Nvidia alǵash ret 5 trıllıon dollarlyq kompanııa atandy

ASTANA. KAZINFORM – Kremnıı alqabyndaǵy chıp óndiretin Nvidia kompanııasy naryqtyq kapıtalızatsııasy 5 trıllıon dollarǵa jetken álemdegi alǵashqy kompanııa boldy, dep habarlaıdy Kyodo. 

Bul kórsetkishke kompanııa nebári úsh aı buryn 4 trıllıondyq mejeni eńsergennen keıin qol jetkizdi.

Bul jetistik jasandy ıntellekt tehnologııalaryna degen jahandyq qyzyǵýshylyqtyń qanshalyqty iri betburysqa aınalǵanyn taǵy da dáleldedi. Sarapshylar muny sońǵy 18 jyldaǵy, ıaǵnı Apple kompanııasynyń negizin qalaýshy Stıv Djobs alǵashqy iPhone-dy tanystyrǵan sátten bergi eń aýqymdy tehnologııalyq serpilis dep sanaıdy.

Alaıda sarapshylar men retteýshi organdar naryqtyń shamadan tys qyzyp ketý qaýpine de nazar aýdaryp otyr. Anglııa banki men Halyqaralyq valıýta qorynyń ókilderi tehnologııalyq aktsııalardyń jasandy ıntellektke degen joǵary suranys áserinen shamadan tys qymbattaýy múmkin ekenin eskertti.

Kompanııa aktsııalarynyń quny 2023 jyldyń basynan beri birneshe esege ósti. Nvidia aktsııalary sársenbi kúni $207,04 baǵamynda jabyldy, al aınalymdaǵy aktsııalar sany 24,3 mıllıardty qurady. Osylaısha, kompanııanyń naryqtyq quny 5,03 trıllıon dollar deńgeıine jetti.

- Salystyratyn bolsaq, bul kórsetkish Úndistan, Japonııa jáne Ulybrıtanııanyń ishki jalpy óniminen joǵary, - dep habarlaıdy HVQ.

Nvidia óz chıpterin bastapqyda beıneoıyndarǵa arnalǵan grafıkalyq protsessorlardan ChatGPT sııaqty qýatty jasandy ıntellekt júıelerin oqytýǵa beıimdep, tehnologııalyq naryqtaǵy kóshbasshy pozıtsııasyn nyǵaıtty. Chat-bottar men generatıvti JI sheshimderine degen suranystyń kúrt artýy kompanııaǵa erekshe serpin berdi.

Kompanııa bas dırektory Djensen Hýang JI naryǵyndaǵy kúrt qyzyǵýshylyqtyń ýaqytsha qubylys emes ekenin atap ótti. Onyń aıtýynsha, birneshe jyl buryn tek qyzyǵýshylyq týdyrǵan chat-bottar búginde naqty paıda ákeletin quralǵa aınaldy.

Osy aptada Hýang Ońtústik Koreıada ótetin Azııa-Tynyq muhıty ekonomıkalyq yntymaqtastyq sammıtine (APEC) qatysýǵa jolǵa shyqty. Forým aıasynda AQSh, Qytaı jáne Japonııa lıderleriniń qatysýymen mańyzdy kelissózder ótedi dep kútilýde.

Buǵan deıin Nvidia birneshe iri jobany jarııalaǵan bolatyn:

• Uber kompanııasymen robotaksı salasynda áriptestik ornatty;

• Nokia-ǵa 1 mlrd dollar ınvestıtsııa salyp, 6G tehnologııasyn damytý boıynsha yntymaqtasa bastady;

• AQSh Energetıka mınıstrligimen birlesip, jeti jańa jasandy ıntellekt sýperkompıýterin salý josparyn qolǵa aldy;

• OpenAI-men 100 mlrd dollarlyq seriktestikke qol qoıdy, bul jobanyń aıasynda Nvidia AI data-ortalyqtarynyń qýaty 10 gıgavattqa deıin artady.

Sonymen qatar, kompanııa Qytaı naryǵyna arnalǵan jańa chıp ázirleý múmkindigin Donald Tramp ákimshiligimen talqylap jatyr.

Osylaısha, Nvidia-nyń 5 trıllıon dollarlyq mejeni baǵyndyrýy jasandy ıntellekt dáýiriniń ekonomıkalyq kelbetin túbegeıli ózgertetin tarıhı kezeń retinde baǵalanyp otyr.

Buǵan deıin Nvidia 4,5 trln dollarlyq naryqtyq quny bar tuńǵysh kompanııa bolǵany jarııalanǵan.