Nurtóre Júsip zeınetaqy jınaǵyn paıdalaný boıynsha «Áýlet» atty baǵdarlama usyndy

NUR-SULTAN. QazAqparat – Zeınetaqy jınaǵyn maqsatty túrde paıdalaný tetikteri áli de zertteýdi qajet etedi. Senator Nurtóre Júsip azamattardyń zeınetaqy jınaǵyn paıdalaný múmkindigi boıynsha osylaı dep pikir bildirdi, dep habarlaıdy QazAqparat tilshisi.

«Jumys isteıtin azamattardyń zeınetaqy jınaqtarynyń bir bóligin turǵyn úı satyp alý úshin nemese basqa da maqsattarǵa nysanaly túrde paıdalaný týraly Memleket basshysynyń tapsyrmasy bar. Osyǵan oraı Úkimettiń tarapynan jumys toby qurylyp, ony Premer-Mınıstrdiń orynbasary Berdibek Saparbaev basqardy. Eńbek jáne halyqty áleýmettik qorǵaý mınıstri Birjan Nurymbetov bul máselege qatysty qandaı usynystar berilgenin ortaǵa saldy. Bul jerde negizgi másele – zeınetaqy qoryndaǵy qarajatty qalaı bolsa solaı paıdalana salý emes, belgili bir maqsatqa, ıaǵnı azamattardyń densaýlyǵyna, bilimine, sonymen birge turǵyn úı máselesin sheshýde tıimdi paıdalanýdyń tetigin izdestirý bolǵan edi», - dedi Nurtóre Júsip Parlament Senatynda ótken dóńgelek ústel barysynda.

Senator osyǵan deıin de bul másele boıynsha kezdesý uıymdastyrylǵanyn eske saldy.

«Sol kezdesýlerde densaýlyq pen bilim úshin zeınetaqy qoryndaǵy qarajatty paıdalaný – sonshalyqty ótkir turmaǵanyna kóz jetkizdik. Bul jerde halyqtyń basym kóbi baspana alý máselesine qatysty talap-tilekterin bildirip jatyr. Búgingi jıynda da birqatar usynys ortaǵa salyndy. Zeınetaqy qoryndaǵy qarajattyń bir bóligin áleýmettik qajettilikterge paıdalanýdyń birneshe tásili usynylyp jatyr. Bunyń barlyǵy meniń oıymsha, áli zertteýdi, tolyq bir júıeli túrde qarastyrýdy qajet etedi degen oıdamyn», - dedi ol.

Senatordyń aıtýynsha, bul rette Turǵyn-úı qurylys jınaq banki tarapynan berilgen usynys kóńilinen shyqqanyn aıtady.

«Qazir azamattardyń kóbi «Nurly jer» jáne «7-20-25» baǵdarlamasy arqyly úı alarda bastapqy jarnany jınaqtaı almaıdy. Sondyqtan, bir otbasynda 4-5 adam jumys istese, olardyń biriniń zeınetaqy jınaǵy 1 mln, ekinshisiniki 2 mln teńge bolýy múmkin. Solardyń jınaqtarynyń bir bóligin ortaq maqsatqa jumyldyrý tetikterin jasasa degen usynys bar. Qazaqta áýlettik júıe óte jaqsy qalyptasqan ǵoı. Aıtalyq «Áýlet» degen baǵdarlama ashyp, kómek retinde zeınetaqy aqshasyn aýdarýǵa múmkindik berip, keıin qaıtarý máselesin pysyqtasa degen usynysty aıtqym keledi», - dedi ol.

Eske sala ketsek, buǵan deıin Úkimet azamattardyń zeınetaqy jınaǵyn paıdalaný múmkindigi boıynsha Prezıdentke usynys bergenin habarlaǵan edik.