdiń kóńilimiz tolǵan deńgeıde ǵana aýdarmamyzǵa núkte qoıdyq. Menińshe, aǵylshyn oqyrmandarynyń izdegenin bere bilgen sekildimiz», - deıdi Saımon Hollıngsvort.
Eske sala ketsek, búgin elordada qazaqtyń birtýar qalamgeri Oralhan Bókeıdiń aǵylshyn tilindegi «Kisi kıik» kitabynyń tusaýy kesildi. Kitaptyń tusaýkeserine «Kisi kıikti» aǵylshyn tiline aýdarǵan Saımon Hollıngsvort pen Saımon Gegen Londonnan arnaıy ushyp keldi.
