Nurtóre Júsip: Dástúrli BAQ - memlekettik tildiń qorǵaýshysy
«Dástúrli buqaralyq aqparat quraldary gazetter, jýrnaldar naryq jaǵdaıyna tótep bere ala ma, ómir súre ala ma, bolashaǵy qalaı bolady degen másele týraly álemde de, onyń ishinde Qazaqstanda da kópten beri áńgime oryn alyp jatyr. Keıbir sarapshylar «gazet-jýrnaldar ýaqytpen birge jylystap shyǵa beredi» degendi aıtady. Keıbireýler «gazetterdiń kúni bitti, óldi ne bolmasa jaqynda janazasyn shyǵaramyz» degen nıette. Qalaı óltirmeýge bolady?», - dedi Nurtóre Júsip.
Onyń aıtýynsha Qazaqstanda oqý mádenıeti qalyptasqan. Al oqý mádenıeti óte úlken qundylyq, saýatty adamnyń is-áreketi. Adamzat balasy oqýdy dúnıetanymyn keńeıtý, rýhanı qazynasyn keńeıtý maqsatynda oılap tapqan.
«Bizdiń qazirgi qoǵamda oılaýdy qoıǵan adamdardyń qatary kóbeıetin sııaqty. Óıtkeni oqýdy qoıǵan adamdardyń qatary kóbeıdi. Gazet te, kitap ta oqylmaıdy. Sonda ne úshin shyǵaryp jatyrmyz? Qazaqstanda jyl saıyn memlekettik tapsyryspen áleýmettik baǵdarlanǵan qanshama kitap shyǵady. Solardy kim oqyp jatyr? «Mádenı mura» aıasynda 100 tomdyq «Babalar sózi» atty ǵalamat entsıklopedııalyq eńbek jınaqtalyp, sórelerge qoıyldy. Qazir betin ashatyn adam bar ma?», - dedi ol.
Sonymen qatar gazet basshysy qazaqtildi basylymdardyń memlekettik tildi damytýǵa róline aıryqsha toqtalyp ótti.
«Qazaq sóziniń qaınaryn saqtap otyrǵan dástúrli BAQ, qazaq tilin saqtap otyrǵan osy gazetter men jýrnaldar. Internet basylymdarǵa, jańa medıaǵa meniń eshqandaı daýym joq. Biraq ol jerde tildiń shubarlanýy, tildik qorymyzdyń buzylýy óte kóp jáne ony kúndelikti kórip júrmiz. Al dástúrli BAQ memlekettik tildiń qorǵaýshysy, birden-bir saqtaýshysy, birden-bir shyraqshysy dep aıtýǵa bolady. Dástúrli BAQ-syz memlekettik tildiń saqtalýyn, odan ary kemeldenýin, damýyn kóre almaımyz, kóz aldymyzǵa elestete almaımyz»,- dedi Nurtóre Júsip.
