Nıý-Iorkte atys kezinde bes adam qaza tapty
ASTANA. KAZINFORM — Nıý-Iork qalasynyń Manhetten ortalyǵyndaǵy záýlim ǵımaratta belgisiz adam avtomat qarýynan oq jaýdyrdy, dep jazdy BBC agenttigi.
CBS News telearnasynyń málimetinshe, atys kezinde bir polıtseı men onyń áriptesi qaza tapqan, al eki beıbit turǵyn aýyr jaralanǵan. Al CNN jáne Fox News telearnalarynyń habarlaýynsha, keminde bes adam kóz jumǵan, olardyń arasynda shabýyldaýshynyń ózi de bar.
Qaza bolǵandar sanyna qatysty polıtsııa men jergilikti bılik ázirge resmı málimdeme jasaǵan joq.
Nıý-Iork meri Erık Adams vıdeoúndeýinde atys barysynda «kóptegen adamdar jaraqat aldy» dep málimdedi.
Amerıkalyq BAQ-tyń habarlaýynsha, oqıǵa Park-avenıý dańǵylynda ornalasqan 44 qabatty záýlim ǵımaratta bolǵan. Bul jerde Blackstone atty iri qarjy kompanııasynyń, AQSh Ulttyq fýtbol lıgasynyń (NFL) jáne basqa da uıymdardyń shtab-páterleri ornalasqan.
Aıta keteıik, buǵan deıin jappaı atys AQSh-tyń Hıýston qalasynda da tirkelip, sol kezde 16 adam jaraqat alǵan bolatyn.